Eka yawe nebasa kushemererwa

1, 2. Ni enki eki Yehova ari kwendeza abari omu maka?

YEHOVA RUHANGA ni we owatandikisize eka y’okubanza. Bibuli netugambira ku yahangire omukazi ow’okubanza, rero ‘akamuretera’ Adamu. Adamu akashemererwa yagira ngu: ‘Ogu ni igufa eryaruga omu magufa gange, kandi ni omubiri ogwaruga omu mubiri gwange.’ (Okutandika 2:22, 23) Eki nikitumanyisa ku Yehova ari kwenda ngu abari omu maka bashemererwe.

² Ekiri kushasha, ni oku abantu bingi batine okushemererwa omu maka. Konka, Bibuli erimu obuhabuzi bwingi oburi kukwasa abari omu maka kugira eki bahikaho kandi bakashemererwa.—Luka 11:28.

EKI RUHANGA ARI KUSHABA ABASHIJA

3, 4. (a) Omushija ashemerire kutwariza ata omukazi weye? (b) Ahabw’enki kiri ec’omugasho omukazi n’omushija kusasirana?

³ Bibuli negamba ku omushija murungi ashemerire kukunda omukazi weye kandi akamuha ekitinisa. Nyabura we shoma omu Baefeso 5:25-29. Omushija ashemerire kuguma ari kukwata ge omukazi weye kandi ari kumwereka rukundo. Nambwenu ashemerire kumurinda, akamureberera, kandi ayerinda kukora ekintu cona ekiri kubasa kumukora kubi.

⁴ Konka shi omushija akakora ki omukazi weye yashobya? Bibuli negambira abashija ngu: ‘Mukunde abakazi banyu, mureke kubisya omwaga.’ (Abakolosai 3:19) Imwe bashija mwe, mwijuke ku n’imwe muri kushobya. Kandi mwaba nimwenda ngu Ruhanga abasasire, n’imwe mushemerire kusasira abakazi banyu. (Matayo 6:12, 14, 15) Omukazi n’omushija bombi baba betegwire kusasirana, nikiza kubakwasa kushemererwa omu ka.

5. Ahabw’enki omushija ashemerire kuha omukazi weye ekitinisa?

⁵ Yehova nayenda ngu omushija ahe omukazi weye ekitinisa. Omushija ashemerire kutekateka aha bi omukazi weye ari kwetenga. Eki ti ec’okuzanisa. Omushija yatwariza kubi omukazi weye, Yehova na we tari kubasa kuhurira okushaba kweye. (1 Petero 3:7) Ekiri kutuma Yehova yareba abantu nk’ab’omuhendo ni rukundo eyi bari kumukunda. Tari kukunda munonga abashija kukira abakazi.

6. Omukazi n’omushija kuba omubiri ‘gumwe’ nikimanyisa ki?

⁶ Yesu akashoborora ku omukazi n’omushija ‘bari kuba batakiri babiri, kureka omwe.’ (Matayo 19:6) Nibesigana kandi tihine oshemerire kuraba ondijo enyima. (Enfumu 5:15-21; Abaheburaayo 13:4) Eco nikimanyisa ku abashija n’abakazi bashemerire buri omwe kufanaho omu mubonano g’omu kitanda. (1 Abakorinso 7:3-5) Omushija ashemerire kwijuka ku ‘hatariho omuntu oyanga omubiri gweye, kureka agurisa, agucuma.’ Rero, ashemerire kukunda omukazi weye kandi amufaho. Ekiri kukira byona, omukazi naba ari kwenda ngu omushija weye amutwaze mpora kandi ari kumworeka rukundo.—Abaefeso 5:29.

EKI RUHANGA ARI KUSHABA ABAKAZI

7. Ahabw’enki eka yona eshemerire kugira omwebembezi?

⁷ Buri ka yona eshemerire kugira omutwe, ni okugamba ori kugebembera, kugira ngu abarimu bona bakorere hamwe. Omu 1 Bakorinso 11:3, Bibuli negira ngu: ‘Omutwe g’omushija ni Kristo, n’omutwe g’omukazi ni iba, kandi omutwe gwa Kristo ni Ruhanga.’

