TABON SA DUGHAN

Ang sagradong binordahan nga bulsabulsa nga isul-ob sa hataas nga saserdote sa Israel ibabaw sa iyang kasingkasing o dughan kon siya mosulod sa Balaan nga lawak. Ang tabon sa dughan (Heb., choʹshen) nagsilbing “usa ka handomanan” ug lagmit nga gitawag nga “tabon sa dughan sa paghukom” tungod kay gibutang diha niini ang Urim ug Tumim nga pinaagi niini ang mga paghukom ni Jehova gipadayag.​—Ex 28:​15, 29, 30.

Sama sa epod, ang tabon sa dughan ginama sa kinamaayohang materyales, bulawan, asul nga hilo, balhibo sa karnero nga tininag morado, hilo nga sanag-pula gikan sa coccus, ug pinong lino nga linubid. (Ex 28:15) Ang samang mga panapton gigamit sa paghimo sa napulo ka tabil sa tolda nga binordahan ug mga kerubin, sa kortina nga nagbulag sa Balaan gikan sa Labing Balaan, ug sa tabil alang sa ganghaan sa tolda. Ang gikinahanglang materyales alang niini kinabubut-ong giamot sa mga Israelinhon ug kini gigama ni Bezalel ug Oholiab o kaha ilalom sa ilang pagdumala.​—Ex 26:​1, 31, 36; 31:2-6; 35:21-29.

Ang panapton alang sa tabon sa dughan lagmit nga usa ka maniko ang gitas-on ug usa ka dangaw ang gilapdon mao nga kini kuwadrado sa dihang pil-on, sa ingon mahimong bulsabulsa nga diha niana isulod ang Urim ug Tumim. Ang atubangang bahin sa tabon sa dughan gidayandayanan ug 12 ka bililhong mga bato nga gihal-op diha sa mga suksokanan nga bulawan ug gihan-ay sa upat ka lumbay nga may tulo ka bato sa matag lumbay. Sa matag bato gikulit ang ngalan sa usa sa mga tribo sa Israel. (Ex 28:15-21, 28; 39:8-14; Lev 8:8) Ang mga mutya sa matag lumbay lagmit nga gihan-ay sumala sa pagkatala niini gikan sa tuo paingon sa wala (sama sa pagbasa sa pinulongang Hebreohanon). Dili matino kon unsa nga bililhong bato ang katugbang sa usa ka tribo.​—Tan-awa ang bililhong mga bato ilalom sa tagsatagsa ka ulohan niini.

Ang tabon sa dughan gitaod diha sa epod niining mosunod nga paagi: Duha ka linubid nga mga kadena nga lunsayng bulawan ang gitaod diha sa duha ka argolya nga bulawan sa magkaatbang nga kanto sa ibabawng bahin sa tabon sa dughan. Dayon, kini nga mga kadena gitaod diha sa duha ka enggaste nga bulawan ibabaw sa mga sul-otan sa abaga sa epod. Duha ka laing argolya nga bulawan ang gitaod sa magkaatbang nga mga tumoy sa ubos nga ngilit ilalom sa tabon sa dughan nga nag-atubang sa epod. Kini nga mga argolya gihigot pinaagig asul nga hilo ngadto sa duha ka argolya nga bulawan diha sa sukaranan sa mga sul-otan sa abaga sa epod ibabaw mismo sa bakos niini.​—Ex 28:22-28; 39:15-21.