1, 2. Sumala sa Ezequiel 47:1-12, unsay nakita ug nahibaloan ni Ezequiel? (Tan-awa ang hulagway sa sinugdan sa kapitulo.)

SI Ezequiel nakakita ug laing makapahinganghang butang sa iyang panan-awon bahin sa templo: Naay sapa nga nag-agos gikan sa sagradong tinukod! Imadyina nga gisubay niya ang gigikanan sa tin-aw kaayong tubig. (Basaha ang Ezequiel 47:1-12.) Kini nagdagayday gikan sa bakanan sa sangtuwaryo; dayon kini migawas sa templo duol sa sidlakan nga ganghaan. Ang anghel naggiya kang Ezequiel pagawas sa templo ug nagsukod sa distansiya samtang nagsubay sila sa tubig. Balikbalik nga giingnan sa anghel si Ezequiel sa paglatas sa tubig, ug nakita sa propeta nga kalit kining milalom ug sa wala madugay nahimong suba nga iya lang malabang kon langoyon!

² Nahibaloan ni Ezequiel nga ang suba nag-agos paingon sa Patayng Dagat ug nag-ayo sa parat ug walay kinabuhi nga tubig niini dihang nasagolan sa tubig sa suba, maong nanaghan ang isda. Ug diha sa mga tampi, iyang nakita nga nanubo ang daghang kahoy nga lainlaig klase. Kada bulan, kini mamungag makapahimsog nga mga bunga ug magpatunghag mga dahon nga makapaayo. Pagkakita niini, seguradong ang kasingkasing ni Ezequiel nagmalinawon pag-ayo ug napunog paglaom. Pero unsay kahulogan niining bahina sa panan-awon sa templo para kaniya ug sa kauban niyang mga destiyero, o binihag? Ug unsay kahulogan niini para kanato karon?

Unsay Kahulogan sa Suba sa Panan-awon Para sa mga Destiyero?

3. Nganong ang mga Hudiyo sa karaang panahon wala maghunahuna nga literal ang suba sa panan-awon ni Ezequiel?

³ Ang mga Hudiyo sa karaang panahon seguradong wala maghunahuna nga literal ang suba diha sa panan-awon. Hinuon, kini nga bahin sa Kasulatan lagmit nagpahinumdom nila sa lain pang tagna sa pagpasig-uli, ang tagna nga girekord ni propetang Joel kapig duha ka siglo una pa niana. (Basaha ang Joel 3:18.) Dihang nabasa sa Hudiyong mga destiyero ang pulong ni Joel, wala sila maghunahuna nga ang kabukiran literal nga “magpatulo ug tam-is nga bino” o ang mga bungtod “magpaagos ug gatas”; wala pod sila maghunahuna nga naay tuboran nga mobugwak “gikan sa balay ni Jehova.” Sa susama, lagmit nasabtan sa mga Hudiyo nga ang mensahe sa panan-awon ni propetang Ezequiel wala magtumong sa literal nga suba.a Busa unsa ang mensahe ni Jehova? Ang Kasulatan nagtabang nato nga masabtan ang kahulogan sa ubang bahin niini nga panan-awon. Pero sa katibuk-an, atong hisgotan ang tulo ka klaro ug mahigugmaong pasalig nga atong makat-onan niini nga tagna.

4. (a) Unsang mga panalangin gikan kang Jehova ang lagmit gidahom sa mga Hudiyo tungod sa suba diha sa panan-awon ni Ezequiel? (b) Sa unsang paagi ang paggamit sa Bibliya sa mga pulong nga “suba” ug “tubig” nagpasalig nato nga panalanginan ni Jehova ang iyang katawhan? (Tan-awa ang kahong “Mga Suba sa mga Panalangin Gikan Kang Jehova.”)

⁴ Suba sa mga panalangin. Sa Bibliya, ang mga suba ug tubig sagad gigamit sa pag-ilustrar sa pag-agos sa mga panalangin ni Jehova nga makahatag ug kinabuhi. Si Ezequiel nakakita ug ingon niana nga suba nga nag-agos gikan sa templo, mao nga tungod sa panan-awon ang katawhan sa Diyos lagmit nagdahom nga ipaagos ni Jehova kanila ang makahatag ug kinabuhi nga espirituwal nga mga panalangin basta dili sila mobiya sa putling pagsimba. Unsa nga mga panalangin? Sila makadawat pag-usab ug espirituwal nga instruksiyon gikan sa mga saserdote. Ug kay puwede nang maghalad sa templo, makasalig na sab sila nga himoon ang pagtabon para sa ilang mga sala. (Ezeq. 44:15, 23; 45:17) Busa sila mahinlo pag-usab, samag nahugasan sa hinlong tubig gikan sa templo.

5. Sa unsang paagi ang suba sa panan-awon makawala sa mga kabalaka kon igo ba pirme ang panalangin para sa tanan?

⁵ Igo kaha pirme ang panalangin para sa tanan? Ang panan-awon makawala sa ingon niana nga mga kabalaka kay gipakita niini ang milagrosong pagdako sa tubig​—ang dagayday nahimong suba pag-abot lang ug mga dos kilometros! (Ezeq. 47:3-5) Ang mamuyo sa napasig-uling yuta sa mga Hudiyo lagmit modaghan, pero modaghan sab ang mga panalangin ni Jehova aron matagan-an ang ilang panginahanglan. Ang suba naghulagway sa kaabunda!

6. (a) Unsang makapadasig nga saad ang gihatag sa panan-awon? (b) Unsang pasidaan ang gihatag sab sa panan-awon? (Tan-awa ang footnote.)

⁶ Tubig nga makahatag ug kinabuhi. Sa panan-awon ni Ezequiel, ang suba miagos paingon sa Patayng Dagat ug naghatag ug kinabuhi sa dakong bahin niini. Matikdi nga ang tubig naghatag ug kinabuhi sa panonpanong isda nga ang mga klase parehas nianang sa Dakong Dagat, o Dagat Mediteranyo. Naa na ganiy mauswagong mga negosyo sa pangisda diha sa baybayon sa Patayng Dagat tali sa duha ka magkalagyo kaayo nga lungsod. Ang anghel miingon: “Ang tanan nga agosan sa sapa mabuhi.” Pero nagpasabot ba ni nga ang tubig gikan sa balay ni Jehova nakaabot sa tanang bahin sa Patayng Dagat? Wala. Ang anghel nag-ingon nga dunay kalamakan nga wala maabot sa nagahatag ug kinabuhi nga tubig. Kining mga lugara ‘nagpabiling asinon.’b (Ezeq. 47:8-11) Busa ang panan-awon naghatag ug pasalig nga ang putling pagsimba makapabuhi sa katawhan, ug sila mouswag. Pero naghatag sab nig pasidaan: Dili tanan ang modawat sa mga panalangin ni Jehova; dili tanan ang maulian.

