EKICWEKA C’OKUBANZA
Ruhanga ni oha?
1, 2. Ni biha bibuzo ebi abantu bari kukunda kwebuza?
ABANA nibakunda kubuza ebibuzo byingi. Nobasa kubashobororera, konka bagumizamu kukubuza ngu: ‘Ahabw’enki?’ Kandi n’obu wakugezaho kubagarukamu, nabwo nibashuba bakubuza ngu: ‘Konka shi ahabw’enki?’
2 Twena abakuzire n’abato, nitubuza ebibuzo. Nitubasa kuba nitwebuza ebi turarye, ebi turajware ninga shi ebi turagure. Nitubasa n’okwebuza enshonga eri kutuma twabonabona n’ebirije kutuhikaho omu biro by’omu misho. Konka ku turi kubura ebyokugarukamu, nitubasa kuhwa amani rero twehunamira.
3. Ahabw’enki abantu bingi bari kutecereza ngu tibari kubasa kubona ebyokugarukamu by’ebibuzo ebi bari kwebuza?
3 Mbehi Bibuli nebasa kugarukamu ebibuzo ebi turi kwebuza? Hine abari kwikiriza ngu Bibuli nebigarukamu, konka nabwo bahurira egumire kushoborokerwa. Nibabasa kutecereza ngu abegesa ninga abakuru b’amadini bonka ni bo bari kumanya ebyokugarukamu. Abandi bo nibagira enshoni z’okugamba ngu tibari kubimanya. Mbwenu shi iwe?
4, 5. Ni biha bibuzo ebi ori kubasa kwebuza? Ahabw’enki oshemerire kugumizamu kuronda ebyokugarukamu?
4 Nobasa kuba ori kwenda kushoborocerwa ebibuzo nk’ebi: Ahabw’enki ndiho? Ku ndifa ndyaza nkahe? Ruhanga nashusha ata? Omwegesa Mukuru, ari we Yesu, akagira ati: ‘Mushabe, muryahebwa; musherure, muryazora; mwiguze, muryayigurirwa.’ (Matayo 7:7) Otaruha kurondesa ebyokugarukamu kuhisya obu ori bibona.
5 Ni amazima, ku oragumizemu kuronda noyija kubona ebyokugarukamu omuri Bibuli. (Enfumu 2:1-5) Ebyo byokugarukamu tibigumire kucenga. Ebi ori kwega nibikukwasa kubaho oshemerirwe hati kandi ogira amasiko g’ebiro by’omu misho. Reka tugambe aha kibuzo ecashobire abantu bingi.
MBEHI RUHANGA NATUFAHO NINGA NI ENSHARIZI?
6. Ahabw’enki abantu bamwe bari kutecereza ngu Ruhanga tarikufa aha kubonabona kwabo?
6 Abantu bingi nibatecereza ngu Ruhanga tarikutufaho. Nibagira ngu kuri Ruhanga ari kutufaho ensi tekabire eri batiya. Eyijwiremu endwano, orwango n’okubonabona. Abantu nibarwara, babonabona kandi bafa. Bamwe nibebuza ngu: ‘Yaba Ruhanga ari kutufaho, ahabw’enki atarikwihaho okubonabona?’
7. (a) Ni bata oku abakuru b’amadini bari kwegesa abantu ku Ruhanga ari ensharizi? (b) Ahabw’enki tutashemerire kujuma Ruhanga ngu ni we ori kutuma ebintu bibi byabaho?
7 Abakuru b’amadini bumwe nibatuma abantu batekateka ngu Ruhanga ni ensharizi. Ku hari kubaho akabi, nibagira ngu Ruhanga ni ko ari kubyenda. Nibagamba ngu ni co Ruhanga asimire. Bagamba basyoya, mazima nibaba bajuma Ruhanga. Konka Bibuli yo neyegesa ku Ruhanga atari we ori kureta ebibi. Omuri Yakobo 1:13 nihatugambira ku Ruhanga atari kutugeza akoresize ebintu bibi. Nihagira ngu: ‘Omuntu wena ku arayohibwe, areke kugira ati: “Nayohibwa Ruhanga.” Aha kuba Ruhanga tabasa kohibwa ekibi kandi na we tayosya omuntu.’ Eco nikimanyisa ngu n’obu Ruhanga atari kwihaho ebibi, ti we ori kutuma byabaho. (Shoma omuri Yobu 34:10-12.) Reka turebe ecokureberaho.
