Si Jesus Natawo sa Kuwadra

NAHIBALO ba ikaw kinsa kining gamayng bata dinhi? Oo, mao si Jesus. Mao pa lamay iyang pagkatawo dinhi sa kuwadra. Ang kuwadra maoy dapit nga butanganan sa mga hayop. Si Maria nagpahaluna kang Jesus sa pasungan, diin mao ang dapit nga butanganan sa pagkaon sa asno ug uban pang mga mananap.

Nganong ania man sila dinhi? Buweno, ang magmamando sa Roma naghimog usa ka balaod nga ang tanan mobalik sa siyudad diin siya matawo aron ikasulat ang iyang ngalan sa usa ka basahon. Si Jose natawo dinhi sa Betlehem. Apan sa dihang siya ug si Maria nahiabot, wala nay lawak alang kanila bisan diin. Busa sila mianhi dinhi uban sa mga hayop. Ug niining adlawa gayod, si Maria nanganak kang Jesus! Apan, ingon sa imong nakita, siya maayo ra.

Nakita mo ba ang mga magbalantay nga umaabot sa pagtan-aw kang Jesus? Didto sila sa kaumahan nag-atiman sa ilang mga karnero, sa dihang usa ka manulunda mipakita kanila! Ang manulunda miingon: ‘Ayaw kahadlok! May maayong balita ako kaninyo. Karon didto sa Betlehem, natawo si Kristo ang Ginoo. Siya ang magluwas sa katawhan!’ Sa kalit daghang manulunda miduol ug nagsugod sa pagdayeg sa Diyos. Busa diha dayon kining mga magbalantay nagdali sa pagpangita kang Jesus, ug karon ilang nakaplagan siya.

Nahibalo ka ba kon ngano si Jesus espesyal kaayo? Nahibalo ka ba kon kinsa gayod si Jesus? Hinumdomi, sa unang estorya niining basahona kita naghisgot mahitungod sa unang Anak sa Diyos. Kining maong Anak nagbuhat uban kang Jehova sa paghimo sa mga langit ug sa yuta ug sa tanan mga butang. Buweno, kini mao si Jesus!

Oo, si Jehova nagbalhin sa kinabuhi sa iyang Anak gikan sa langit ug gibutang kini sa tagoangkan ni Maria. Ang usa ka bata misugod sa pagtubo sa tagoangkan ni Maria, sama sa ubang mga batang nagtubo sa tagoangkan sa ilang mga inahan. Apan kini maoy Anak sa Diyos. Nakita mo ba ngano ang mga manulunda malipayon kaayo sa pagsugilon sa katawhan nga si Jesus natawo?