Kon Unsaon nga Dili Sobrang Mabalaka
Ang sobrang kabalaka makadaot sa imong panglawas ug emosyon. Gani, kini lagmit moresultag mga problema nga mas dako pa kay sa imong gikabalak-an.
Mga sugyot aron dili sobrang mabalaka
Limitahe ang negatibong balita. Dili ra kinahanglan nga mahibalo ka sa tanang detalye sa usa ka hitabo. Ang sobrang pagtan-aw, pagbasa, o pagpaminaw sa makapaguol nga mga balita makapasamot lang sa imong kahadlok ug kabalaka.
Prinsipyo sa Bibliya: “Ang dugmok nga espiritu makahurot sa kusog.”—Proverbio 17:22.
“Makaadik ang pagsigeg tan-aw bahin sa kinabag-ohan ug makapakurat nga mga balita sa Internet, pero dili na makaayo. Namenosan gyod ang akong kabalaka dihang gilimitahan nako ang pagtan-aw sa maong mga balita.”—John.
Hunahunaa kini: Kinahanglan ba gyong mahibalo ka pirme sa tanang kinabag-ohang balita?
Mentinaha ang maayong rutina. Paghimog eskedyul kon kanus-a ka momata, mokaon, mohimo sa mga buluhaton, ug matulog, ug sunda kana. Kon duna kay eskedyul, mas mobati ka nga normal ang imong kinabuhi ug dili ka sobrang mabalaka.
Prinsipyo sa Bibliya: “Ang mga plano sa kugihan moresulta gyod ug kalamposan.”—Proverbio 21:5.
“Pagsugod sa COVID-19 nga pandemic, napasagdan na nako ang akong rutina ug dako kaayong panahon ang akong nagamit sa kalingawan. Gusto nakong gamiton ang akong panahon sa mas maayong paagi, maong naghimo kog eskedyul sa akong mga himoonon kada adlaw.”—Joseph.
Hunahunaa kini: Duna ba kay rutina nga nakatabang nimong mobati nga naa kay nalampos kada adlaw?
Pagpokus sa positibong mga butang. Ang pagsigeg hunahuna sa mga butang nga imo untang nahimo o sa dili maayong mga butang nga posibleng mahitabo makapasamot lang sa imong kabalaka. Mas maayong maghunahuna kag duha o tulo ka butang nga angay nimong pasalamatan.
Prinsipyo sa Bibliya: “Ipakita nga mapasalamaton mo.”—Colosas 3:15.
“Ang pagbasag Bibliya nakatabang nako nga dili magsigeg hunahuna sa negatibong impormasyon ug magpokus hinuon sa positibo. Morag simple ra kaayo ni, pero epektibo!”—Lisa.
Hunahunaa kini: Kanunay ba kang naghunahuna sa negatibong mga butang sa imong kinabuhi ug nabalewala na hinuon ang positibong mga butang?
Hunahunaa ang uban. Imbes ilain ang kaugalingon—nga maoy sagad himoon dihang sobrang mabalaka—hunahunaa kon unsaon nimo pagtabang sa uban nga nanginahanglan.
Prinsipyo sa Bibliya: “Magtan-aw dili lang sa kaugalingong kaayohan, kondili sa kaayohan sab sa uban.”—Filipos 2:4.
“Malipay ko dihang naa koy himoon para sa uban. Naghimo kog mga butang nga makapalipay nila, maong namenosan sab ang akong kabalaka. Gani, wala na koy panahon nga mabalaka.”—Maria.
Hunahunaa kini: Kinsa sa imong mga kaila ang nanginahanglan gyod ug tabang, ug unsay imong ikatabang nila?
Magpabiling himsog. Pag-ehersisyo ug pahulay pod. Kaon ug sustansiyadong pagkaon. Ang pag-atiman sa imong panglawas makatabang nimo nga magmapositibo ug dili sobrang mabalaka.
Prinsipyo sa Bibliya: “Ang pag-ehersisyo sa lawas naay ... kaayohan.”—1 Timoteo 4:8, footnote.
“Dili kaayo mi makaehersisyo sa akong anak sa gawas sa balay, maong giapil namo sa among rutina ang pag-ehersisyo sulod sa balay. Mas nakapalipay ni namo ug mas maayo ang among relasyon sa usag usa.”—Catherine.
Hunahunaa kini: Kinahanglan ba kang mag-usab sa imong diyeta ug mag-ehersisyo aron mas mohimsog ka?
Gawas pa niini nga mga sugyot, daghan sab ang nakabenepisyo sa pagkat-on sa kasaligang mga saad sa Bibliya bahin sa mas maayong kaugmaon. Tan-awa ang artikulong “Unsay Himoon sa Gingharian sa Diyos?”