7. Ang mga kahoy sa mga tampi diha sa panan-awon naghatag sa Hudiyong mga destiyero ug unsang pasalig?

⁷ Mga kahoy nga makahatag ug pagkaon ug makapaayo. Komosta man ang mga kahoy sa mga tampi? Dili ba nakadugang kini sa kanindot sa hulagway diha sa panan-awon? Nakadugang sab ni sa kahulogan niini. Si Ezequiel ug ang iyang mga isigka-Hudiyo seguradong nalipayng naghunahuna sa lami nga mga bunga sa maong mga kahoy, nga mapupo kada bulan! Kining nindot nga hulagway dugang nagpasalig nila nga pakaonon sila ni Jehova sa espirituwal. Ug unsa pa? Matikdi nga ang mga dahon sa mga kahoy “magsilbing tambal.” (Ezeq. 47:12) Si Jehova nahibalo nga mas labawng gikinahanglan sa namalik nga mga destiyero ang espirituwal nga pagpang-ayo, ug siya misaad nga iya kanang itagana. Gihisgotan sa ubang tagna sa pagpasig-uli kon giunsa niya kana paghimo, nga atong nakat-onan sa Kapitulo 9 niini nga publikasyon.

8. Unsay nagpakita nga ang panan-awon ni Ezequiel dunay mas dakong katumanan?

⁸ Pero sumala sab sa atong nahisgotan sa Kapitulo 9, limitado lang nga katumanan sa maong mga tagna ang naeksperyensiyahan sa namalik nga mga destiyero. Ang katawhan mismo ang hinungdan niana. Unsaon man ni Jehova pagpanalangin kanila sa bug-os nga balikbalik man silang naghimog daotan, misupak niya, ug nagpasagad sa putling pagsimba? Ang matinumanong mga Hudiyo nasakitan ug nadismaya sa gihimo sa ilang isigka-Hudiyo. Pero nahibalo ang maunongong mga magsisimba ni Jehova nga dili gyod mapakyas ang iyang mga saad; matuman gyod ni. (Basaha ang Josue 23:14.) Busa ang panan-awon ni Ezequiel dunay mas dakong katumanan. Pero kanus-a?

Ang Suba Nagaagos Karon!

9. Kanus-a mahitabo ang mas dakong katumanan sa panan-awon ni Ezequiel bahin sa templo?

⁹ Sa ato nang nahibaloan sa Kapitulo 14 niini nga publikasyon, ang panan-awon ni Ezequiel bahin sa templo dunay mas dakong katumanan sa “kaulahiang bahin sa mga adlaw,” dihang ang putling pagsimba mas nabayaw pa kay sukad masukad. (Isa. 2:2) Sa unsang paagi kini nga bahin sa panan-awon ni Ezequiel nagakatuman karon?

10, 11. (a) Unsang mga panalangin ang nag-agos kanato karon samag suba? (b) Sa unsang paagi ang nag-agos nga mga panalangin ni Jehova midako sa pagtagana sa nagkadakong panginahanglan sa kataposang mga adlaw?

¹⁰ Suba sa mga panalangin. Ang tubig nga nagaagos gikan sa balay ni Jehova nagpahinumdom nato sa unsang mga panalangin karon? Kini nagpahinumdom gyod nato sa tanang nakaamot sa atong espirituwal nga kahimsog ug katagbawan. Ang kinalabwan niini mao ang gahom sa halad lukat sa Kristo sa paghinlo kanato, nga nagpaposible nga mapasaylo ang atong mga sala. Ang putli nga mga kamatuoran sa Pulong sa Diyos gipakasama sab sa tubig nga nagahatag ug kinabuhi ug nagahinlo. (Efe. 5:25-27) Sa unsang paagi ang maong mga panalangin nag-agos sa atong panahon?

¹¹ Sa 1919, pipila lang ka libo ang mga alagad ni Jehova, ug nalipay sila pag-ayo sa pagdawat sa espirituwal nga pagkaon nga ilang gikinahanglan. Sa misunod nga mga dekada, sila padayong midaghan. Karon, ang katawhan sa Diyos kapin na sa walo ka milyon. Mikusog pod ba ang agos sa hinlong mga tubig sa kamatuoran? Oo! Daghan kaayo ang kamatuoran sa Bibliya nga gipatin-aw kanato. Binilyong Bibliya, libro, magasin, brosyur, ug tract ang miagos sa katawhan sa Diyos sa miaging siglo. Sama sa suba nga nakita ni Ezequiel sa panan-awon, ang nag-agos nga tubig sa putling mga kamatuoran kalit nga midako aron matagan-an ang nagkadakong panginahanglan sa mga tawo sa tibuok kalibotan nga giuhaw sa espirituwal. Dugay na tang nag-imprentag mga publikasyon nga binase sa Bibliya. Ug karon, pinaagi sa website nga jw.org, ang maong mga publikasyon mabatonan na online o ma-download sa kapig 900 ka pinulongan! Sa unsang paagi ang maong mga tubig sa kamatuoran nakaapektar sa mga tawo nga matarong ug kasingkasing?

12. (a) Sa unsang paagi ang mensahe sa kamatuoran nakahatag ug kinabuhi ug kahimsog sa mga tawo sa espirituwal nga paagi? (b) Unsang haom sa panahon nga pasidaan ang gihatag sa panan-awon kanato karon? (Tan-awa sab ang footnote.)

¹² Tubig nga makahatag ug kinabuhi. Si Ezequiel giingnan: “Ang tanan nga agosan sa sapa mabuhi.” Hunahunaa kon sa unsang paagi ang mensahe sa kamatuoran miagos ngadto sa tanang miadto sa atong napasig-uling espirituwal nga yuta. Ang mga kamatuoran sa Bibliya naghatag ug kinabuhi ug espirituwal nga kahimsog sa minilyon nga madinawaton ug kasingkasing. Pero ang panan-awon naghatag sab ug haom sa panahon nga pasidaan: Dili tanan ang padayong modawat sa maong kamatuoran. Sama sa kalamakan ug yanangong mga dapit sa Patayng Dagat sa panan-awon ni Ezequiel, dunay mga kasingkasing nga nahimong dili madinawaton, nga dili na modawat ug mopadapat sa kamatuoran.c Hinaot dili na mahitabo nato!​—Basaha ang Deuteronomio 10:16-18.

13. Unsang mga leksiyon ang atong makat-onan gikan sa mga kahoy sa panan-awon?

¹³ Mga kahoy nga makahatag ug pagkaon ug makapaayo. Ang mga kahoy ba diha sa mga tampi sa suba nga nakita sa panan-awon dunay makapadasig nga mga leksiyon kanato karon? Oo! Hinumdomi, ang maong mga kahoy nagpatunghag laming mga bunga kada bulan, ug ang mga dahon niini makapaayo. (Ezeq. 47:12) Busa ang mga kahoy magpahinumdom nato nga ang Diyos nga atong gialagaran dagayang nagpakaon nato ug nag-ayo nato sa pinakaimportanteng paagi​—sa espirituwal. Karon ang kalibotan masakiton ug gigutom pag-ayo sa espirituwal. Sa kasukwahi, hunahunaa kon unsay gitagana ni Jehova. Nakasulay na ba ka nga human nimo mabasa ang usa ka artikulo sa atong magasin, makanta ang kataposang awit sa asembliya o kombensiyon, o matan-aw ang usa ka video o broadcasting, mibati ka nga panalangin kaayo ang maong espirituwal nga pagkaon? Buhong gyod kaayo ta. (Isa. 65:13, 14) Ang ato bang espirituwal nga pagkaon nagpahimsog kanato sa espirituwal? Ang maayong tambag nga atong madawat, nga gibase gyod sa Pulong sa Diyos, makatabang nato sa paglikay sa mga sala sama sa imoralidad, kahakog, ug kawalay pagtuo. Si Jehova naghimo sab ug kahikayan sa pagtabang sa mga Kristohanon nga maulian sa espirituwal nga sakit nga resulta sa seryosong sala. (Basaha ang Santiago 5:14.) Gipanalanginan gyod ta pag-ayo, sumala sa gipakita sa mga kahoy diha sa panan-awon ni Ezequiel.

