EKICWEKA CA IKUMI NA KIMWE
Ahabw’enki hariho okubonabona kwingi?
1, 2. Ni enki eki abantu bingi bari kwebuza?
OMUYAGA gw’amani gwashenya amaju g’abantu. Omushija yataha omu kanisa n’embundu, yarasha abantu yabamara. Kansa yayita omuzire, yasiga abana batano bari enfuzi.
2 Ebizibu nk’ebyo ku biri kubaho, abantu bingi nibebuza ngu: “Ahabw’enki byabaho?” Abingi nibebuza enshonga ensi eyijwiremu obugomi n’okubonabona. Mbwenu shi n’iwe warabyeburize?
3, 4. (a) Ni biha bibuzo ebi Habakuuki yaburize? (b) Ni enki eki Yehova yamugarukiremu?
3 Twashoma Bibuli, nitureba ku n’abantu ababire nibesiga munonga Ruhanga na bo babire nibebuza ebyo bibuzo. Ecokureberaho: Omuhanuzi Habakuuki akabuza Yehova ngu: ‘Ahabw’enki nondebesa ebitahikire n’eby’itima? Okuhwerekerera n’obubisha biri omu misho gange, entongane n’empaka ziri ah’iguru.’—Habakuuki 1:3.
4 Omuri Habakuuki 2:2, 3, nihatugambira ku Ruhanga yagarukiremu Habakuuki ebyo bibuzo kandi yamuraganisa kugira eki yabikoraho. Yehova nakunda abantu munonga. Bibuli negira ngu: ‘Natutaho omutima.’ (1 Petero 5:7) Mazima, Ruhanga nashasha yareba abantu bari kubonabona kukiza oku kiri kutushasha. (Isaaya 55:8, 9) Hati reka turebe ekibuzo kiri kugira ngu: “Ahabw’enki hariho okubonabona kwingi omu nsi?”
AHABW’ENKI HARIHO OKUBONABONA KWINGI?
5. Ni enki eki abakuru b’amadini bari kugamba aha kubonabona? Ni enki eki Bibuli eri kwegesa?
5 Abapasita, abapadiri n’abashomesa bakunzire kugamba ku Ruhanga ari kwikiriza ngu abantu babonabone. Hine n’abari kugamba ngu ekintu cona ekiri kuhika aha muntu, harimu n’akagwe, ngu ni Ruhanga ori kuba yabitebekanisize kare kandi ngu itwe tituri kubasa kubishoborocerwa. Abandi bo nibagamba ngu abantu, harimu n’abana, nibafa kugira ngu batunge omugisha g’okuza kutura omu iguru na Ruhanga. Konka eco ni ekishuba. Yehova ti we ori kureta ebibi. Bibuli negira ngu: ‘Nikikabure Ruhanga okukora ebitahikire, Owobushoborozi bwona okukora kubi!’—Yobu 34:10.
6. Ahabw’enki abantu bingi bari kugamba ku Ruhanga ari we ori kureta okubonabona kona okuri omu nsi?
6 Abantu bingi nibagamba ku Ruhanga ari we ori kureta okubonabona kona omu nsi ahabw’okuba nibatekateka ngu ni we ori kutegeka ensi. Konka nk’oku wacegire omu Kicweka ca 3, omutegeki w’ensi ni Sitaane.
7, 8. Ahabw’enki hariho okubonabona kwingi omu nsi?
7 Bibuli netugambira ku ‘ensi yona eri omu butegeki bw’omubi.’ (1 Yohaana 5:19) Omutegeki w’egi nsi ni Sitaane; ni ensharizi kandi ni omwisi. Ni we ori kuhabisa ‘ensi yona.’ (Okushuuruurwa 12:9) Abantu bingi nibamutoreza. Kandi eyo ni yo nshonga eri kutuma ensi yayijuramu ebishuba, obwangani n’obugomi.
8 Hine ezindi nshonga eziri kutuma habaho okubonabona kwingi omu nsi. Adamu na Eva ku bamazire kwegomeka, bakaraga abana babo ekicumuro. Kandi ekicumuro ni co kiri kutuma abantu bagira obusasi bwingi. Abantu nibatura bari kwekuza ngu bakire abandi. Nibatongana, baza omu ntaro kandi bakora kubi abandi. (Omubuurizi 4:1; 8:9) Konka hine n’obu abantu bari kubonabona ahabw’‘obunaku n’ebihikirizi.’ (Omubuurizi 9:11) Bine kuba bari ahantu habi kandi omu bwire bubi, rero bahikwaho n’akabi.