8. Ni bata oku omukazi ari kubasa kwereka ekitinisa omushija weye?

⁸ Abashija bona nibakora enshobe. Konka omukazi ku ari kushagika okusharamu k’omushija weye kandi akakwatanisa na we abyihire aha mutima, eka yona negasirwa. (1 Petero 3:1-6) Bibuli negira ngu: ‘Omukazi ashemerire kutina iba.’ (Abaefeso 5:33) Konka shi omukazi akakora ki we n’omushija weye babire batari kushushanisa enyikiriza? Nabwo omukazi ashemerire kugumizamu kumuha ekitinisa. Bibuli negira ngu: ‘Imwe bakazi, mworobere mutyo ba baro imwe; ku harabe hariho abatari korobera Ekigambo ca Ruhanga, bahindurwe emitwarize y’abakazi babo, batine ekigambo cona eki babagambire, ahabw’okureba emitwarize yanyu mirungi ey’okutina Ruhanga.’ (1 Petero 3:1, 2) Emitwarize mirungi y’omukazi nebasa kukwasa omushija kushoborocerwa n’okuha ekitinisa ebi ari kwikiriza.

9. (a) Ni enki eki omukazi ari kubasa kukora haba hine ebi atari kwikirizana n’iba? (b) Ni buha buhabuzi obw’abakazi oburi omuri Tito 2:4, 5?

⁹ Ni enki eki omukazi ari kubasa kukora haba hariho ebi atari kwikirizana n’iba? Ashemerire kumugambira ebitekateko byeye, konka ayecurerize. Ecokureberaho: Saara akagamba ekintu eki Abrahamu yabire atari kwenda, konka Yehova akagambira Abrahamu ati: “Omworobere.” (Okutandika 21:9-12) Abashija b’Abakristo tibakunzire kusharamu ebiri kutana na Bibuli; ni ahabw’eco abakazi babo bashemerire kwikirizana na bo. (Ebyakozirwe 5:29; Abaefeso 5:24) Omukazi w’omutima nafa ahab’omu ka ye. (Shoma omuri Tito 2:4, 5.) Omushija weye n’abana bareba oku ari kukoresa amani ngu abafeho, nikituma bakizaho kumukunda kandi bamuha ekitinisa.—Enfumu 31:10, 28.

10. Bibuli negamba ki aha kutana n’okwangana?

¹⁰ Hine obu omukazi n’omushija bari kurahuka kwangana ninga kutana. Konka Bibuli negamba ngu ‘omukazi areke kutana n’iba,’ kandi ngu ‘omushija atarishenda omukazi weye.’ (1 Abakorinso 7:10, 11) Hariho embera ezigumire eziri kubasa kutuma omukazi ninga omushija yayangana, konka eco ti ec’okuzanisa. Kandi shi okutana? Bibuli negamba ku enshonga emwe eri kubasa kutuma omushija n’omukazi batana, eri obushambani.—Matayo 19:9.

EKI RUHANGA ARI KUSHABA ABAZIRE

11. Ni enki eki abana bari kwenda aha bazire babo?

¹¹ Imwe bazire mwe, mugume mumare obwire muri hamwe n’abana banyu. Abana nibenda kuba hamwe n’imwe kukira ekindi kintu cona eki muri kubasa kubaha, kandi nibenda ngu mubegese ebya Yehova.—Eky’Ebiragiro 6:4-9.

12. Ni enki eki abazire bari kubasa kukora ngu barinde abana babo?

¹² Ensi ya Sitaane nekizaho kuba mbi munonga, kandi hariho abantu bingi abari kwenda kushisha abana banyu, nangwa n’okubashambanisa. Abazire bamwe eco kukiganiraho n’abana babo nikibagumira. Konka abazire bashemerire kurabura abana babo, babegesa oku bari kubasa kwerinda abo bantu babi. Imwe bazire mwe, mushemerire kurinda abana banyu.a—1 Petero 5:8.