14, 15. (a) Unsang leksiyon ang atong makat-onan sa wala maulii nga kalamakan sa panan-awon ni Ezequiel? (b) Sa unsang paagi nakabenepisyo ta sa suba diha sa panan-awon ni Ezequiel?

¹⁴ Duna pod tay makat-onan sa wala maulii nga kalamakan. Dili gyod nato gustong pugngan ang pag-agos sa mga panalangin ni Jehova sa atong kinabuhi. Delikado kaayo kon magpabilin tang wala maulii, parehas sa daghang tawo niining masakiton nga kalibotan. (Mat. 13:15) Hinuon, malipay ta nga makabenepisyo sa suba sa mga panalangin. Dihang moinom tag maayo sa hinlong tubig sa kamatuoran gikan sa Pulong sa Diyos, dihang ipaambit nato sa uban ang maong mga kamatuoran pinaagi sa pagsangyaw, dihang makadawat tag mahigugmaong giya, paghupay, ug tabang gikan sa mga ansiyano nga gibansay sa matinumanong ulipon, atong hunahunaon ang suba sa panan-awon ni Ezequiel. Kana nga suba maghatag ug kinabuhi ug mag-ayo sa tanang agosan niana!

¹⁵ Pero unsay umaabot nga katumanan niini nga suba? Sa ato unyang makita, ang kinakusgang pag-agos sa suba mahitabo sa Paraiso sa umaabot.

Kon Unsay Kahulogan sa Panan-awon Didto sa Paraiso

16, 17. (a) Sa unsang paagi ang tubig sa kinabuhi mas modako pa gyod didto sa Paraiso? (b) Sa Paraiso, unsang benepisyo ang ikahatag kanato sa suba sa mga panalangin?

¹⁶ Ma-imagine ba nimo ang imong kaugalingon sa Paraiso, kauban ang imong mga higala ug pamilya, nga tagbaw kaayo sa kinabuhi? Ang pagtuon sa suba sa panan-awon ni Ezequiel makatabang nga mas klaro nimong makita ang imong kaugalingon didto. Sa unsang paagi? Tagda pag-usab ang tulo ka klaro ug mahigugmaon nga bahin sa panan-awon.

¹⁷ Suba sa mga panalangin. Ang simbolikong suba mas modako pa gyod didto sa Paraiso, kay ang benepisyo niini dili lang espirituwal kondili pisikal sab. Panahon sa Usa ka Libo ka Tuig nga Pagmando ni Jesus, ang Gingharian sa Diyos motabang sa mga matinumanon nga makabenepisyo sa lukat sa mas dako pang paagi. Anam-anam silang hingpiton! Wala nay sakit, doktor, nars, ospital, o health insurance! Ang maong tubig sa kinabuhi moagos sa minilyong maluwas sa Armagedon, “usa ka dakong panon” nga makalabang sa “dakong kasakitan.” (Pin. 7:9, 14) Pero kana nga pagsugod sa agos sa suba sa mga panalangin, bisan tuod makapahingangha, dagayday lang kon itandi sa mahitabo sa ulahi. Sama diha sa panan-awon ni Ezequiel, ang suba modako aron matagan-an ang mas dakong panginahanglan.

18. Sa unsang paagi ang “suba sa tubig sa kinabuhi” mas mokusog pa gyod panahon sa Milenyo?

¹⁸ Tubig nga makahatag ug kinabuhi. Sa Milenyo, ang pag-agos sa “suba sa tubig sa kinabuhi” mas mokusog pa gyod. (Pin. 22:1) Milyonmilyon, bilyonbilyon pa gani, ang banhawon ug hatagag kahigayonan nga mabuhi sa walay kataposan sa Paraiso! Apil sa mga panalangin ni Jehova pinaagi sa Gingharian ang pagbanhaw sa daghan kaayong patay, mga tawo nga dugay nang nahimong abog sa yuta. (Isa. 26:19) Pero ang tanan bang mabanhaw mabuhi sa walay kataposan?

19. (a) Unsay nagpakita nga dunay bag-ong mga tubig sa balaang kamatuoran nga mabatonan sa Paraiso? (b) Unsay gipasabot sa pag-ingon nga sa umaabot ang uban “magpabiling asinon”?

¹⁹ Ang matag usa kinahanglang mopili. Sa pagkatinuod, naay bag-ong linukot nga mga basahon nga buksan nianang panahona. Busa ang makarepresko nga tubig gikan kang Jehova maglakip sa bag-ong napadayag nga mga kamatuoran, bag-ong espirituwal nga mga instruksiyon. Dili ba makapahinam kanang hunahunaon? Bisan pa niana, ang uban mobalibad sa maong panalangin ug mopili nga supakon si Jehova. Ang uban lagmit morebelde panahon sa Milenyo, pero dili sila tugotan nga mohimog kadaot sa Paraiso. (Isa. 65:20) Lagmit mahinumdoman nato ang panan-awon ni Ezequiel ug mahunahunaan ang kalamakan nga nagpabiling wala maulii, nga ‘nagpabiling asinon.’ Dili gyod maalamon ang mga gahig ulo nga dili moinom sa bililhong tubig sa kinabuhi! Human sa Milenyo, dunay mga rebelde nga modapig kang Satanas. Ang tanang mosalikway sa matarong nga pagmando ni Jehova usa ray dangatan: kamatayon hangtod sa hangtod.​—Pin. 20:7-12.

20. Unsang kahikayan sa Milenyo nga para sa atong kaayohan ang magpahinumdom kanato sa mga kahoy nga nakita ni Ezequiel?

²⁰ Mga kahoy nga makahatag ug pagkaon ug makapaayo. Dili gusto ni Jehova nga naay bisan kinsa nato nga dili makadawat ug kinabuhing dayon. Aron tabangan tang dili mawad-an niana nga kahigayonan nga iyang gitanyag, seguroon na sab niya nga dunay kahikayan nga sama nianang mga kahoy nga nakita ni Ezequiel. Pero sa Paraiso, ang benepisyo nga ihatag ni Jehova maoy pisikal ug espirituwal. Sa langit, si Jesu-Kristo ug ang kauban niyang 144,000 magmando ingong mga hari panahon sa Milenyo. Ingong mga saserdote, ipadapat sa 144,000 ang mga benepisyo sa halad lukat sa Kristo, nga magtabang sa matinumanong mga tawo nga mahimong hingpit. (Pin. 20:6) Kini nga kahikayan sa pisikal ug espirituwal nga pagpang-ayo magpahinumdom nato niadtong mga kahoy nga nakita ni Ezequiel sa mga tampi sa suba, mga kahoy nga dunay makapahimsog nga bunga ug makapaayo nga dahon. Ang panan-awon ni Ezequiel susama sa nindot nga tagna nga gisulat ni apostol Juan. (Basaha ang Pinadayag 22:1, 2.) Ang mga dahon sa mga kahoy nga nakita ni Juan maoy “tambal alang sa kanasoran.” Ang milyonmilyon nga matinumanong tawo makabenepisyo sa pag-alagad sa 144,000 ingong saserdote.

