Yehova nayija kukurinda

1. Ahabw’enki Yesu yashabire Yehova ngu arinde abegi beye?

OMU kiro ecabandize okufa kwa Yesu, akaba ari kutekateka aha bizibu ebi abegi beye babire barije kubugana. Ahabw’okuba yabire ari kukunda banywani beye, akashaba Ishe ngu ‘abarinde omubi.’ (Yoh 17:14, 15) Yesu akaba namanya ngu ku arimara kugaruka omu iguru, Sitaane omuregi akaba arije kugumizamu kurwanisa omuntu wena owabire ari kwenda kuhereza Yehova. Obwe rero, abahereza ba Yehova bakaba barije kwetenga oburinzi.

2. Ni enki ekiri kutuhamiza tutari kubanganisa ku Yehova arije kugarukamu eshara zitu?

² Yehova akagarukamu eshara ya Yesu ahabw’okuba namukunda. N’itwe twakora cona eki turi kubasa ngu tushemeze Yehova nayija kutukunda, agarukemu eshara zitu kandi aturinde. Ahabw’okuba Yehova ari Tata ori kutukunda munonga, aryagumizamu kutufaho. Yaba atakikozire, izina ryeye niribasa kugaywa!

3. Ahabw’enki turi kwetenga oburinzi bwa Yehova omuri obu bwire?

³ Omuri obu bwire nitwetenga oburinzi bwa Yehova kukira kare hona. Sitaane akabingwa omu iguru, ‘yija n’ekiniga kingi.’ (Kush 12:12) Akabihabiha abantu bamwe abari kutuhiganisa, yatuma batekateka ngu ‘nibakorera Ruhanga’ omurimo oguri kwera. (Yoh 16:2) Abandi abatari kwikiriza Ruhanga, nibatuhiganisa ahabw’okuba tutari kushushana na bo. Oku bakubikora kona tituri kutina. Ahabw’enki? Ni ahabw’okuba Ekigambo ca Ruhanga nikigamba kiti: ‘Mukama witu n’ow’okwesigwa; aryabagumya, kandi abarinde omubi.’ (2 Tes 3:3) Ni bata oku Yehova ari kuturinda? Reka tubirebe.

YEHOVA NATUHA EBY’OKURWANISA

4. Tukuratize ebiri omu Baefeso 6:13-17, ni enki eki Yehova yatuhire ngu kiturinde?

⁴ Yehova akatuha eby’okurwanisa ebiri kutukwasa kurwanisa Sitaane. (Shoma omu Baefeso 6:13-17.) Ebyo by’okurwanisa by’omu buryo bw’omwika byine amani kandi nibikora ge! Konka twaba turi kwenda ngu ebyo by’okurwanisa biturinde, tushemerire kubijwara kandi tukaguma tubijwire. Buri kirwaniso nikigeranisa ki? Reba tubirebe.

5. Omweko nigugeranisa ki, kandi shi ahabw’enki tushemerire kugujwara?

⁵ Omweko nigugeranisa amazima g’omu Kigambo ca Ruhanga, Bibuli. Ahabw’enki tushemerire kujwara ogo mweko? Ni ahabw’okuba Sitaane ni “ishe w’ebishuba.” (Yoh 8:44) Akamara emyaka myingi ari kubeha kandi ‘ari kugobeza ensi yona’! (Kush 12:9) Konka amazima g’omuri Bibuli nigaturinda ebyo bishuba byeye. Ni bata oku turi kubasa kujwara ogo mweko gw’akakamanyiso? Nitukikora turi kwega amazima agari kukwata ahari Yehova, turi kumuramya ‘omu [mwika] n’omu mazima’ kandi turi kuba ab’amazima omu bintu byona.—Yoh 4:24; Efe 4:25; Heb 13:18.

6. Ecoma c’okwekingiza omu kifuba ni enki, kandi shi ahabw’enki tushemerire kukijwara?

⁶ Ecoma c’okwekingiza omu kifuba nikigeranisa emisinge ya Yehova ehikirire. Ahabw’enki tushemerire kujwara ecoma c’okwekingiza omu kifuba? Nk’oku eco coma kiri kurinda omutima g’omusirikare ngu batagucumita, ni ko n’ecoma ekiri kukingiza ekifuba c’akamanyiso kiri kurinda omutima gwitu ngu eyi nsi etagushisha. (Enf 4:23) Yehova nayenda ngu tumukunde kandi tumuhereze n’omutima gwitu gona. (Mat 22:36, 37) Ni yo nshonga Sitaane ari kugezaho ngu abaganisemu omutima gwitu ari kutuma twakunda ebintu by’omu nsi ebi Yehova ari kwanga. (Yak 4:4; 1 Yoh 2:15, 16) Kandi eco cayanga, natutinatinisa ngu tushishe emisinge ya Yehova.

7. Ni bata oku turi kujwara ecoma c’okwekingiza omu kifuba?

⁷ Nitujwara ecoma c’okwekingiza omu kifuba twayikiriza emisinge ya Yehova y’ekirungi n’ekibi kandi tukagigenderaho. (Zab 97:10) Abamwe nibatekateka ngu emisinge ya Yehova eri nk’ekihome. Konka twareka kukuratiza emisinge ya Bibuli omu kubaho kwitu nituba turi nk’omusirikare ori kujura ecoma c’okwekingiza omu kifuba kandi bacari omu rutaro ngu ni ahabw’okuba yahurira kiri kuremera. Mazima naba ari omushema! Abari kukunda Yehova tibari kureba ebiragiro byeye nk’ebiri ‘kurusya,’ ahobwe nibabireba nk’ebiri kukiza amagara gabo.—1 Yoh 5:3.

