Mga Pangutana Gikan Sa Mga Magbabasa

Sa Salmo 61:8, si David miingon nga iyang dayegon ang ngalan sa Diyos “hangtod sa hangtod.” Nagpasabot ba ni nga naghunahuna siya nga dili gyod siya mamatay?

Wala. Dili ingon ana ang gihunahuna ni David.

Matikdi ang iyang gisulat niana nga bersikulo ug sa ubang bersikulo: “Mag-awit kog mga pagdayeg sa imong ngalan hangtod sa hangtod samtang ginatuman nako adlaw-adlaw ang akong mga panaad.” “Oh Jehova nga akong Diyos, dayegon ka nako sa tibuok nakong kasingkasing, ug himayaon nako ang imong ngalan hangtod sa hangtod.” “Dayegon nako ang imong ngalan hangtod sa kahangtoran.”​—Sal. 61:8; 86:12; 145:1, 2.

Dihang gisulat ni David kining mga pulonga, wala siya maghunahuna nga dili gyod siya mamatay. Nahibalo si David sa giingon ni Jehova nga ang mga tawo mamatay tungod sa sala, ug miangkon siya nga makasasala siya. (Gen. 3:3, 17-19; Sal. 51:4, 5) Nahibalo siya nga bisan ang mga tawo nga giuyonan sa Diyos, sama kang Abraham, Isaac, ug Jacob, namatay. Ug nahibalo si David nga sa ngadtongadto, mamatay pod siya. (Sal. 37:25; 39:4) Ang iyang giingon sa Salmo 61:8 nagpakita sa iyang tinguha ug determinasyon nga dayegon ang Diyos hangtod sa hangtod, sa ato pa, hangtod nga si David buhi.​—2 Sam. 7:12.

Ang ubang gisulat ni David maoy bahin sa iyang mga kasinatian sa kinabuhi, sama sa atong makita sa superskripsiyon sa Salmo 18, 51, ug 52. Sa Salmo 23, gipakasama ni David si Jehova sa magbalantay nga naggiya, nagpalagsik, ug nanalipod. Ingon ana nga magbalantay si David. Ug gusto niya nga alagaran ang Diyos ‘sa tanang adlaw sa iyang kinabuhi.’​—Sal. 23:6.

Hinumdomi sab nga si Jehova ang naggiya kang David sa tanan niyang gisulat. Apil sa iyang gisulat ang mga tagna bahin sa umaabot. Pananglitan, sa Salmo 110, si David nagsulat bahin sa panahon dihang ang iyang Ginoo, ang Mesiyas, ‘molingkod sa tuong kamot’ sa Diyos didto sa langit ug makadawat ug dakong gahom. Para sa unsa? Aron daogon ang mga kaaway sa Diyos ug ‘magpahamtang ug paghukom batok sa kanasoran.’ Si David katigulangan sa Mesiyas, nga magmando gikan sa langit ug mahimong “saserdote hangtod sa hangtod.” (Sal. 110:1-6) Si Jesus mismo miingon nga bahin niya ang tagna sa Salmo 110 ug matuman ni sa umaabot.​—Mat. 22:41-45.

Oo, gigiyahan ni Jehova si David sa pagsulat bahin sa iyang panahon ug sa umaabot nga panahon dihang banhawon siya ug madayeg na niya si Jehova hangtod sa hangtod. Busa ang Salmo 37:10, 11, 29 puwedeng magtumong dili lang sa kahimtang kaniadto sa Israel kondili sa kahimtang pod unya sa tibuok kalibotan dihang tumanon na sa Diyos ang iyang mga saad.—Tan-awa ang parapo 8 sa artikulong “Ikaw Makauban Nako sa Paraiso,” niini nga magasin.

Busa ang Salmo 61:8 ug ang ubang mga teksto nagpakita nga gusto ni David nga himayaon si Jehova hangtod sa kataposan sa iyang kinabuhi. Nagpakita pod ni kon unsay buhaton ni David sa umaabot dihang banhawon na siya ni Jehova.