Kapitulo 21
Unsay Akong Himoon Kon Badlongon Ko?
“Ang akong inahan morag polis—kanunay lang mangitag sayop. Wala pa gani ko makahuman sa gipatrabaho kanako, iya dayong inspeksiyonon ug pangitaag sayop ang akong trabaho.”—Craig.
“Pirme lang kong sermonan sa akong ginikanan. Moingon sila nga badlongon kono ko. Sa eskuylahan man, sa balay, sa kongregasyon—duna gayod silay ipangasaba nako.”—James.
SA IMONG tan-aw pulos sayop lang ba ang makita sa imong ginikanan? Mibati ka ba nga ang matag lihok nimo gibantayan—gisigehan lag susi apan para nila wala gyod kay nahimong maayo?
Hain niini ang pirme nimong madunggan?
□ Nagkayamokat lang kanunay nang imong kuwarto.
□ Nagsige ka lag tan-awg TV.
□ Dugay ka kaayong matulog.
□ Dugay ka kaayong mobangon.
Isulat ang pahinumdom o pagbadlong sa imong ginikanan nga makalagot kaayo nimo.
․․․․․
Tinuod, makapikal kon mandaran ug badlongon ka kanunay sa imong ginikanan. Apan tagda kini: Kon dili ka tambagan o disiplinahon, dili ka kaha magduhaduha kon gihigugma ka ba sa imong ginikanan? (Hebreohanon 12:8) Sa pagkatinuod, ang disiplina maoy pamatuod nga gihigugma ka nila. Ang Bibliya nag-ingon nga ang amahan mobadlong sa “anak nga iyang gikahimut-an.”—Proverbio 3:12.
Nan, magpasalamat ka nga gitul-id ka kay gihigugma ka nila! Bata pa man god ka ug walay kasinatian. Matag karon ug unya, kinahanglan kang badlongon. Kay kon dili, madaog ka gayod sa “mga tinguha nga iya sa pagkabatan-on.”—2 Timoteo 2:22.
Pero Sakit Kini!
Siyempre, ‘walay disiplina sa pagkakaron nga makapalipay, hinunoa makapaguol.’ (Hebreohanon 12:11) Mas sakit ang disiplina ilabina kon bata ka pa. Ug dili kini ikatingala! Anaa ka pa sa edad nga nagabag-o ang imong personalidad. Nagdako ka pa ug wala ka pa kaayo makaila sa imong kaugalingon. Busa ang pagbadlong makapahiubos—bisan pag giayo ug sulti.
Normal kini nga reaksiyon, tungod kay ang isulti sa uban bahin kanimo makaapektar sa imong pagtamod sa imong kaugalingon, ilabina kanang isulti sa imong ginikanan bahin nimo. Busa kon ang imong ginikanan mobadlong nimo o moreklamo sa imong trinabahoan, siyempre masakitan ka.
Makaingon ka ba nga wala gyod kay nahimong maayo o wala kay pulos tungod lang sa gisulti sa imong ginikanan kanimo nga imong nahimong mga sayop? Dili. Ang tanang tawo masayop gayod. (Ecclesiastes 7:20) Ug makakat-on ka gikan sa imong mga sayop. (Job 6:24) Apan unsay imong bation kon ang imong ginikanan magsige lag panaway dihang makahimo kag sayop pero kon makahimo ka ganig maayo wala kay madunggang pagdayeg? Dili kana lalim. Apan wala kana magpasabot nga wala ka na gayoy pulos.
Kon Nganong Kasab-an Ka
Usahay ang imong amahan o inahan tingali grabeng makapangasaba, dili tungod kay may nahimo kang sayop kondili tungod kay siya gisapot. Duna bay problema ang imong mama? Nagsakit ba siya? Nan lagmit makasab-an gyod ka kon nagkayamokat ang imong kuwarto. Ang imo bang papa nasuko ug aburido tungod sa problema sa kuwarta. Nan tingali mopika siyag sulti nga modulot “sama sa mga dunggab sa espada.” (Proverbio 12:18) Tinuod, makalagot ang wala sa lugar nga pagpangasaba. Apan imbes magsigeg hunahuna bahin niana—nga makapasuko lang nimog samot—ipalabay na lang ang mga sayop sa imong ginikanan. Hinumdomi: “Kitang tanan mangapandol sa makadaghan. Kon adunay dili mapandol sa pulong, siya usa ka tawong hingpit.”—Santiago 3:2.
