PAGLUTAS

Ang pagbansay sa usa ka nagsuso pa nga bata sa pagkaon sa laing paagi. Sa karaang kapanahonan, ang usa ka inahan kasagarang magpasuso sa iyang anak sulod sa taudtaod nga panahon, ug kon siya dili makapatunghag igong gatas o ahat nga mamatay, kinahanglang kuhaon ang usa ka iwa aron maoy magpasuso. (Ex 2:5-10) Ang paghunong sa pagpasuso maoy usa ka hinungdanong yugto sa kinabuhi sa bata. (Isa 11:8; 28:9) Mahimong adunay kombira niining malipayon nga okasyon sama sa gihikay ni Abraham sa dihang gilutas si Isaac.​—Gen 21:8.

Niadtong mga adlawa, ang mga babaye mas dugay nga magpasuso sa ilang mga anak kay sa gihimo karon diha sa kadaghanang bahin sa yuta. Sa dihang nalutas na si Samuel, siya may igo nang pangedaron aron ipiyal ngadto sa Hataas nga Saserdoteng si Eli ug sa pag-alagad sa tabernakulo. (1Sa 1:24-28) Lagmit siya nag-edad na ug tulo ka tuig, tungod kay ang pagparehistro sa lalaking mga Levihanon magsugod man nianang edara. (2Cr 31:16) Sa iyang libro nga Family, Love and the Bible (London, 1960, p. 175), si Raphael Patai nag-ingon bahin sa mga anak sa mga Arabo: “May mga kahimtang nga gitaho diin ang usa ka bata gipasuso pa gihapon hangtod mag-edad kinig napulo ka tuig.” Gipakita sa ebidensiya nga si Isaac gilutas sa nag-edad siya ug mga lima ka tuig.​—Tan-awa ang ISAAC.

Ang usa ka nalutas nga bata, bisan tuod wala na mangandoy sa pagsuso sa iyang inahan, mobati gihapon ug kasegurohan ug katagbawan sa dihang kugoson sa iyang inahan. Sa susama, gialam-alaman ug gihupay ni David ang iyang kalag “sama sa usa ka batang gilutas nga gisapnay sa iyang inahan,” ug ang iyang kalag ‘sama sa usa ka batang gilutas nga iyang gisapnay.’ Mopatim-awng ang iyang kalag naalam-alaman, nahupay, ug natagbaw tungod kay siya wala magtinguha sa pagkaprominente, nagmapainubsanon, naglikay sa pagkamapahitas-on, ug wala magtinguha sa mga butang nga dako ra kaayo alang kaniya. Iyang gidasig ang Israel nga mobuhat usab sa ingon, nga mapainubsanong ‘maghulat kang Jehova hangtod sa panahong walay tino.’​—Sal 131:1-3.