Ni enki ekirihika aha madini?

1. Mbehi amadini gona nigegesa amazima?

Omu madini gona harimu abantu barungi. Abo bantu Ruhanga nabareba kandi nabakunda. Konka ekiri kushasha, n’oku ebibi biri kukorwa omu izina ry’edini. (2 Abakorinso 4:3, 4; 11:13-15) Nituhurira amakuru agari kugamba ku amadini gari kwekwatanisa omu kweturikizaho ebisasi, kwita abantu, engamba n’okwita kubi abana. Ebyo bintu nibishasha munonga abari kukunda Ruhanga.​—Shoma omuri Matayo 24:3-5, 11, 12.

Edini ey’amazima nehimbisa Ruhanga, konka ey’ebishuba yo nemujumisa. Neyegesa ebitari omuri Bibuli, harimu enyegesa ez’ebishuba ziri kugamba ahari Ruhanga n’aha bafire. Konka Yehova nayenda ngu abantu bona bamumanye ge.​—Shoma omuri Ezekieli 18:4; 1 Timoseo 2:3-5.

2. Ni buha butumwa burungi oburi kugamba aha madini?

Ekirungi, ni oku Ruhanga ari kwanga amadini agari kubiha ku nigamukunda konka gari kukunda ensi ya Sitaane. (Yakobo 4:4) Bibuli neyeta amadini gona ag’ebishuba ‘Babuloni Nkuru.’ Babuloni ekaba ari etawuni ya kare ahu amadini ag’ebishuba gatandikire bwanyima y’omwijuro omu bwire bwa Nowa. Juba aha, Ruhanga nayija kumariraho kimwe amadini gona g’ebishuba agari kubiha abantu.​—Shoma omu Kushuuruurwa 17:1, 2, 5, 16, 17; 18:8.

Hariho obundi butumwa burungi. Yehova tarebirwe abantu b’emitima mirungi abari omu madini g’ebishuba omu nsi yona. Ariyo nabateraniriza hamwe ari kubegesa amazima.​—Shoma omuri Miika 4:2, 5.

3. Mbwenu shi abantu ab’emitima eyorobi bashemerire kukora ki?

Yehova nafa aha bantu abari kukunda amazima kandi bakakunda ebirungi. Nabehanangiriza ngu baruge omu madini ag’ebishuba. Abantu abari kukunda Ruhanga nibaba betegwire kukora ebiri kumushemeza.​—Shoma omu Kushuuruurwa 18:4.

Omu kinyigana ec’okubanza, entumwa ku zaburire abantu ab’emitima eyorobi, bakabyakira bashemerirwe. Yehova akabegesa omuhanda ogu bashemerire kutora, oguri kubaretera okushemererwa kandi bakagira amasiko ag’ebiro by’omu misho. Nibatuha ecokureberaho kirungi ahabw’okuba bakakira obutumwa burungi, bata ebi Yehova ari kukunda omu mwanya og’okubanza.​—Shoma omu 1 Batesalonika 1:8, 9; 2:13.

Abantu abari kuruga omu madini ag’ebishuba Yehova nabakira omu ka yeye ey’abari kumuramya omu mazima. Niwe ku orayakire obutumire bwa Yehova, noyija kuba munywani weye, oture hamwe n’abahereza beye b’amazima abari kukukunda kandi noyija kubaho ebiro byona.​—Shoma omuri Mako 10:29, 30; 2 Abakorinso 6:17, 18.

4. Ruhanga aryakora ki ngu abantu b’omu nsi yona bashemererwe?

Kumanya ku Ruhanga arije kucwera orubanja amadini ag’ebishuba nikitushemeza. Eco kiryatuma abantu b’omu nsi yona baruhuka. Amadini ag’ekishuba tigari shuba kubihabiha abantu n’okubacwamu ebicweka. Abantu bona baryabuganira hamwe omu kuramya Ruhanga omwe ow’amazima.​—Shoma omu Kushuuruurwa 18:20, 21; 21:3, 4.