Kay dili man hingpit, ang ginikanan mobati usab nga sila kulang ug katakos. Sa pagkatinuod, kon ikaw pakyas, mobati sila nga pakyas usab sila. Pananglitan, tingali kasab-an sa inahan ang iyang anak inigkakita niya sa kard nga mugbo ang iyang grado. Apan basin ang gihunahuna sa inahan mao, ‘Tingali dili ako maayong inahan kay dili ako maayong modasig kaniya sa pagtuon.’
Kalma Lang Kon Kasab-an Ka
Bisag unsa pay hinungdan sa pangasaba, ang pangutana mao, Unsay imong himoon aron dili ka kaayo maapektohan? Una, ayaw pagtubag-tubag. Ang Proverbio 17:27 nag-ingon: “Si bisan kinsa nga nagapugong sa iyang mga pulong may kahibalo, ug ang tawo nga may katakos sa pag-ila may mabugnaw nga espiritu.” Unsay imong himoon aron makapabilin kang ‘mabugnaw sa espiritu’ kon kasab-an? Sulayi ang mosunod:
Pamati. Imbes mangatarongan dayon o moreklamo nga wala kay sala, pugngi ang imong pagbati ug paminaw sa isulti sa imong ginikanan. Gisultihan sa tinun-ang si Santiago ang mga Kristohanon nga “magmaabtik sa pagpaminaw, magmahinay sa pagsulti, magmahinay sa pagkapungot.” (Santiago 1:19) Kon suko kaayo kang motubag samtang nagsulti pa ang imong ginikanan, magtuo sila nga wala ka mamati. Masuko sila niini ug makasab-an hinuon kag samot.
Pamalandong. Usahay, para nimo morag sakit ang paagi sa pagtambag kanimo sa imong ginikanan. Apan imbes maghunahuna kanunay sa paagi sa ilang pagsulti kanimo, palandonga kon unsa ang gisulti. Pangutan-a ang imong kaugalingon: ‘Hain sa ilang gipangasaba ang tinuod? Nakareklamo na ba ang akong ginikanan bahin niini kaniadto? Unsa may mawala kanako kon tumanon nako ang ilang gusto?’ Hinumdomi, bisag dili makataronganon para nimo ang ilang pagpangasaba, gidisiplina ka sa imong ginikanan tungod kay gihigugma ka nila. Kon sila nagdumot gayod kanimo, dili ka nila disiplinahon.—Proverbio 13:24.
Dawata ang imong sayop. Kon modawat ka sa imong sayop, imong gipakita nga nakasabot ka sa gisulti sa imong ginikanan. Tingali moingon ang imong inahan: “Biyaan lang nimo ang imong kuwarto nga nagkayamokat. Kon dili ka gani manglimpiyo, makatilaw gyod ka nako!” Para nimo limpiyo ang imong kuwarto. Apan kon imo kining isulti niya, seguradong masuko siya. Hunahunaa pod ang iyang panglantaw. Mas maayong moingon ka ug sama niini: “Pasensiya na, Ma. Nagkayamokat bitaw ning akong kuwarto. Pwede bang inigkahuman na lang nato ug panihapon ko manglimpiyo?” Kon mouyon ka nga tinuod ang giingon sa imong inahan, lagmit mokalma siya. Siyempre, kinahanglan nga imong tumanon ang iyang gisugo kanimo.—Efeso 6:1.
