Pangutana
◼ Unsay angayng tagdon kon buot natong ihatag ang pipila o ang tanan natong kabtangan ngadto sa organisasyon ni Jehova inigkamatay nato?
Inigkamatay, ang tawo wala nay mahimo sa iyang kabtangan. (Eccl. 9:5, 6) Busa una pa niana, daghan ang mohimog testamento kon unsaon pagbahin sa iyang kabtangan. (2 Hari 20:1) Sagad, ilakip pagsulat niining legal nga dokumento ang ngalan sa administrador (trustee o executor). Sa daghang kanasoran, ang gobyerno maoy magbahin sa kabtangan sa namatay kon wala ang maong dokumento. Busa kon may gusto tang himoon sa atong kabtangan, sama pananglitan kon gusto natong ihatag ang pipila o ang tanan niini ngadto sa organisasyon ni Jehova, importante nga isulat nato kana sa usa ka legal nga dokumento ug piliog maayo kon kinsay himoon natong administrador.
Ang administrador bug-at ug responsibilidad. Depende sa kantidad sa kuwarta o gidak-on sa propiedad, ang paghikay ug pagbahin niana komplikado ug nagkinahanglag dakong panahon. Gawas pa, ang gobyerno sagad dunay mga balaod nga angayng sundon. Dili tanang igsoon diha sa kongregasyon ang maayong himoon nga administrador. Angay nga ang pilion nato mao kadtong makaarang, kasaligan, ug andam mosunod sa atong kagustohan.—Tan-awa ang artikulong “Ang Kamaalamon ug mga Kaayohan sa Pagplano sa Kabilin,” sa Disyembre 8, 1998 nga Pagmata!
Kon Hangyoon Ka nga Himoong Administrador: Kon hangyoon ka nga mahimong administrador sa kabtangan sa uban inigkamatay nila, mainampoong pamalandonga kon matuman ba nimo ang maong responsibilidad. (Luc. 14:28-32) Inigkamatay sa tag-iya, kinahanglan nimong pahibaloon ang tanang legal nga manununod. Kon duna ka nay awtoridad, responsibilidad nimo nga bahinon ang kabtangan sumala sa balaod ug sa kon unsay nasulat sa testamento. Ang administrador angayng mahibalo nga gamay man o dako ang propiedad, kinahanglan gayong sundon kon unsay nasulat sa maong dokumento. Ang bisan unsang gasa nga ihatag ngadto sa legal nga korporasyon nga gigamit sa mga Saksi ni Jehova maoy dedikadong salapi nga iyaha sa organisasyon ni Jehova.—Luc. 16:10; 21:1-4.