21. Sa unsang paagi ang pagpamalandong sa suba diha sa panan-awon ni Ezequiel nakaapektar kanimo, ug unsay sunod natong hisgotan? (Tan-awa ang kahong “Ang Dagayday Nahimong Suba!”)

²¹ Samtang gipamalandong nimo ang suba nga nakita ni Ezequiel, dili ba ang imong kasingkasing nagmalinawon pag-ayo ug napunog paglaom? Pagkanindot sa atong umaabot! Ug hunahunaa ra​—libolibo ka tuig kanhi, si Jehova naghatag natog daghang tagna aron tabangan ta nga ma-imagine kon unsa ang Paraiso, ug siya mapailobong nag-imbitar nato nga maatua didto aron makita ang dakong katumanan, ang katinuoran nga gisaad sa mga tagna. Tua ba unya ka didto? Tingali maghunahuna ka kon naa ba gyod kay lugar sa Paraiso. Atong hisgotan sa sunod kon sa unsang paagi ang kataposang bahin sa tagna ni Ezequiel naghatag natog pasalig.

1, 2. (a) Unsay gisugo ni Jehova kang Ezequiel? (b) Unsang mga pangutana ang atong hisgotan?

BAG-O pang nakakita si Ezequiel ug panan-awon nga lagmit nakapahunahuna niya sa panghitabo halos 900 ka tuig kanhi sa panahon ni Moises ug Josue. Niadtong panahona, gisulti ni Jehova kang Moises ang mga utlanan sa Yutang Saad ug sa ulahi Iyang giingnan si Josue kon unsaon pagbahinbahin ang yuta ngadto sa mga tribo sa Israel. (Num. 34:1-15; Jos. 13:7; 22:4, 9) Pero karon, sa tuig 593 B.C.E., gisugo ni Jehova si Ezequiel ug ang iyang kaubang mga destiyero, o binihag, nga bahinbahinon pag-usab ang Yutang Saad ngadto sa mga tribo sa Israel!​—Ezeq. 45:1; 47:14; 48:29.

² Unsay mensahe niini nga panan-awon para kang Ezequiel ug sa iyang kaubang mga destiyero? Nganong makapadasig kini nga panan-awon para sa katawhan sa Diyos karon? Duna ba niy mas dakong katumanan sa umaabot?

Panan-awon nga Dunay Upat ka Pasalig

3, 4. (a) Unsang upat ka pasalig ngadto sa mga destiyero ang gihatag sa kataposang panan-awon ni Ezequiel? (b) Niini nga kapitulo, unsang pasalig ang atong susihon?

³ Ang kataposang panan-awon nga nadawat ni Ezequiel mabasa sa siyam ka kapitulo sa iyang basahon. (Ezeq. 40:1–48:35) Naghatag ni sa mga destiyero ug upat ka makapadasig nga pasalig bahin sa napasig-uling nasod sa Israel. Unsa ang maong mga pasalig? Una, ang putling pagsimba ipasig-uli diha sa templo sa Diyos. Ikaduha, ang matarong nga mga saserdote ug mga magbalantay manguna sa napasig-uling nasod. Ikatulo, ang tanang mobalik sa Israel makadawat ug panulondon nga yuta. Ug ikaupat, si Jehova mag-uban kanila, nga magpuyo pag-usab uban kanila.

⁴ Ang kapitulo 13 ug 14 niini nga publikasyon naghisgot kon sa unsang paagi ang unang duha ka pasalig​—ang pagpasig-uli sa matuod nga pagsimba ug ang pagpanguna sa matarong nga mga magbalantay—​matuman. Niini nga kapitulo, magpokus ta sa ikatulong pasalig, ang saad bahin sa panulondon nga yuta. Sa sunod nga kapitulo, hisgotan nato ang saad bahin sa presensiya ni Jehova.​—Ezeq. 47:13-21; 48:1-7, 23-29.

“Kining Yutaa . . . Gibahinbahin Kaninyo Ingong Panulondon”

5, 6. (a) Sa panan-awon ni Ezequiel, unsang teritoryo ang bahinbahinon? (Tan-awa ang hulagway sa sinugdan sa kapitulo.) (b) Unsay katuyoan sa panan-awon sa pagbahinbahin sa yuta?

⁵ Basaha ang Ezequiel 47:14. Sa panan-awon, gipakita ni Jehova kang Ezequiel ang usa ka luna sa yuta nga hapit nang mahisama sa “tanaman sa Eden.” (Ezeq. 36:35) Unya si Jehova miingon: “Kini ang teritoryo nga inyong bahinbahinon ingong yuta nga panulondon sa 12 ka tribo sa Israel.” (Ezeq. 47:13) “Ang teritoryo” nga bahinon mao ang napasig-uling yuta sa Israel diin mamalik ang mga destiyero. Dayon, sumala sa narekord sa Ezequiel 47:15-21, gidetalye ni Jehova ang eksaktong mga utlanan sa tibuok yuta.

⁶ Unsay katuyoan niining panan-awon sa pagbahinbahin sa yuta? Ang deskripsiyon sa eksaktong pagkasukod nga mga utlanan nagpasalig kang Ezequiel ug sa iyang kaubang mga destiyero nga ipasig-uli gyod ang ilang minahal nga yuta. Hunahunaa kon sa unsang paagi ang maong pasalig gikan kang Jehova, nga gisulti niya sa detalyadong paagi, nakapadasig gayod sa kasingkasing sa mga destiyero! Nakadawat ba gyod ang katawhan sa Diyos sa karaang panahon ug yuta nga gibahinbahin kanila ingong panulondon? Oo.

7. (a) Unsang mga hitabo ang nagsugod niadtong 537 B.C.E., ug unsay gipahinumdom niini kanato? (b) Unsang pangutana ang hisgotan una nato?

⁷ Sa 537 B.C.E., mga 56 ka tuig human madawat ni Ezequiel kini nga panan-awon, linibo ka destiyero ang misugod pagbalik sa yuta sa Israel ug gipanag-iya kini. Ang maong talagsaong mga hitabo dugay na kanhi nagpahinumdom nato sa parehas nga kaugmaran nga nagakahitabo sa katawhan sa Diyos sa modernong panahon. Sila daw nakadawat sab ug bahin nga yuta. Sa unsang paagi? Gitugot ni Jehova nga ang iyang mga alagad makasulod sa espirituwal nga yuta ug makapanag-iya niini. Tungod niana, ang pagpasig-uli sa karaang Yutang Saad daghag matudlo kanato bahin sa pagpasig-uli sa espirituwal nga yuta sa katawhan sa Diyos karon. Pero sa dili pa nato hisgotan kining tulo ka leksiyon, tubagon una nato ang pangutanang, “Nganong makaingon ta nga naa gyoy espirituwal nga yuta karon?”

