JOSEB-BASEBET

Ang pangulo sa tulo ka labing talagsaon nga gamhanang mga tawo ni David. (2Sa 23:8) Sa 1 Cronicas 11:11 siya gitawag nga Jasobeam, nga lagmit mao ang mas husto nga porma. Adunay laing mga suliran sa pagkopya sa teksto sa 2 Samuel 23:​8, mao nga ang dili klaro nga Hebreohanong mga pulong diha sa Masoretikong teksto (nga mabasa, “Siya mao si Adino nga Eznihanon”) kinahanglang usbon aron mabasa nga “Siya nagbakyaw sa iyang bangkaw.” (NW) Ang ubang modernong mga hubad mabasa usab nga ingon niini. (AT; RS; Mo; ftn sa Ro; JB) Busa ang basahon ni Samuel gipahiuyon sa basahon sa Mga Cronicas ug sa paagi sa pagtagik niini nga seksiyon sa materyal. Ang gihisgotan mao “ang tulo,” apan ang pagpaila ug laing ngalan, ang Adino, maghimo niini nga upat. Dugang pa, ang matag usa sa tulo ka gamhanang mga tawo may usa sa iyang mga nabuhat nga gipasidungog kaniya, busa kon ang pagbuntog sa 800 gipasidungog sa laing tawo, walay buhat nga gipasidungog dinhi kang Joseb-basebet (Jasobeam).​—Tan-awa ang JASOBEAM Num. 2.

Adunay posibilidad nga ang buhat nga gipasidungog kang Joseb-basebet sa 2 Samuel 23:8 dili sama sa gihisgotan sa 1 Cronicas 11:11. Kini mahimong magpatin-aw kon nganong ang asoy sa Samuel naghisgot ug 800 nga gipatay, samtang ang asoy sa Mga Cronicas naghisgot ug 300 nga gipatay.