9. Ahabw’enki turi kubasa kugamba ku Yehova ayine enshonga eri kuhuririnkana eri kutuma yareka ebibi bikagumaho?
9 Yehova ti we ori kureta okubonabona, haba na busha! Titushemerire kumubanja entaro, obwitani n’okutwarizibwa kubi. Ruhanga ti we ori kureta ebihikirizi, nk’emisisa, ihunga n’emyijuro. Konka nobasa kwebuza ngu: ‘Mbwenu shi yaba Yehova ari we oyine amani kukiza abandi omu iguru n’omu nsi, ahabw’enki atari kwemereza ebintu bibi bikareka kubaho?’ Nitumanya ku Ruhanga ari kutufaho munonga, obwe nabasa kuba ayine enshonga ehikire eri kutuma yareka ebibi bikagumaho.—1 Yohaana 4:8.
ENSHONGA RUHANGA ARI KUREKA EBIBI BIKABAHO
10. Ni bata oku Sitaane yabeherire Yehova?
10 Omu musiri gwa Edeni, Sitaane akahabisa Adamu na Eva. Sitaane akarega Ruhanga ngu ni Omutegeki mubi. Akagamba ku hine ekintu kirungi eki Ruhanga yasherekire Adamu na Eva. Sitaane akaba nayenda ngu batekateke ku ari kubasa kubabera omutegeki murungi kukiza Yehova, kandi yabahuriza ku batari kwetenga Ruhanga.—Okutandika 3:2-5; Reba Enyongezo ya 27.
11. Ni kiha kibuzo eki tushemerire kugarukamu?
11 Adamu na Eva bakanga kuhurira Yehova kandi bamugomera. Bakatekateka ku bine obugabe bw’okweshariramu ekibi n’ekirungi. Ni bata oku Yehova yabire aratwereke ku abo bagomi bayebehire kandi ku ni we oshemerire kutushariramu ebirungi?
12, 13. (a) Ahabw’enki Yehova atarahikire ari kwita abagomi b’okubanza? (b) Ahabw’enki Yehova yayikirize Sitaane kuba omutegeki w’ensi, akikiriza n’abantu kwetegeka?
12 Yehova tarahikire nayita Adamu na Eva. Ahobwe, akabareka bazara abana. Bwanyima, Yehova akareka abijukuru ba Adamu na Eva bayeshariramu owu bari kwenda ngu abategeke. Omu kutandika Yehova akaba ari kwenda ngu ensi eyijuremu abantu abahikirire, kandi ekigendererwa ceye akaba arije kukihikaho, n’obu Sitaane yakukora ki!—Okutandika 1:28; Isaaya 55:10, 11.
13 Sitaane ari kubeherera Yehova, ba marayika bakaba bari kubireba. (Yobu 38:7; Danieli 7:10) Ni yo nshonga Yehova yahire Sitaane omwanya ngu aze kushoborora ebyo bishuba byeye. Nambwenu Yehova akikiririza abantu kweteraho za gavumenti zebembirwe Sitaane, ngu barebe yaba hine eki bari kubasa kwehisyaho, Ruhanga atabayambire.
14. Ni enki eki abantu twena twayerebire?
14 Abantu bakamara emyaka myingi bari kugezaho kwetegeka, konka baremwa. Twena tukerebera ku Sitaane ari omunyabishuba. Abantu tibari kubasa kabaho bonka batine buyambi bwa Ruhanga. Omuhanuzi Yeremia akaba ahikire kugamba ngu: ‘Ayi Mukama, nimanya ngu omuhanda g’omuntu tiguba omu bushoborozi bweye, kandi omuntu wena ogenda tabasa kwehabura omu rugendo rweye ahu yahika hona.’—Yeremia 10:23.
AHABW’ENKI YEHOVA YATINZIRE?
15, 16. (a) Ahabw’enki Yehova yarekire okubonabona kukagumaho obwire buringwa? (b) Ahabw’enki Yehova atarihireho ebizibu ebyaresirwe Sitaane?
