Nganong Gitugotan sa Diyos nga Daogdaogon sa mga Kusgan ang mga Huyang?

Ang Bibliya nagrekord ug pipila ka makapatugawng kahimtang diin gidaogdaog sa mga kusgan ang mga huyang. Ang usa niana mao ang nahitabo kang Nabot.a Si Ahab, usa ka hari sa Israel niadtong ika-10ng siglo B.C.E., nagtugot sa iyang asawa, si Jezebel, nga ipapatay si Nabot ug ang mga anak niini aron mapanag-iya sa hari ang parasan niini. (1 Hari 21:1-16; 2 Hari 9:26) Nganong gitugotan sa Diyos ang maong grabeng pag-abuso sa gahom?

Isentro nato ang atong pagtagad sa usa ka hinungdanong rason: Ang Diyos dili makabakak. (Tito 1:2) Unsay kalabotan niana sa daotang mga buhat sa pagpangdaogdaog? Aw, sa sinugdan gipasidan-an sa Diyos ang katawhan nga ang pagrebelde batok kaniya magpahinabog daotang epekto​—kamatayon. Ingong katumanan sa pulong sa Diyos, ang kamatayon nahimo nang bahin sa kinabuhi sa tawo sukad sa rebelyon sa tanaman sa Eden. Sa pagkatinuod, ang unang tawo nga namatay maoy biktima sa usa ka buhat sa pagpangdaogdaog​—dihang gipatay ni Cain ang iyang igsoong si Abel.​—Genesis 2:16, 17; 4:8.

Sukad niadto, ang Bibliya naghubit sa kasaysayan sa tawo niining paagiha: “Ang tawo nagmando sa tawo alang sa iyang kadaotan.” (Ecclesiastes 8:9) Natinuod ba kana? Si Jehova nagpasidaan sa iyang katawhan, ang nasod sa Israel, nga ang ilang mga hari magdaogdaog kanila, ug tungod niana ang mga tawo motuaw sa Diyos. (1 Samuel 8:11-18) Bisan ang maalamong Haring Solomon naningil sa katawhan ug dagko kaayong buhis. (1 Hari 11:43; 12:3, 4) Ang daotang mga hari, sama kang Ahab, labaw pa ka daogdaogan. Tagda kini: Kon gipugngan sa Diyos ang tanang buhat sa pagpangdaogdaog, dili ba nga sama rag namakak siya?

Hinumdomi usab nga si Satanas nangangkon nga ang mga tawo nag-alagad lang sa Diyos tungod sa hakog nga mga motibo. (Job 1:9, 10; 2:4) Kon panalipdan sa Diyos ang iyang mga alagad batok sa tanang matang sa pagpangdaogdaog, dili kaha magpamatuod kana nga husto ang mga pangangkon ni Satanas? Ug kon pugngan sa Diyos ang tanang matang sa pagpangdaogdaog, dili kaha siya mahimong responsable sa mas dako pang kabakakan? Ubos sa maong proteksiyon, lagmit daghan ang magtuo nga ang mga tawo malamposong makamando sa ilang kaugalingon nga wala ang Diyos. Apan sukwahi niana ang giingon sa Bibliya​—nga ang tawo dili gayod makahimo sa pagmando sa iyang kaugalingon. (Jeremias 10:23) Kinahanglan nga moanhi ang Gingharian sa Diyos; ug niana lang panahona nga matapos ang inhustisya.

Apan nagpasabot ba kana nga ang Diyos walay gihimo bahin sa pagpangdaogdaog? Wala. Tagda kining duha ka butang nga iyang gihimo: Una, iyang giyagyag kon unsa gayoy nalangkit sa pagpangdaogdaog. Pananglitan, ang iyang Pulong nagyagyag sa tanang bahin sa daotang plano ni Jezebel batok kang Nabot. Ang Bibliya dugang nagpadayag nga ang maong daotang mga buhat gipaluyohan sa usa ka gamhanang magmamando nga nagtinguhang itago ang iyang kaugalingon. (Juan 14:30; 2 Corinto 11:14) Gipaila siya sa Bibliya ingong si Satanas nga Yawa. Pinaagi sa pagyagyag sa pagkadaotan ug pagpangdaogdaog, lakip na sa nagpaluyo niini, gitabangan kita sa Diyos nga malikayan ang pagbuhat ug daotan. Sa ingon, gipanalipdan niya ang atong paglaom nga mabuhi sa walay kataposan.

Ikaduha, gitagana sa Diyos ang lig-ong paglaom nga matapos ang pagpangdaogdaog. Ang iyang pagyagyag, paghukom, ug pagsilot kang Ahab ug Jezebel​—ug sa daghan pang sama nila​—nagpasalig kanato nga may adlaw ra nga iyang silotan ang tanang mamumuhat ug daotan. (Salmo 52:1-5) Ang Diyos nagtagana usab ug kasaligang paglaom nga sa dili madugay iyang tul-iron ang daotang epekto sa pagkadaotan nga naagoman niadtong nahigugma kaniya.b Busa matagamtam sa matinumanong si Nabot ang panahon diin siya ug ang iyang mga anak mabuhi sa dayon sa paraisong yuta nga wala nay inhustisya.​—Salmo 37:34.