8, 9. Ahabw’enki kitahikire kubeherera Ruhanga ngu ni we ori kutuma twabonabona? Gamba ecokureberaho.
8 Tekateka aha musigazi ocari omu ka n’abazire beye. Ishe namukunda kandi akamwegesa oku ari kubasa kutoranamu kurungi. Mbwenu ogo musigazi yagomera ishe, yaruga omu ka. Yagenda yakora ebintu bibi byamuretera okubonabona. Mbwenu shi okarega omuzire ngu ni we waretire ogo mwana weye akabi, ari kumureka akaruga omu ka? Ingaha! (Luka 15:11-13) Kimwe n’ogo muzire, Ruhanga tarazibire abantu obu bayetoraniramu kumugomera kandi bakakora ebintu bibi. Ni ahabw’eco habaho ebintu bibi, tushemerire kwijuka ku Ruhanga atari we obiresire. Tikihikire kubeherera Ruhanga.
9 Hariho enshonga eri kutuma Ruhanga yareka okubonabona kukagumaho. Omu Kicweka ca 11, oryayega eki Bibuli eri kubigambaho. Konka omanye ngu Ruhanga natukunda kandi ti we ori kuturetera okubonabona. Ahobwe, ni we wenka ori kubasa kwihaho okubonabona.—Isaaya 33:2.
10. Ahabw’enki turi kwesiga ku Ruhanga arije kuboneza ebintu byona ebi abantu babi bashishire?
10 Ruhanga ni ori kwera. (Isaaya 6:3) Ebi ari kukora byona bihikire, tibyine burofa kandi ni birungi. Tushemerire kumwesiga. Abantu bo tibesigwa. Hine obu bari kukora ebintu bibi. Nangwa n’omutegeki ori kwesigwa naba atine mani g’okuboneza ebintu ebi abantu babi bashishire. Tihine omuntu oyine amani nk’aga Ruhanga. Ayine amani kandi nayija kuboneza ebintu byona ebi abantu babi bashishire. Nayija kwihiraho kimwe ebibi byona.—Shoma omuri Zaaburi ya 37:9-11.
RUHANGA NAYEHURIRA ATA YAREBA ABANTU BARI KUBONABONA?
11. Ruhanga nayehurira ata yareba ori kubonabona?
11 Ruhanga nayehurira ata yareba ebintu ebiri kuba omu nsi n’ebiri kukuhikaho iwe aha bwawe? Bibuli neyegesa ku Ruhanga ‘ari kukunda eby’oburyo.’ (Zaaburi 37:28) Obwe rero nafa aha bi abantu bari kukora, byaba biri bibi ninga shi birungi. Yareba abantu bari kushasha na we nashasha. Bibuli negamba ngu omu bwire bwa kare Ruhanga ‘akagubwa kubi omu mutima’ obu yarebire ensi eyijwiremu ebibi. (Okutandika 6:5, 6) Ruhanga tarahindukire. (Malaki 3:6) Bibuli negamba ku Ruhanga ari kukufaho mazima.—Shoma omuri 1 Petero 5:7.
Bibuli neyegesa ku Yehova ari Omuhangi w’ensi n’iguru, oyine rukundo
12, 13. (a) Ahabw’enki turi kukunda abandi kandi tukabafaho, kandi shi nitwehurira tuta twareba okubonabona okuri omu nsi? (b) Ahabw’enki turi kwesiga ku Ruhanga arije kumaraho okubonabona n’ebibi byona?
12 Nambwenu, Bibuli negamba ku Ruhanga yatuhangire omu kishushani ceye. (Okutandika 1:26) Eco nikimanyisa ku Ruhanga yatuhangire twine emitwarize nk’eyeye. Ni ahabw’eco wareba abantu barungi bari kubonabona okashasha, omanye ngu Ruhanga we nibimushasha munonga! Eco nitukimanya tuta?
13 Bibuli netugambira ku ‘Ruhanga ari rukundo.’ (1 Yohaana 4:8) Ebi Ruhanga ari kukora byona nabikora ahabwa rukundo. Twine rukundo ahabw’okuba Ruhanga na we ayine rukundo. Tekereza ahari eki: Mbehi obire oyine amani, torikubasa kwihaho okubonabona n’ebibi byona omu nsi? Okabyihaho, ahabw’okuba nokunda abantu. Kandi shi Ruhanga we? Ayine amani, kandi ahabw’okutukunda, nayija kwihiraho kimwe okubonabona n’ebibi byona. Yesige ku ebi Ruhanga ari kuturaganisa byona ebihandikire aha ntandikiro y’eki kitabo birarare byahikirira! Konka kugira ngu oyesige ebyo biraganiso otari kubanganisa, oshemerire kwega byingi ahari Ruhanga.
