Si Jesus ba ang Labing Gamhanang Diyos?
Kasagarang tubag:
▪ “Oo, si Jesus ang Labing Gamhanang Diyos.”
▪ “Ang Diyos nagpakatawo ug nahimong si Jesus.”
Unsay tubag ni Jesus?
▪ “Kon kamo nahigugma kanako, magmaya kamo nga ako moadto sa Amahan, tungod kay ang Amahan labaw pa kay kanako.” (Juan 14:28) Giila ni Jesus nga siya dili katupong ug gahom sa iyang Amahan.
▪ “Ako mosaka ngadto sa akong Amahan ug inyong Amahan ug ngadto sa akong Diyos ug inyong Diyos.” (Juan 20:17) Si Jesus wala magtudlo nga siya ang Diyos, kondili siya nagtudlo nga ang Diyos maoy laing persona.
▪ “Wala ako magasulti pinasukad sa akong kaugalingong pagbuot, apan ang Amahan nga nagpadala kanako naghatag kanakog sugo kon unsay akong isugilon ug isulti.” (Juan 12:49) Ang gitudlo ni Jesus naggikan sa Amahan, dili sa iyang kaugalingon.
SI Jesus nag-ingon nga siya Anak sa Diyos, dili ang Labing Gamhanang Diyos. Kon si Jesus mao pa ang Diyos, kang kinsa siya miampo sa dinhi pa siya sa yuta? (Mateo 14:23; 26:26-29) Nagpakaaron-ingnon lang kaha siya nga nag-ampo sa Diyos? Wala gayod!
Sa dihang gihangyo si Jesus sa iyang duha ka tinun-an nga hatagan silag espesyal nga posisyon sa iyang Gingharian, siya mitubag: “Kining paglingkod sa akong tuong kamot ug sa akong wala dili akoa ang paghatag, kondili kini iya niadtong gitagan-an niini sa akong Amahan.” (Mateo 20:23) Namakak ba si Jesus sa iyang pag-ingon nga wala siyay awtoridad sa paghatag sa ilang gihangyo? Wala gayod! Hinunoa, mapainubsanon niyang giila nga Diyos lamang ang adunay awtoridad sa paghimo niana. Si Jesus miingon pa gani nga adunay mga butang nga wala niya mahibaloi ni sa mga anghel, gawas sa Amahan lamang.—Marcos 13:32.
Sa dihang nagpakatawo si Jesus, nianang panahona ba lamang nga siya mas ubos kay sa Diyos? Dili. Bisan sa panahon human mamatay ug mabanhaw si Jesus, siya gihubit sa Bibliya nga mas ubos kay sa Diyos. Si apostol Pablo nagpahinumdom kanato nga ang “Diyos labaw kang Kristo.” (1 Corinto 11:3, Today’s English Version) Ang Bibliya nag-ingon nga sa umaabot “sa dihang ang tanang butang nailalom na sa pagmando ni Cristo, siya mismo, ang Anak, magpailalom sa paghari sa Dios. Ang Dios maoy nagbuhat aron ang tanan mailalom sa pagmando ni Cristo. Si Cristo nagpailalom sa pagmando sa Dios aron ang Dios maoy maghari sa tanan sa hingpit gayod.”—1 Corinto 15:28, Ang Bag-ong Maayong Balita Biblia.
Tin-aw nga si Jesus dili mao ang Labing Gamhanan nga Diyos. Kanay hinungdan kon nganong gitawag niya ang iyang Amahan nga “akong Diyos.”—Pinadayag 3:2, 12; 2 Corinto 1:3, 4.a
[Footnote]
a Alang sa dugang impormasyon bahin niining ulohana, tan-awa ang panid 201-204 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.
[Blurb sa panid 7]
Si Jesus miingon nga adunay mga butang nga wala niya mahibaloi ni sa mga anghel, gawas sa Amahan lamang