Mbehi obu butumwa burungi bukaruga ahari Ruhanga?

1. Omuhandiki wa Bibuli ni oha?

Omuri Bibuli harimu obutumwa burungi oburi kugamba ku abantu barije kutura omu nsi ebiro byona. (Zaaburi 37:29) Bibuli erimu ebitabo 66. Ruhanga akakoresa abantu abesigwa bari kuhika ahari 40 omu kugihandika. Ebitabo bitano by’okubanza, ni Musa owabihandikire omu myaka 3,500 ehwire. Ekitabo c’aha muheru, ni entumwa Yohana owakihandikire kandi hati hahwire emyaka eri kukira 1,900. Mbwenu shi abagihandikire bakahandika ebitekateko by’oha? Ruhanga ni we wabire nabibagambira akoresize omwika gweye oguri kwera. (2 Samueli 23:2) Bakahandika ebitekateko bya Ruhanga; tibarahandikire ebitekateko byabo. Ni ahabw’eco, Yehova ni we muhandiki wa Bibuli.​—Shoma omuri 2 Timoseo 3:16; 2 Petero 1:20, 21.

2. Tukamanya tuta ku Bibuli eri kugamba amazima?

Nitumanya ku Bibuli eri kuruga ahari Ruhanga ahabw’okuba negamba ebirabeho nyensakare byona. Tihariho omuntu ori kubasa kugamba ebya nyensakare. (Yoshua 23:14) Ruhanga ori kukira byona ni we wenka ori kubasa kumanya ebiratuhikeho nyensakare.​—Shoma omuri Isaaya 42:9; 46:10.

Ekitabo ecarugire ahari Ruhanga tikishemerire kuba kiri nk’ebindi; kandi ni amazima. Hamazire kugabwa Bibuli nyingi munonga omu nsi yona kandi ziri omu ndimi nyingi. N’obu Bibuli yahandikirwe omu bwire bwa kare, nebuganisa na sayansi. Nambwenu, n’obu yahandikirwe abantu 40, ebi bahandikire byona nibibugana.a Kandi ekindi, Bibuli neshoborora oku Ruhanga yatukunzire munonga, n’oku eyine amani ag’okutuhindura tukaba abantu barungi. Ebyo byona nibituma abantu bona bayikiriza ku Bibuli yarugire ahari Ruhanga.​—Shoma omu 1 Batesalonika 2:13.

3. Ni enki ekiri kugambwa omuri Bibuli?

Bibuli negamba munonga aha butumwa burungi oburi kwereka ku Ruhanga arije kuha abantu emigisha myingi. Nambwenu neshoborora oku abantu b’okubanza bashobize bakaferwa amagara marungi omuri paradiso omu nsi, kandi egamba oku paradiso erije kugarurwaho.​—Shoma omu Kushuuruurwa 21:4, 5.

Nambwenu Bibuli erimu ebiragiro, emisinge n’obuhabuzi. Erimu enkuru z’abantu z’ebi Ruhanga yagenzire nakorera abantu, ebiri kutukwasa kushoborokerwa emitwarize yeye. Ni ahabw’eco, Bibuli nebasa kukukwasa kumanya Ruhanga, kandi ekwereka oku ori kubasa kuba munywani weye.​—Shoma omuri Zaaburi 19:7, 11; Yakobo 2:23; 4:8.

4. Ni enki ekirakukwase kushoborokerwa Bibuli?

Aka katabo nikija kukukwasa kushoborokerwa Bibuli, ku orakore nk’oku Yesu yakozire. Akaba nakoresa ebyahandikirwe kandi ‘abishoborora byona.’​—Shoma omuri Luka 24:27, 45.

Mazima, tihine ekindi kintu ekiri kubasa kutushemeza nk’obu butumwa burungi oburi kuruga ahari Ruhanga! Konka abamwe tibari kubufaho, kandi abandi nibabwanga. Konka iwe otahwa amani. Ahabw’okuba kumanya Ruhanga ni ko kurituma wabaho ebiro byona.​—Shoma omuri Yohaana 17:3.