RUHANGA NAYENDA NGU OMUMANYE
Waba ori kwenda kuba munywani w’omuntu, nomugambira izina ryawe. Ruhanga na we natugambira izina ryeye omuri Bibuli
14. Izina rya Ruhanga ni riha, kandi shi nitumanya tuta ku nayenda ngu turikorese?
14 Waba ori kwenda kuba munywani w’omuntu, ni enki eki ori kubanza kumugambira? Ni izina ryawe. Mbwenu shi Ruhanga na we ayine izina? Amadini mingi nigagira ngu izina rya Ruhanga ni Ruhanga ninga shi Mukama; konka ago ti mazina bwite. Ni amazina g’ekitinisa, nk’“omugabe” ninga “purezidenti.” Ruhanga akatugambira ku izina ryeye ari Yehova. Omuri Zaaburi ya 83:18 nihagira ngu: ‘Bamanye ngu ni iwe wenka, ori kwetwa Yehova, Okirabona, kandi otegeka ensi yona.’ Abahandiki ba Bibuli bakakoresa izina rya Ruhanga emirundi eri kukira enkumi n’enkumi. Yehova nayenda ngu omanye izina ryeye kandi orikorese. Nakugambira izina ryeye kugira ngu obe munywani weye.
15. Izina rya Yehova nirimanyisa ki?
15 Izina rya Ruhanga, Yehova, nirimanyisa ekintu kine omugasho. Nirimanyisa ku Ruhanga ari kubasa kuhikiriza ebi ari kuraganisa byona kandi ahikiriza ekigendererwa ceye. Tihine ekiri kubasa kumwemereza. Yehova ni we wenka oyine eryo zina.a
16, 17. Aga mazina nigamanyisa ki? (a) ‘Owobushoborozi bwona’? (b) “Mukama Otahwaho”? (c) ‘Omuhangi’?
16 Nk’oku twaba twakishomire, Zaaburi ya 83:18 negamba ahari Yehova eri kugira eti: ‘Ni iwe wenka Okirabona.’ Nambwenu omu Kushuuruurwa 15:3 nihagira ngu: ‘Mukama Ruhanga Owobushoborozi bwona, ebi wakozire ni bikuru kandi ni eby’okutangaza.’ Izina ry’ekitinisa ‘Owobushoborozi bwona’ nirimanyisa ki? Nirimanyisa ku Yehova ayine amani agari kukira aga buri kintu cona omu nsi n’omu iguru. Omuri 1 Timoseo 1:17, Yehova nayetwa “Mukama Otahwaho.” Izina “Mukama Otahwaho” nirimanyisa ku yabireho kwiha kare. Zaaburi ya 90:2 neshoborora ku yabireho kwiha omu biro bya kare kandi ku aryaturaho. Eco nikitangaza!
17 Yehova ni we Muhangi wenka. Omu Kushuuruurwa 4:11 nihagira ngu: ‘Mukama Ruhanga witu, oshemerire kuhimbisibwa n’okuhebwa ekitinisa n’obushoborozi, ahabw’okuba ni iwe wahangire byona; ahabw’okukunda kwawe bikahangwa kandi byabaho.’ Yehova akahanga ba marayika b’omu iguru, enyonyozi z’omu iguru, ebijuma n’ebyenyanja; byona ebi ori kumanya ni Yehova owabihangire!
MBEHI NOBASA KUBA MUNYWANI WA YEHOVA?
18. Ahabw’enki abantu bamwe bari kutekateka ku batari kubasa kuba banywani ba Ruhanga? Bibuli nekigambaho enki?
18 Hine abantu bari kushoma emitwarize mirungi ya Yehova, bahurira bagira obwoba, batekateka ngu: ‘Mbwenu shi ku Ruhanga ayine amani mingi, gari kukira hare ag’abantu, obwe nabasa kutufaho?’ Konka shi okwe ni ko Ruhanga ari kwenda ngu tumurebe? Ingaha. Yehova nayenda kuba hihi n’itwe. Bibuli negamba ku Ruhanga ‘atari hare n’omuntu wena omuri itwe.’ (Ebyakozirwe 17:27) Ruhanga nayenda ngu omuhike hihi, kandi nakuraganisa ku arije ‘kukwirira hihi.’—Yakobo 4:8.
