Ahabw’enki Ruhanga ayine ekitongore?

1. Ahabw’enki Ruhanga yatorine Abisirayeli ba kare?

Ruhanga akatorana abijukuru ba Aburahamu, yabakoramu ihanga kandi yabaha ebiragiro. Akabeta ihanga rya ‘Isirayeli,’ yabegesa okuramya okw’amazima kandi yabaha ekigambo ceye. (Zaaburi 147:19, 20) Abantu ab’omu mahanga gona bakaba barije kutunga emigisha ahabw’okuramya kw’Abisirayeli.​—Shoma omu Kutandika 22:18.

Ruhanga akatorana Abisirayeli ngu babe abahamya beye. Enkuru zabo nizitwereka ku abantu bari kubaho ge bayorobera ebiragiro bya Ruhanga. (Eky’Ebiragiro 4:6) Birabire aha Bisirayeli, abantu bona bakaba bine oburyo bw’okumanya Ruhanga ow’amazima.​—Shoma omuri Isaaya 43:10, 12.

2. Ahabw’enki Ruhanga yatorine Abakristo ab’amazima?

Ku hahwire obwire, Ruhanga akanga Abisirayeli, yabahingana ekibina ec’Abakristo. (Matayo 21:43; 23:37, 38) Omuri obu bwire, Abakristo ab’amazima ni bo Bahamya ba Yehova omu mwanya gw’Abisirayeli.​—Shoma omu Byakozirwe 15:14, 17.

Yesu akatebekanisa abakurasi beye ngu baburire kandi bahindure abegi abantu ab’omu mahanga gona. (Matayo 10:7, 11; 24:14; 28:19, 20) Ogo murimo guri hihi kuhika aha muheru, kandi emperu eri hihi. Kwiha ensi yahangwa, ni bwo bw’okubanza Yehova yabuganisize hamwe abantu bingi munonga ab’omu mahanga gona omu kuramya okw’amazima. (Okushuuruurwa 7:9, 10) Abakristo b’amazima bakabuganisibwa hamwe kugira ngu bagumyane kandi bayambayambane. Omu nsi yona, nibega enyegesa za Bibuli ziri kushushana omu materaniro gabo.​—Shoma omu Baheburaayo 10:24, 25.

3. Ekitongore ec’Abahamya ba Yehova kikatandika kita?

Omu myaka ya 1870 omutwe muke gw’abegi ba Bibuli bakatandika kujumbura amazima ag’omuri Bibuli. Baketegereza ku Yesu yatireho ekibina ec’Abakristo ngu baburire obutumwa burungi; ni ahabw’eco bakatandika kuburira Obukama bwa Ruhanga omu nsi yona. Omu mwaka gwa 1931 bakahindura izina, bayetwa Abahamya ba Yehova.​—Shoma omu Byakozirwe 1:8; 2:1, 4; 5:42.

4. Mbwenu shi Abahamya ba Yehova nibakora bata?

Omu kinyigana ec’okubanza, ebibina eby’Abakristo by’omu nsi yona bikaba nibihebwa obuhabuzi n’akakiko k’abarisa, babire nibikiriza ku Yesu ari omutwe gw’ekibina. (Ebyakozirwe 16:4, 5) Erizoba Abahamya ba Yehova b’omu nsi yona na bo nibahebwa obuhabuzi Akakiko k’Abarisa karimu abazehe bakuzire omu by’omwika. Nibareberera ofisi z’Abahamya ba Yehova ziri kuhindura ebitabo biri kwegesa Bibuli, kubihandika omu ndimi ziri kukira 600, n’okubyohereza omu nsi yona. Ako Kakiko k’Abarisa nikaha ebyokurya by’omwika n’obuhabuzi ebibina by’omu nsi yona ebiri kukira 100,000. Omuri buri kibina, harimu abashija bakuzire omu by’omwika, bari kwetwa abazehe ninga abareberezi. Abo bashija nibareberera obusyo bw’entama za Ruhanga bine rukundo.​—Shoma omuri 1 Petero 5:2, 3.

Abahamya ba Yehova bakatebekanisibwa ngu baburire obutumwa burungi kandi bahindure abantu abegi. Nk’oku entumwa zabire niziburira, nitwe nituburira aha nju n’enju. (Ebyakozirwe 20:20) Nambwenu nitwegesa Bibuli abantu bari kukunda amazima. Konka Abahamya ba Yehova tibari nk’ebindi bitongore. Turi omu ka emwe kandi twine Tata omwe ori kutukunda. Turi benetata na banyanyazi bari kukundana. (2 Abatesalonika 1:3) Ahabw’okuba abahereza ba Yehova bari kukora ebi Ruhanga ari kwenda kandi baburira abandi, ni bo bantu bonka bine okushemererwa omuri egi nsi.​—Shoma omuri Zaaburi 33:12; Ebyakozirwe 20:35.