15 Ahabw’enki Yehova yarekire okubonabona kukagumaho obwire buringwa? Ahabw’enki atari kwihaho ebintu bibi? Hakaba hashemerire kuhwa obwire kugira ngu twena turebe ku Sitaane aremirwe kutegeka. Abantu bakagezaho emiringo yona ya za gavumenti, konka byayanga. N’obu abantu bahikire ahari byingi omuri sayansi n’ebyobwenge, ebibi bikeyongera kukiza kare hona. Harimu okutwarizibwa kubi, obworo, obwitani n’entaro. Mazima tituri kubasa kwetegeka tutine Ruhanga.
16 Tekateka: Yehova tarihireho ebizibu ebi Sitaane yaresire. Kuri yakikozire, akaba arabe yayamba Sitaane omu kutegeka, kandi eco tari kubasa kukikora. Nambwenu, abantu bakaba barayebihe ngu nibabasa kwetegeka kandi bagira eki bahikaho. Konka eco kikaba kiri ekishuba, ni yo nshonga Yehova atarabayambire. Yehova tari kubasa kwekwatanisa omu bishuba.—Abaheburaayo 6:18.
17, 18. Ni enki eki Yehova arikora aha bintu byona ebi Sitaane yashishire?
17 Mbwenu shi Yehova akabasa kuboneza ebintu byona ebi Sitaane n’abantu babi bashishire? Yego. Ahari Ruhanga, byona nibibasika. Yehova namanya obwire obu ebirego bya Sitaane byona birirebeka ku ni ebishuba. Obwo ni bwo arihindura ensi yona paradiso, nk’oku yabire ari kwenda. ‘Abari omu bituro bona’ abu Yehova ari kwijuka aryabazora. (Yohaana 5:28, 29) Abantu tibarishuba kurwara n’okufa. Yesu aryaboneza ebintu byona ebi Sitaane yashishire. Yehova aryakoresa Yesu ‘ahwerekereze emirimo ya Sitaane.’ (1 Yohaana 3:8) Ahagati aho nikitushemeza kuba Yehova ari kwehangana, akatuha obwire bw’okumumanya kandi tukereka yaba turi kwenda ngu atutegeke. (Shoma omuri 2 Petero 3:9, 10.) Kandi n’obu turi kubonabona, nabwo natukwasa kwehangana.—Yohaana 4:23; Shoma omu 1 Bakorinso 10:13.
18 Yehova tarikutugema ngu twikirize atubere Omutegeki. Akaha abantu obugabe bw’okwetoraniramu. Reka turebe oku eco kiconco c’okwetoraniramu kiri kutugasira.
ORYAKORESA OTA EKICONCO C’OKWETORANIRAMU?
19. Ni kiha kiconco c’omuhendo eki Yehova yatuhire? Ahabw’enki tushemerire kusima ahabw’eco kiconco?
19 Ekiconco c’okwetoraniramu eki Yehova yatuhire nikituma twatana n’enyamishwa. Zo nizibaho zikuratize obwenge obwazihangirwemu, konka itwe nitwetoraniramu oku turi kwenda kubaho kandi tusharamu kukora ebi Yehova ari kwenda. (Enfumu 30:24) Nambwenu, titurahangirwe nka mashini eziri kukora eki zakorirwe kukora kusha. Twine obugabe bw’okwetoraniramu owu turi kwenda kuba we, abu turi kwenda kunywana na bo n’eki turi kwenda kukoresa amagara gitu. Yehova nayenda ngu tubeho tushemerirwe.
20, 21. Ni kuha kutoranamu oku ori kubasa kugira hati?
20 Yehova nayenda ngu tumukunde. (Matayo 22:37, 38) Ni nk’omuzire ori kushemererwa yahurira omwana ari kumugambira ngu “ninkukunda,” kandi abigamba atine oburyarya, hatine owamugema. Yehova akatuha obugabe bw’okwetoraniramu kumukorera ninga shi kutamukorera. Sitaane, Adamu, na Eva, bona bakasharamu kwetantara Yehova. Mbwenu shi iwe waza kukoresa bateya ekiconco c’okwetoraniramu?
21 Koresa ge obugabe bw’okwetoraniramu ori kukorera Yehova. Hine abandi bantu bari kuhika omuri za miriyoni nyingi abatorine kushemeza Ruhanga batera Sitaane omugongo. (Enfumu 27:11) Ni enki eki ori kubasa kukora hati ngu oyije kuba omu nsi ensya, obu Ruhanga ariba ayihireho okubonabona kona? Ekicweka ekiri kukurataho, nikigarukamu eco kibuzo.