19. (a) Nobasa ota kuba munywani wa Ruhanga? (b) Ni eha mitwarize ya Yehova eri kukushemeza munonga?
19 Nobasa ota kuba munywani wa Ruhanga? Yesu akagamba ngu: ‘Aga ni go magara agatahwaho, okumanya iwe Ruhanga omwe ow’amazima, n’ogo owu watumire, Yesu Kristo.’ (Yohaana 17:3) Gumizamu kwega, noyija kumanya Yehova na Yesu. Eco kiryatuma watunga amagara agatahwaho. Ecokureberaho: Twamazire kwega ku ‘Ruhanga ari rukundo.’ (1 Yohaana 4:16) Konka ayine n’endijo mitwarize mirungi. Bibuli netugambira ku Yehova ari ‘ow’okusasira n’embabazi, otari kurahuka kugira ekiniga, oyijwire embabazi n’amazima.’ (Okuruga 34:6) Yehova ‘ni murungi kandi arahuka kusasira.’ (Zaaburi 86:5) Ruhanga nayehangana kandi ni omwesigwa. (2 Petero 3:9; 1 Abakorinso 1:9) Ku oragumizemu kushoma Bibuli noyija kumanya byingi ahari eyo mitwarize.
20-22. (a) Ni bata oku turi kubasa kuhika hihi ya Ruhanga kandi tutari kumureba? (b) Ni enki eki oshemerire kukora abandi bakugira ngu oreke kwega Bibuli?
20 Nobasa ota kuhika hihi ya Ruhanga kandi otari kubasa kumureba? (Yohaana 1:18; 4:24; 1 Timoseo 1:17) Ku ori kushoma ebiri kugamba ahari Yehova omuri Bibuli, nokizaho kumumanya ge, omanya ku ariho. (Zaaburi 27:4; Abarooma 1:20) Ku oragumizemu kwega ebyeye, oryakizaho kumukunda kandi ohurire wamuhika hihi kukiza kare hona.
Omuzire nakunda abana beye, konka Tata w’omu iguru nakizaho kutukunda
21 Oryashoborocerwa ku Yehova ari Tata. (Matayo 6:9) Akatuha amagara kandi nayenda ngu tubeho twine amagara marungi. Eco ni co omuzire wena oyine rukundo ari kwendeza abana beye. (Zaaburi 36:9) Ni amazima, Bibuli neyegesa ku ori kubasa kuba munywani wa Yehova. (Yakobo 2:23) N’iwe kitekatekeho. Yehova, Omuhangi w’iguru n’ensi, nayenda ngu obe munywani weye!
22 Abantu bamwe nibenda ngu otagumizamu kwega Bibuli. Nibabasa kutina ngu noyija kuhindura edini yawe. Konka otayikiririza omuntu wena ori kwenda kukuzibira kuba munywani wa Yehova. Ni we munywani ori kukira abandi bona abu ori kubasa kugira.
23, 24. (a) Ahabw’enki oshemerire kugumizamu kubuza? (b) Ni enki eki turiyega omu kicweka ekiri kukurataho?
23 N’obu origumizamu kwega Bibuli, hine ebindi bintu ebi otaribasa kushoborokerwa. Otarigira enshoni z’okubuza ori kukwegesa. Yesu akagamba ku tushemerire kwecureza, nk’abana bato. (Matayo 18:2-4) Kandi abana nibakunda kubuza ebibuzo byingi. Ruhanga nayenda ngu otunge ebyokugarukamu. Ni ahabw’eco, gumizamu kwega Bibuli oyetonzire, kugira ngu omanye ge yaba ebi ori kwega biri amazima.—Shoma omu Byakozirwe 17:11.
24 Oburyo burungi bw’okumanya Yehova, ni okwega Bibuli. Omu kicweka ekiri kukurataho, noyija kumanya ahabw’enki Bibuli eri kutanira kimwe n’ebindi bitabo.
a Bibuli yawe yaba etarimu izina Yehova ninga shi waba ori kwenda kumanya byingi aha ki riri kumanyisa n’oku riri kugambwa, nitukushaba kureba Enyongezo ya 1.