13. Ni bata oku abazire bashemerire kwegesa abana babo?

¹³ Abazire bine omurimo g’okwegesa abana babo kugira emicwe mirungi. Ni bata oku ori kubasa kwegesa abana bawe? Abana bawe nibenda ngu obegese, konka n’obu wakubahana, toshemerire kubahana kubi ninga shi oyine ekiniga. (Yeremia 30:11) Obwe rero, otarihana omwana wawe wahurira ocayine ekiniga. Ebigambo byawe tibishemerire kuba ‘ebiri kucumita nka rurara’ kandi ebiri kubagwisa kubi. (Enfumu 12:18) Yegesa abana bawe bamanye enshonga bashemerire korobera abazire babo.—Abaefeso 6:4; Abaheburaayo 12:9-11; reba Enyongezo ya 30.

EKI RUHANGA ARI KUSHABA ABANA

14, 15. Ahabw’enki abana bashemerire korobera abazire babo?

¹⁴ Yesu akaba nayorobera Ishe omuri byona, n’omu mbera ezigumire. (Luka 22:42; Yohaana 8:28, 29) Obwe rero, Yehova nayenda ngu abana na bo borobere abazire babo.—Abaefeso 6:1-3.

¹⁵ Imwe bana mwe, n’obu mwakuhurira korobera abazire banyu kigumire, mwijuke ngu ku murabahurikize, Yehova n’abazire banyu nibabashemerererwa.b—Enfumu 1:8; 6:20; 23:22-25.

16. (a) Ni bata oku Sitaane ari kugeza abacari bato ngu bakore ebibi?(b) Ahabw’enki kiri kikuru kusharamu abanywani abari kukunda Yehova?

¹⁶ Sitaane nabasa kukoresa banywani bawe n’ab’orwingano rwawe ngu akugeze, okore ebibi. Namanya ku oyine amani mace. Ecokureberaho: Muhara wa Yakobo ori kwetwa Dina akaba ayine abanywani abatari kukunda Yehova. Eco kikamuretera akabi kingi we n’ab’eka yeye. (Okutandika 34:1, 2) Abanywani bawe baba batari kukunda Yehova, nibabasa kukugeza ngu okore ekintu eki Yehova ari kwanga, kandi eco kikakuretera obusasi bwingi, kishasha ab’eka yawe, na Ruhanga. (Enfumu 17:21, 25) Eyo ni yo nshonga oshemerire kuronda abanywani abari kukunda Yehova.—1 Abakorinso 15:33.

EKA YAWE NEBASA KUSHEMERERWA

17. Ni enki eki buri omwe omu ka ashemerire kukora ngu eka ebemu okushemererwa?

¹⁷ Ab’omu ka bona ku bari kukuratiza obuhabuzi bwa Ruhanga, niberinda akabi n’ebindi bizibu byingi. Rero waba ori omushija, oshemerire kukunda omukazi wawe kandi omwereka rukundo. Waba ori omukazi, oshemerire korobera omushija wawe kandi omuha ekitinisa, otoreza omukazi ori kugambwa omu Nfumu 31:10-31. Waba ori omuzire, oshemerire kwegesa abana bawe kukunda Ruhanga. (Enfumu 22:6) Waba ori ishe w’abana, oshemerire kuhabura ab’eka yawe ‘ori kubategeka ge.’ (1 Timoseo 3:4, 5; 5:8) Kandi imwe bana, mworobere abazire banyu. (Abakolosai 3:20) Mwijuke ku ab’omu ka bona bari kushobya; rero mugume mwecureze kandi mushabane embabazi. Mazima, Bibuli erimu obuhabuzi bwa Yehova oburi kuyamba bona abari omu ka.