Paghulat. Ayaw pangatarongan hangtod matuman nimo ang gisugo kanimo sa imong ginikanan. Ang Bibliya nag-ingon: “Siya nga nagapugong sa iyang mga ngabil nagalihok nga maalamon.” (Proverbio 10:19) Kon makita sa imong ginikanan nga namati ka gayod kanila, sila mamati pod kanimo.
Isulat dinhi kon hain sa upat ka lakang ang kinahanglan nimong pauswagon. ․․․․․
Kon Nganong Mapuslanon ang Pagdawat sa Pagbadlong
Dili ba agwantahon nimo ang bisan unsang kalisod aron lang makakitag bulawan? Buweno, ang Bibliya nag-ingon nga ang kaalam mas bililhon pa kay sa bisan unsang bahandi. (Proverbio 3:13, 14) Sa unsang paagi mahimo kang maalamon? Ang Proverbio 19:20 nag-ingon: “Patalinghog sa tambag ug dawata ang disiplina, aron ikaw mahimong maalamon sa imong ugma-damlag.” Sa pagkatinuod, ang tambag ug disiplina lisod dawaton. Apan kon ayagon nimo ang pagbadlong aron makuha ang tipik sa bulawanong kaalam ug ipadapat kini, makabaton kag bahandi nga labaw pa ka bililhon kay sa bulawan.
Sa pagkatinuod, ang pagbadlong normal na nga bahin sa kinabuhi. Seguradong nabadlong ka na sa imong ginikanan ug mga magtutudlo. Sa umaabot, tingali mabadlong sab ka sa imong amo ug sa uban. Kinahanglang makakat-on ka sa pagdawat sa pagbadlong sa imong ginikanan aron mahimo kang mauswagong estudyante, maayong empleyado, ug aron maugmad nimo ang imong pagsalig sa kaugalingon. Busa, ang pagdawat sa pagbadlong mapuslanon!
Mora ka bag gihigtan sa kadaghan sa restriksiyon kanimo sa imong ginikanan? Pagtuon nga magmakontento sa gihatag kanimo nga kagawasan—ug pagtuon kon unsay himoon aron makabaton kag dugang kagawasan.
TEKSTO
“Ang maalamong tawo magpatalinghog ug magadawat ug dugang nga pagtudlo.”—Proverbio 1:5.
SUGYOT
Aron madawat nimo ang pagbadlong sa imong ginikanan
● Pasalamati ang komendasyon nga imong madawat duyog sa pagbadlong.
● Pangutana kon wala ka makasabot kon nganong gibadlong ka o kon unsay imong angayng himoon.
NAHIBALO KA BA . . . ?
Ang ubang mga ginikanan dili makamaong mopakitag gugma sa ilang mga anak tungod kay wala sab sila pakitaig gugma ug pagsabot sa ilang kaugalingong ginikanan.
ANG AKONG PLANONG HIMOON!
Kini ang akong himoon sa sunod higayon nga badlongon ako sa akong ginikanan ․․․․․
Kini ang akong himoon kon sa akong tan-aw wala sa lugar ang pagbadlong sa akong ginikanan ․․․․․
Kon unsay akong gustong ipangutana sa akong ginikanan
bahin niini ․․․․․
UNSAY IMONG HUNAHUNA?
● Nganong naglisod ka sa pagdawat sa pagbadlong?
● Nganong gibadlong ka man sa imong ginikanan?
● Unsay imong himoon aron makabenepisyo ka sa gitambag kanimo?
[Blurb sa panid 177]
“Kaniadto kon singkahan ko sa akong inahan, singkahan pod nako siya. Apan karon naningkamot gyod ko sa pagpadapat sa Pulong sa Diyos. Kini epektibo. Ang tinamdan ni mama anam-anam nga nausab. Tungod sa pagpadapat nako sa Bibliya, mas nasabtan na nako siya. Ang among relasyon miarang-arang.”—Marleen
[Hulagway sa panid 180]
Kon ayagon nimo ang pagbadlong aron makuha ang tipik sa bulawanong kaalam ug ipadapat kini, makabaton kag bahandi nga labaw pa ka bililhon kay sa bulawan