8. (a) Unsa nga nasod ang gipuli ni Jehova sa nasod sa mga Israelinhon? (b) Unsa ang espirituwal nga yuta, o paraiso? (c) Kanus-a kini nagsugod paglungtad, ug kinsay nagpuyo niini?

⁸ Sa nag-unang panan-awon nga gihatag kang Ezequiel, gipakita ni Jehova nga ang mga tagna bahin sa pagpasig-uli sa Israel dunay mas dakong katumanan human nga ang iyang “alagad nga si David,” si Jesu-Kristo, magsugod sa pagmando ingong Hari. (Ezeq. 37:24) Kana nahitabo niadtong 1914 C.E. Niadtong panahona, ang nasod sa mga Israelinhon dugay nang gipulihan ingong katawhan sa Diyos ug ang gipuli mao ang nasod sa espirituwal nga mga Israelinhon, ang dinihogan sa espiritu nga mga Kristohanon. (Basaha ang Mateo 21:43; 1 Pedro 2:9.) Pero gawas nga ang nasod sa Israel gipulihan ni Jehova ug espirituwal nga nasod, ang pisikal nga yuta sa Israel gipulihan sab niya ug espirituwal nga yuta, o paraiso. (Isa. 66:8) Sumala sa atong nakat-onan sa Kapitulo 17 niini nga publikasyon, ang espirituwal nga yuta mao ang kahimtang, o paagi sa pagkinabuhi, nga dunay kasegurohan ug kadagaya sa espirituwal, diin ang nanghibilin sa mga dinihogan nagsimba kang Jehova sukad sa 1919. (Tan-awa ang kahong 9B, “Nganong 1919?”) Paglabay sa panahon, kadtong dunay yutan-ong paglaom, ang “ubang mga karnero,” misugod sab pagpuyo niining espirituwal nga yuta. (Juan 10:16) Bisag ang espirituwal nga paraiso nagakauswag ug nagkadako karon, ang mga panalangin niini bug-os lang nga matagamtam human sa Armagedon.

Parehas ug Eksakto nga Pagbahinbahin sa Yuta

9. Unsang detalyadong instruksiyon ang gihatag ni Jehova bahin sa pagbahinbahin sa yuta?

⁹ Basaha ang Ezequiel 48:1, 28. Human isulti ang mga utlanan sa yuta, gidetalye ni Jehova kon unsaon pagbahinbahin ang yuta. Gisugo niya nga ang yuta bahinon ngadto sa 12 ka panulondon sa mga tribo nga ang sukod parehas ug eksakto gikan sa amihanan ngadto sa habagatan, sugod sa tribo ni Dan sa amihanang tumoy sa yuta hangtod sa tribo ni Gad sa tumoy nga habagatang utlanan. Ang teritoryo sa matag usa sa 12 ka panulondon maoy gikan sa sidlakang utlanan sa yuta ngadto sa Dakong Dagat, o sa Dagat Mediteranyo, sa kasadpan.​—Ezeq. 47:20.

10. Unsang mga pasalig ang lagmit gihatag niining bahina sa panan-awon ngadto sa mga destiyero?

¹⁰ Unsang mga pasalig ang lagmit gihatag niining bahina sa panan-awon ngadto sa mga destiyero? Ang detalyadong impormasyon nga gisulti ni Ezequiel bahin sa pagbahinbahin sa yuta seguradong nakapahunahuna sa mga destiyero nga ang pagbahinbahin sa yuta organisado kaayo nga proyekto. Dugang pa, ang eksakto nga pagkabahin sa yuta ngadto sa tanang 12 ka tribo nagpasiugda nga ang matag usa sa namalik nga mga destiyero makadawat gyod ug panulondon sa napasig-uling yuta. Walay mobalik nga dili makabaton ug yuta o puy-anan.

11. Unsang mga leksiyon ang atong makat-onan sa panan-awon sa pagbahinbahin sa yuta? (Tan-awa ang kahong “Ang Pagbahinbahin sa Yuta.”)

¹¹ Unsang makapalig-on nga mga leksiyon ang atong makat-onan karon niini nga panan-awon? Ang napasig-uling Yutang Saad dunay lugar dili lang para sa mga saserdote, Levihanon, ug pangulo kondili sa tanang ubang membro sab sa 12 ka tribo. (Ezeq. 45:4, 5, 7, 8) Karon sab, ang espirituwal nga paraiso dunay lugar dili lang para sa dinihogang nanghibilin ug niadtong sakop sa “dakong panon” nga mga nagapanguna kondili sa tanang ubang membro sab sa dakong panon.a (Pin. 7:9) Bisan unsa pa ka gamay ang atong papel sa organisasyon, duna gyod tay lugar ug bililhong asaynment sa espirituwal nga yuta. Pagkamakapalig-on nga pasalig!

Duha ka Dakong Kalainan—Unsay Kahulogan Niini Kanato?

12, 13. Unsang espesipikong mga instruksiyon ang gihatag ni Jehova bahin sa pagbahinbahin sa yuta ngadto sa mga tribo?

¹² Ang ubang instruksiyon ni Jehova sa pagbahinbahin sa yuta lagmit nakapalibog kang Ezequiel kay lahi kini sa gihatag sa Diyos kang Moises. Matikdi ang duha ka kalainan. Ang usa maoy bahin sa yuta; ug ang lain, bahin sa mga molupyo niini.

¹³ Una, ang yuta. Si Moises giingnan nga ang yuta nga ihatag ngadto sa dagkong tribo mas dako kay sa gagmayng tribo. (Num. 26:52-54) Pero sa panan-awon ni Ezequiel, espesipikong nagsugo si Jehova nga hatagan ang tanang tribo ug “parehong bahin [“ang matag usa sama sa iyang igsoon,” footnote].” (Ezeq. 47:14) Busa ang distansiya gikan sa amihanang utlanan ngadto sa habagatang utlanan sa matag panulondon kinahanglang pareho ra para sa tanang 12 ka tribo. Ang tanang Israelinhon​—bisag unsa pay ilang tribo—​patas nga makapahimulos sa daghan kaayong abot nga ikahatag sa Yutang Saad nga abundag tubig.

14. Sa unsang paagi ang mga instruksiyon ni Jehova bahin sa langyawng mga residente lahi nianang sa Moisesnong Balaod?

¹⁴ Ikaduha, ang mga molupyo. Ang Moisesnong Balaod nanalipod sa mga langyaw ug nagtugot kanila nga makigbahin sa pagsimba kang Jehova, pero wala silay bahin sa yuta. (Lev. 19:33, 34) Apan ang gisulti ni Jehova kang Ezequiel lahi sa Iyang gihisgotan sa Balaod. Gisugo siya ni Jehova: “Hatagan ninyog panulondon ang langyawng residente diha sa teritoryo sa tribo diin siya nagpuyo.” Pinaagi nianang sugoa, gihanaw ni Jehova ang dakong kalainan sa “lumad nga mga Israelinhon” ug sa langyawng mga residente sa yuta. (Ezeq. 47:22, 23) Sa napasig-uling yuta nga nakita ni Ezequiel sa panan-awon, iyang naobserbahan nga ang mga molupyo niini patas ug nagkahiusa sa pagsimba.​—Lev. 25:23.

