Nganong Gibaoran sa Diyos ang Iyang mga Magsisimba nga Maminyo Lamag Isigkamagtutuo?

▪ Ang Balaod sa Diyos sa Israel naglakip niini nga sugo maylabot sa mga nasod palibot nila: “Dili ka makig-alyansa sa kaminyoon uban kanila. Ang imong anak nga babaye dili mo ihatag ngadto sa iyang anak nga lalaki, ug ang iyang anak nga babaye dili mo kuhaon alang sa imong anak nga lalaki.” (Deuteronomio 7:3, 4) Nganong gibaod niya kini?

Una, nahibalo si Jehova nga buot ni Satanas nga impluwensiyahan ang Iyang katawhan sa katibuk-an, aron sila mosimbag bakak nga mga diyos. Busa ang Diyos nagpasidaan: ‘[Ang mga dili-magtutuo] magpatalikod sa imong anak sa pagsunod kanako, ug sila tinong moalagad ug laing mga diyos.’ Peligroso kaayo kini. Kon ang nasod sa Israel moalagad sa laing mga diyos, sila mawad-ag pabor ug proteksiyon sa Diyos, ug dali ra silang mapildi sa mga kaaway. Kon mao, unsaon man sa maong nasod pagpatungha sa sinaad nga Mesiyas? Dayag nga duna gyoy katarongan si Satanas sa paghaylo sa mga Israelitas sa pagminyog mga dili-magtutuo.

Ikaduha, hinumdomi nga ang Diyos may pagtagad sa iyang katawhan ingong indibiduwal. Siya nasayod nga ang kalipay ug kaayohan sa matag usa kanila nagdepende sa ilang pagbaton ug suod nga relasyon kaniya ingong ilang Diyos. May pasikaranan ba ang pasidaan ni Jehova bahin sa peligrosong impluwensiya sa dili-magtutuong kapikas? Tagda ang pananglitan ni Haring Solomon. Nahibalo siya sa pasidaan ni Jehova bahin sa dili-magtutuong mga asawa: “Ilang ikiling ang inyong kasingkasing sa pagsunod sa ilang mga diyos.” Kay siya maalamon kaayo, tingali gibati niyang wala niya kinahanglana ang tambag sa Diyos, nga dili kana mapadapat kaniya. Iya kanang gibalewala. Unsay resulta? “Ang iyang mga asawa inanayng nagpakiling sa iyang kasingkasing . . . sa pagsunod sa ubang mga diyos.” Pagkadako sa kadaot! Si Solomon nawad-an sa pabor ni Jehova, ug ang iyang katawhan nagkabahinbahin tungod sa iyang pagkadili-matinumanon.—1 Hari 11:2-4, 9-13.

Ang uban tingali mangatarongan nga dihay mga eksepsiyon. Pananglitan, ang Israelitang si Malon naminyo sa Moabihanong si Ruth, ug kini nahimong sulondang magtutuo. Apan peligroso ang pagminyog Moabihanong mga babaye. Si Malon wala komendahi sa iyang pagminyog Moabihanon; bata pa siyang namatay, lagmit sa wala pa gani moila si Ruth kang Jehova ingong iyang Diyos. Ang igsoon ni Malon nga si Kilion, naminyo sa Moabihanong si Orpa, kinsa wala mobiya sa “iyang mga diyos.” Sa laing bahin, giminyoan ni Boaz si Ruth sa dihang magtutuo na kini. Gani, sa ulahi giisip siya sa mga Hudiyo ingong “hingpit nga kinabig.” Ang kaminyoon ni Ruth ug Boaz maoy panalangin kanilang duha.—Ruth 1:4, 5, 15-17; 4:13-17.

Nan, maalamon bang mangatarongan nga dalawaton ra ang gihimo ni Malon ug Ruth bisag sukwahi kadto sa tambag ni Jehova nga maminyo lamang sa isigkamagtutuo? Sa pagkatinuod, dili ba ang pagpangatarongag ingon niana sama ra sa pag-ingon nga ang pagsugal maoy dalawatong panginabuhi tungod lang kay ang usa ka sugarol nakadaog sa jackpot?

Ang Bibliya nag-awhag sa mga Kristohanon karon sa pagminyo “lamang diha sa Ginoo.” Kini nagpasidaan batok sa “pagpayugo nga dili timbang sa mga dili-magtutuo.” Ang maong tambag maoy alang sa matuod nga mga Kristohanon nga nangitag kapikas. Alang niadtong naminyo na sa mga dili-magtutuo, ang Bibliya naghatag ug tambag nga makatabang sa pagsagubang sa malisod nga situwasyon. (1 Corinto 7:12-16, 39; 2 Corinto 6:14) Kining tanang tambag nagpakita nga gusto ni Jehova nga Diyos, ang Tagmugna sa kaminyoon, nga kita magmalipayon ingong iyang mga magsisimba—tagsaanon man o minyo.