Batang Lalaki nga Nahikatulog

Oy! Oy! Unsay nahitabo dinhi? Ang bata bang lalaki kinsa nagbuy-od sa yuta nasakitan kaayo? Tan-awa! Si Pablo migawas sa balay. Makita mo ba usab si Timoteo dinhi? Unsay nahitabo?

Buweno, si Pablo naghatag sa usa ka pakigpulong sa mga tinun-an dinhi sa Troas. Nasayod siya nga dili na siya makakita kanila pag-usab sa usa ka hataas panahon. Busa siya mipadayon sa pakigpulong hangtod sa tungang gabii.

Kining batang lalaki ginganlan Eutico naglingkod sa bentana, ug siya nahikatulog. Siya nahulog gikan gayod sa bentana, tulo ka andana ngadto sa yuta. Busa imong makita ngano ang katawhan mabalak-on kaayong tan-awon. Sa dihang ang mga tawo mibaswat sa bata, ilang nakaplagan nga siya patay na.

Sa pagkakita ni Pablo nga ang bata patay na, mihapa siya sa ibabaw niya ug migakos kaniya. Unya siya miingon: ‘Ayaw kabalaka. Maayo ra siya!’ Ug maayo ra siya! Kini usa ka milagro. Ang balod sa kalipay misanap sa panon.

Silang tanan nanaka na usab ug nangaon. Si Pablo mipadayon sa pakigpulong hangtod sa pagbanagbanag. Apan ikaw makaseguro nga si Eutico wala mahikatulog pag-usab! Unya si Pablo, si Timoteo ug ilang mga kauban misakay sa sakayan. Nahibalo ka ba asa sila paingon?

Si Pablo pauli na gikan sa iyang ikatulong pagwaling panaw. Niining panawa si Pablo mipabilin tulo ka tuig sa siyudad sa Efeso. Busa kini gani ang kinatas-ang panaw kay sa ikaduha.

Tapos sa pagbiya sa Troas, ang sakayan mihunong sa Mileto sa makadiyot. Ang mga ansiano sa kongregasyon sa Efeso mianha aron sa pagpamati kang Pablo sa kataposang panahon. Sa ulahi, sa dihang panahon na sa pagbiya, pagkasubo nila sa pagtan-aw kang Pablo nga migikan!

Sa kataposan ang sakayan nahibalik sa Cesaria. Dinhi, ang manalagna si Agabo mipasidaan kang Pablo nga siya mahimong usa ka binilanggo sa dihang mahiabot siya sa Jerusalem. Sa labing seguro, kini nahinabo. Unya, tapos sa pagkabilanggo sa duha ka tuig sa Cesaria, si Pablo gidala sa Roma aron husayon. Tan-awon ta kon unsay nahitabo sa panaw ngadto sa Roma.