15. Unsang dili mausab nga kamatuoran bahin kang Jehova ang napamatud-an sa iyang mga instruksiyon bahin sa yuta ug sa mga molupyo niini?

¹⁵ Kining duha ka lahi kaayong instruksiyon nga nadawat ni Ezequiel bahin sa yuta ug sa mga tawo niini seguradong nakapalig-on sa mga destiyero. Nahibalo sila nga hatagan sila ni Jehova ug parehas nga bahin, lumad man sila nga Israelinhon o langyaw nga nagsimba kang Jehova. (Esd. 8:20; Neh. 3:26; 7:6, 25; Isa. 56:3, 8) Kini nga mga instruksiyon nagpamatuod sab sa makapadasig ug dili mausab nga kamatuoran nga para kang Jehova, ang tanan niyang alagad parehas nga bililhon. (Basaha ang Haggeo 2:7.) Karon, langitnon man o yutan-on ang atong paglaom, gipabilhan nato ang maong kamatuoran.

16, 17. (a) Sa unsang paagi ta nakabenepisyo sa paghisgot sa mga detalye bahin sa yuta ug sa mga molupyo niini? (b) Unsay atong hisgotan sa sunod nga kapitulo?

¹⁶ Sa unsang paagi nakabenepisyo ta sa paghisgot sa mga detalye bahin sa yuta ug sa mga molupyo niini? Napahinumdoman ta nga ang pagkapatas ug panaghiusa angay nga klarong makita sa atong tibuok kalibotang panag-igsoonay karon. Si Jehova dili mapihigon. Angay natong pangutan-on ang atong kaugalingon: ‘Gisundog ba nako ang pagkadili-mapihigon ni Jehova? Gipakitaan ba nakog sinserong pagtahod ang matag isigkamagsisimba, bisag unsa pay iyang rasa o kahimtang sa kinabuhi?’ (Roma 12:10) Nalipay ta pag-ayo nga gitugot ni Jehova nga kitang tanan patas nga makapahimulos sa espirituwal nga paraiso, diin tibuok kalag tang makahatag ug sagradong pag-alagad sa atong langitnong Amahan ug makatagamtam sa iyang mga panalangin.​—Gal. 3:26-29; Pin. 7:9.

¹⁷ Hisgotan nato karon ang ikaupat nga pasalig nga gihatag sa pangataposang bahin sa kataposang panan-awon ni Ezequiel​—ang saad nga si Jehova mag-uban sa mga destiyero. Unsang mga leksiyon ang atong makat-onan niana nga saad? Matubag kana sa sunod nga kapitulo.

1, 2. (a) Unsang espesyal nga luna sa yuta ang ilain? (Tan-awa ang hulagway sa hapin.) (b) Unsang pasalig ang gihatag niini nga panan-awon para sa mga destiyero?

SA KATAPOSANG panan-awon ni Ezequiel, iyang nahibaloan ang bahin sa luna sa yuta nga ilain para sa espesyal nga katuyoan. Ang ilain nga luna itanyag, dili ingong panulondon sa usa ka tribo sa mga Israelinhon, kondili ingong amot para kang Jehova. Nahibaloan pod ni Ezequiel ang bahin sa talagsaong siyudad nga makapainteres ug ngalan. Kining bahina sa panan-awon naghatag sa mga destiyero, o binihag, ug importante kaayong pasalig: Si Jehova mag-uban nila sa ilang pagbalik sa ilang minahal nga yutang natawhan.

² Gihatagan ta ni Ezequiel ug detalyadong impormasyon bahin niini nga amot. Susihon nato kini nga asoy, nga dakog kahulogan para nato ingong matuod nga mga magsisimba ni Jehova.

‘Ang Balaang Amot Uban ang Siyudad’

3. Unsa ang lima ka bahin sa yuta nga gilain ni Jehova, ug unsay katuyoan sa maong mga bahin? (Tan-awa ang kahong “Ang Amot nga Inyong Ilain.”)

³ Ang espesyal nga luna sa yuta dunay sukod nga 25,000 ka maniko (13 kilometros) gikan sa amihanan ngadto sa habagatan ug 25,000 ka maniko gikan sa sidlakan ngadto sa kasadpan. Kining kuwadradong luna gitawag nga “ang tibuok nga amot.” Gibahin kini sa tulo ka seksiyon. Ang ibabaw nga seksiyon maoy para sa mga Levihanon, ug ang tunga nga seksiyon gilain para sa templo ug sa mga saserdote. Kining duha ka seksiyon mao ang “balaang amot.” Ang mas gamayng seksiyon sa ubos, o ang “nahibiling luna,” maoy “gamiton sa katawhan [o, “dili balaan,” footnote].” Para kini sa siyudad.​—Ezeq. 48:15, 20.

4. Unsay atong makat-onan sa asoy bahin sa amot para kang Jehova?

⁴ Unsang leksiyon ang atong makat-onan niini nga asoy bahin sa amot para kang Jehova? Kay giuna paglain ang luna para niining espesyal nga amot ayha pa ang para sa mga tribo, gipakita ni Jehova nga angayng hatagan ug pangunang importansiya kini nga luna sa yuta. (Ezeq. 45:1) Seguradong daghag nakat-onan ang mga destiyero niini nga paagi sa pagbahin sa luna. Kinahanglan nilang unahon sa ilang kinabuhi ang pagsimba kang Jehova. Karon, gihatagan sab natog pangunang importansiya ang espirituwal nga mga kalihokan, sama sa pagtuon sa Pulong sa Diyos, pagtambong sa mga tigom, ug pagpakigbahin sa pagsangyaw. Dihang sundogon nato ang ehemplo ni Jehova sa pagtakdag hustong mga prayoridad, atong gipakita nga ang atong adlaw-adlawng kinabuhi nasentro sa pag-alagad kaniya.

“Anaa sa Tunga Niini ang Siyudad”

5, 6. (a) Kinsay nanag-iya sa siyudad? (b) Sa unsa wala magtumong ang siyudad, ug ngano?

⁵ Basaha ang Ezequiel 48:15. Unsay atong makat-onan sa “siyudad” ug sa palibot nga luna niini? (Ezeq. 48:16-18) Niini nga panan-awon, giingnan ni Jehova si Ezequiel: “Ang gipanag-iya sa siyudad . . . maiya sa tibuok panimalay ni Israel.” (Ezeq. 45:6, 7) Busa ang siyudad ug ang palibot nga luna niini dili apil sa “balaang amot” nga “ilain alang kang Jehova.” (Ezeq. 48:9) Hinumdoman nato kini nga kalainan samtang atong susihon kon unsay mahimong itudlo kanato karon sa kahikayan niini nga siyudad.

⁶ Aron mahibaloan ang mga leksiyon nga atong makat-onan sa siyudad, kinahanglang hisgotan una nato kon sa unsa dili mahimong magtumong ang siyudad. Dili kini mahimong magtumong sa gitukod pag-usab nga siyudad sa Jerusalem ug sa templo niini. Ngano? Kay ang siyudad nga nakita ni Ezequiel sa panan-awon walay templo. Ang siyudad wala sab magtumong sa ubang siyudad diha sa napasig-uling yuta sa Israel. Ngano? Kay ang namalik nga mga destiyero o ang ilang mga kaliwatan walay gitukod nga siyudad nga sama nianang giingon sa panan-awon. Dugang pa, ang siyudad wala magtumong sa langitnong siyudad. Ngano? Kay kini gitukod diha sa yuta nga “dili balaan,” lahi sa mga tinukod nga gitukod diha sa luna nga gilain para sa sagradong pagsimba.​—Ezeq. 42:20.

7. Unsa ang siyudad nga nakita ni Ezequiel, ug unsay lagmit girepresentahan niini? (Tan-awa ang hulagway sa sinugdan sa kapitulo.)

⁷ Busa unsa man ang siyudad nga nakita ni Ezequiel? Hinumdomi nga iyang nakita ang siyudad diha sa mao rang panan-awon diin nakita niya ang yuta. (Ezeq. 40:2; 45:1, 6) Gipakita sa Pulong sa Diyos nga ang yuta nagtumong sa espirituwal nga yuta, busa ang siyudad lagmit nagtumong sa espirituwal nga siyudad. Sa katibuk-an, unsay ideya sa pulong nga “siyudad”? Kining pulonga naghatag ug ideya bahin sa mga tawo nga nagpuyo ingong grupo, nga dunay kahikayan ug organisado. Busa ang organisado kaayong siyudad nga nakita ni Ezequiel​—nga kuwadrado ug porma​—lagmit nagtumong sa organisado kaayong sentro sa administrasyon.

8. Unsa ang sakop sa impluwensiya niini nga administrasyon, ug ngano?

⁸ Unsa ang sakop sa impluwensiya niini nga administrasyon? Gipakita sa panan-awon ni Ezequiel nga kining siyudara naglihok sulod sa espirituwal nga yuta. Busa kini nga administrasyon naglihok karon sulod sa espirituwal nga paraiso, nga nagdumala sa espirituwal nga kalihokan sa katawhan sa Diyos. Ug unsay gipakita sa impormasyon nga ang siyudad gitukod diha sa yuta nga gamiton sa katawhan, o yuta nga dili balaan? Kini nagpahinumdom nato nga ang siyudad nagtumong, dili sa langitnon, kondili sa yutan-on nga administrasyon, nga naglihok karon para sa kaayohan sa tanang nagpuyo sa espirituwal nga paraiso.

9. (a) Kinsay naglangkob niining yutan-ong administrasyon karon? (b) Unsay himoon ni Jesus panahon sa Milenyo?

⁹ Kinsay naglangkob niini nga yutan-ong administrasyon? Sa panan-awon ni Ezequiel, ang nanguna sa gobyerno sa siyudad gitawag ug “pangulo.” (Ezeq. 45:7) Siya ang nagdumala sa katawhan, pero dili siya saserdote o Levihanon. Kini nga pangulo makapahunahuna nato ilabina sa mga nagdumala sa kongregasyon nga dili dinihogan sa espiritu. Kining mapinanggaong espirituwal nga mga magbalantay nga sakop sa “ubang mga karnero” maoy mapainubsanon nga yutan-ong mga alagad sa langitnong gobyerno sa Kristo. (Juan 10:16) Sa umaabot nga Milenyo, si Jesus magpili ug magtudlog kuwalipikadong mga ansiyano, o “mga prinsipe,” sa “tibuok yuta.” (Sal. 45:16) Ubos sa paggiya sa langitnong Gingharian, sila mag-atiman sa kaayohan sa katawhan sa Diyos panahon sa Milenyo.

“Si Jehova Anaa Diha”

10. Unsay ngalan sa siyudad, ug unsay gipasalig niini?

¹⁰ Basaha ang Ezequiel 48:35. Ang ngalan sa siyudad maoy “Si Jehova Anaa Diha.” Kining ngalana nagpasalig nga anaa niini nga siyudad ang presensiya ni Jehova. Pinaagi sa pagpakita niining siyudad nga anaa sa sentrong lokasyon, samag giingnan ni Jehova ang mga destiyero: ‘Ako mag-uban kaninyo pag-usab!’ Makapadasig gyod kini nga pasalig!

11. Unsang mga leksiyon ang atong makat-onan sa siyudad nga nakita ni Ezequiel sa panan-awon ug sa ngalan niini nga punog kahulogan?

¹¹ Unsang mga leksiyon ang atong makat-onan niining bahina sa tagna ni Ezequiel? Ang ngalan niining samag siyudad nga administrasyon nagpasalig nato ingong mga alagad sa Diyos karon nga si Jehova nagpuyo uban sa iyang matinumanong mga alagad sa yuta karon ug sa kanunay. Kining ngalana nga punog kahulogan nagpasiugda sab ug importanteng kamatuoran: Ang siyudad naglungtad, dili aron hatagan ug gahom si bisan kinsang tawo, kondili aron ipatuman ang mahigugmaon ug makataronganon nga mga paagi ni Jehova. Pananglitan, wala hatagi ni Jehova ang administrasyon ug awtoridad sa pagbahin sa yuta, nga mao tingaliy isipon sa mga tawo nga angayng himoon. Hinuon, gidahom ni Jehova nga tahoron sa mga tigdumala ang mga bahin, o mga pribilehiyo, nga siya mismo ang naghatag sa iyang mga alagad, apil sa ubos nga mga tawo.​—Ezeq. 46:18; 48:29.

12. (a) Unsay makapainteres nga bahin niini nga siyudad, ug nag-ilustrar kini sa unsa? (b) Unsang importanteng pahinumdom ang gihatag niining bahina sa panan-awon ngadto sa Kristohanong mga tigdumala?

¹² Unsa pay laing makapainteres nga bahin sa siyudad nga ginganlag “Si Jehova Anaa Diha”? Ang karaang mga siyudad giprotektahag mga paril nga pipila rag ganghaan kon posible, pero kining siyudara lahi kay kini dunay 12 ka ganghaan! (Ezeq. 48:30-34) Kini nga gidaghanon sa ganghaan (tagtulo sa kada bahin o side sa kuwadradong siyudad) nagpakita nga ang mga tigdumala niini nga siyudad daling duolon ug naa kanunay para sa tanang alagad sa Diyos. Dugang pa, ang 12 ka ganghaan sa siyudad nagpasiugda nga kini abli para sa tanan, sa “tibuok panimalay ni Israel.” (Ezeq. 45:6) Ang kadaghan sa ganghaan sa siyudad ug ang kadali niining sudlon naghatag ug importanteng pahinumdom sa Kristohanong mga tigdumala. Gusto ni Jehova nga sila daling duolon ug naa kanunay para sa tanang nagpuyo sa espirituwal nga paraiso.

Ang Katawhan sa Diyos ‘Nanulod’ sa Pagsimba ug “Nag-alagad sa Siyudad”

13. Unsay gihisgotan ni Jehova bahin sa lainlaing matang sa pag-alagad nga himoon sa katawhan?

¹³ Mobalik ta sa panahon ni Ezequiel ug susihon nato ang dugang pang impormasyon nga iyang girekord bahin niining detalyadong panan-awon sa pagbahinbahin sa yuta. Si Jehova naghisgot ug katawhan nga naghimog lainlaing matang sa pag-alagad. Ang mga saserdote​—“mga alagad sa sangtuwaryo”—​magtanyag ug mga halad ug moduol kang Jehova sa pag-alagad kaniya. Ang mga Levihanon​—“mga alagad sa templo”—​‘mag-atiman sa mga buluhaton labot niini ug sa tanang butang nga angayng himoon sa sulod niini.’ (Ezeq. 44:14-16; 45:4, 5) Dugang pa, dunay mga magtrabaho duol sa siyudad. Kinsa kining mga magtrabaho?

14. Ang mga magtrabaho duol sa siyudad nagpahinumdom nato sa unsa?

¹⁴ Ang mga magtrabaho duol sa siyudad maggikan sa “tanang tribo sa Israel.” Sila dunay papel ingong tigsuportar. Ang ilang buluhaton mao ang pagpananom, nga ang abot “magtaganag pagkaon niadtong mga nag-alagad sa siyudad.” (Ezeq. 48:18, 19) Niini nga kahikayan, naa ba tay mahinumdoman nga kahigayonan nga bukas kanato karon? Oo. Karon, ang tanang molupyo sa espirituwal nga paraiso dunay kahigayonan sa pagsuportar sa pag-alagad sa dinihogang mga igsoon sa Kristo ug niadtong sakop sa “dakong panon” nga gitudlo ni Jehova sa pagpanguna. (Pin. 7:9, 10) Ang pangunang paagi nga kita nagsuportar mao ang kinabubut-ong pagsunod sa mga instruksiyon sa matinumanong ulipon.

15, 16. (a) Unsang laing detalye ang atong makuha sa panan-awon ni Ezequiel? (b) Unsang parehas nga mga buluhaton ang duna tay kahigayonan sa pagpakigbahin?

¹⁵ Duna pay laing detalye ang panan-awon ni Ezequiel nga atong kakuhaan ug leksiyon bahin sa atong ministeryo. Unsang detalye? Gihisgotan ni Jehova nga ang mga membro sa 12 ka dili Levihanong tribo mag-alagad diha sa duha ka lokasyon: sa hawanan sa templo ug sa sibsibanan sa siyudad. Unsay ilang buluhaton sa kada lokasyon? Sa hawanan sa templo, ang tanang tribo “manulod” aron sa pagsimba pinaagig pagtanyag ug mga halad kang Jehova. (Ezeq. 46:9, 24) Sa sibsibanan sa siyudad, ang mga membro sa tanang tribo moadto sa pagtikad niini aron suportahan ang siyudad. Unsay atong makat-onan sa ehemplo niining mga magtrabaho?

¹⁶ Karon, ang mga membro sa dakong panon dunay kahigayonan sa pagpakigbahin sa mga buluhaton nga parehas nianang sa panan-awon ni Ezequiel. Sila nagsimba kang Jehova “diha sa iyang templo” pinaagi sa pagtanyag ug mga halad sa pagdayeg. (Pin. 7:9-15) Ginahimo nila kana pinaagi sa pagpakigbahin sa pagsangyaw ug sa pagpahayag sa ilang pagtuo diha sa mga tigom pinaagig pagkomento ug pagkantag mga awit sa pagdayeg. Para nila, kini nga matang sa pagsimba kang Jehova mao ang ilang pinakaimportanteng responsibilidad. (1 Cron. 16:29) Dugang pa, daghan sa katawhan sa Diyos ang nagsuportar sa organisasyon sa Diyos sa daghang praktikal nga paagi. Pananglitan, sila nagtabang sa pagpanukod ug pagmentinar ug mga Kingdom Hall ug mga pasilidad sa sangang buhatan, ug sila nagtabang sa daghang ubang proyekto sa organisasyon ni Jehova. Ang uban nagsuportar niini nga mga proyekto pinaagig pinansiyal nga mga amot. Ilang ginahimo kanang tanan, nga samag pagtikad sa yuta, “alang sa kahimayaan sa Diyos.” (1 Cor. 10:31) Madasigon ug malipayon nilang ginahimo ang ilang mga buluhaton kay nahibalo sila nga si Jehova ‘malipay pag-ayo sa maong mga halad.’ (Heb. 13:16) Gipahimuslan ba nimog maayo kini nga mga kahigayonan?

“Dunay Bag-ong mga Langit ug Bag-ong Yuta nga Atong Gipaabot”

17. (a) Unsang mas dakong katumanan sa panan-awon ni Ezequiel ang atong makita sa umaabot? (b) Sa Milenyo, kinsay makabenepisyo sa samag siyudad nga administrasyon?

¹⁷ Sa umaabot, makakita ba tag mas dakong katumanan sa panan-awon ni Ezequiel bahin sa amot? Oo! Matikdi kini: Nakita ni Ezequiel nga ang luna nga gitawag ug “balaang amot” mao ang sentro sa yuta. (Ezeq. 48:10) Sa susama, human sa Armagedon, bisan asa man ta magpuyo sa yuta, si Jehova magpuyo uban nato. (Pin. 21:3) Sa Milenyo, ang samag siyudad nga administrasyon​—kadtong naa sa yuta nga itudlo sa pag-atiman sa kaayohan sa katawhan sa Diyos—​mas dako nag impluwensiya nga molukop sa tibuok kalibotan kay kini maghatag ug mahigugmaong giya ug instruksiyon sa tanang sakop sa “bag-ong yuta,” usa ka bag-ong tawhanong katilingban.​—2 Ped. 3:13.

18. (a) Nganong makaseguro ta nga ang samag siyudad nga administrasyon kaharmonya sa pagmando sa Diyos? (b) Unsang lig-ong pasalig ang gihatag kanato sa ngalan sa siyudad?

¹⁸ Nganong makaseguro ta nga ang samag siyudad nga administrasyon magpabiling bug-os nga kaharmonya sa pagmando sa Diyos? Kay giklaro sa Pulong sa Diyos nga ang yutan-ong siyudad nga may 12 ka ganghaan maoy repleksiyon sa langitnong siyudad nga may 12 ka ganghaan, ang Bag-ong Jerusalem, nga gilangkoban sa 144,000 ka kaubang magmamando sa Kristo. (Pin. 21:2, 12, 21-27) Gipakita niini nga ang yutan-ong administrasyon mosunod sa tanang desisyon nga himoon sa Gingharian sa Diyos sa langit ug magpatuman niana. Oo, ang ngalan sa siyudad nga “Si Jehova Anaa Diha” nagpasalig sa kada usa nato nga ang putling pagsimba magpabilin ug molambo hangtod sa hangtod sa Paraiso. Pagkanindot sa kaugmaon nga nagpaabot nato!