8. Okujwara engito z’okwetekateka kugamba obutumwa burungi bw’Obukama nikimanyisa ki?

⁸ Nambwenu, Pawulo akagamba ngu tujware engito z’okwetekateka kugamba obutumwa burungi bw’obusinge. Eco nikimanyisa ku burijo tushemerire kuguma twetegwire kuburira obutumwa burungi bw’Obukama. Twagambira abandi obutumwa bw’omuri Bibuli, okwikiriza kwitu nikukizaho kuhama. Mazima nikitushemeza munonga kureba oku abahereza ba Yehova bari kuburira obutumwa burungi baba bari aha murimo, ah’ishomero, omu myanya y’okushuburiramu, batayayire abanyabuzare abatari Abahamya ba Yehova, omu buryo obukwatirweyo ninga shi baba barwarire omu ka. Twatina, tukareka kuburira, nituba turi nk’omusirikare ori kwihamu engito zeye bacari omu rutaro kandi eco nikituma yahutara. Ebyo nibituma yaremwa kwerinda kandi aremwa kukuratiza ebiragiro bya mukama weye.

9. Ahabw’enki tushemerire kwegura engabo yitu y’okwikiriza?

⁹ Engabo negeranisa okwikiriza oku twine ahari Yehova. Nitwesiga ku arije kuhikiriza byona ebi ari kuturaganisa. Oko kwikiriza nikutukwasa ‘kurarisa emyambi y’omuriro yona ey’omubi.’ Ahabw’enki tushemerire kwegura eyo ngabo mpango? Ni ahabw’okuba neturinda enyegesa z’abahakani kandi etuma tutacweka entege abandi batugambaho ebintu bibi. Twaba tutine okwikiriza, titurije kugira amani g’okwanga batubihabiha ngu twehuzye emisinge ya Yehova. Konka twarwanirira okwikiriza kwitu aha murimo n’ah’ishomero, nikimanyisa ku twegwire engabo yitu. (1 Pet 3:15) Twayanga omurimo oguri kushashura esente nyingi konka guri kushisha entebekanisa yitu y’okuramya Yehova, nituba twegwire engabo yitu. (Heb 13:5, 6) Kandi twagumizamu kukorera Yehova n’obu twakuba turi kuhiigwa, engabo yitu neba eri kuturinda.—1 Tes 2:2.

10. Engofira y’okujunwa ni enki, kandi shi ahabw’enki tushemerire kugijwara?

¹⁰ Engofira y’okujunwa ni amasiko agu Yehova yatuhire, ni okugamba okucungurwa kuruga omu kufa n’ekiconco c’amagara eki Yehova arije kuha abari kukora ebi ari kukunda. (1 Tes 5:8; 1 Tim 4:10; Tit 1:1, 2) Nk’oku engofira eri kurinda omutwe g’omusirikare, n’amasiko g’okujunwa nigarinda ebitekateko byitu. Bata? Ago masiko nigatukwasa kuguma tutire omutima aha biraganiso bya Ruhanga kandi gatukwasa kureba ebizibu omu buryo obuhikire. Ni bata oku turi kubasa kujwara eyo ngofira? Nitukikora twagumizamu kutekateka nk’oku Ruhanga ari kutekateka. Ecokureberaho: Tituri kuta amasiko gitu aha by’obutungi, ahobwe nitugata ahari Ruhanga.—Zab 26:2; 104:34; 1 Tim 6:17.

11. Rurara y’omwika n’enki, kandi shi ahabw’enki tushemerire kugikoresa?

¹¹ Rurara y’omwika ni Ekigambo ca Ruhanga, Bibuli. Eyo rurara eyine amani g’okutushururira ebishuba byona tukabimanya kandi nekomorora abantu baruga omu nyegesa zona z’ebishuba n’emitwarize mibi. (2 Kor 10:4, 5; 2 Tim 3:16, 17; Heb 4:12) Nitwega kukoresa eyo rurara birabire omu kweyegesa n’omu nyegesa ezi turi kutunga omu kitongore ca Ruhanga. (2 Tim 2:15) Okongera aha birwaniso ebi Yehova ari kutuha, nambwenu natuha obundi burinzi bw’amani. Ni buha?

TITUSHEMERIRE KURWANA TWENKA

12. Ni enki ekindi eki turi kwetenga, kandi ahabw’enki?

¹² Omusirikare omanyirire namanya ku atari kubasa kusingura yarwana wenka ahobwe ku nayetenga obuyambi bwa bagenzi bweye. Ni co kimwe, tituri kubasa kurwanisa Sitaane n’abashagiki beye turi twenka ngu tusingure, ahobwe nitwetenga obuyambi bwa benetata na banyanyazi. Yehova akatuha ‘benetata’ b’omu nsi yona abari kutuha obuyambi obu turi kwetenga.—1 Pet 2:17.

13. Tukuratize ebiri omu Baheburaayo 10:24, 25, enterane nizitugasira zita?

¹³ Oburyo bumwe obu turi kubasa kutungiramu obuyambi bwa benetata ni okwekwatanisa omu nterane. (Shoma omu Baheburaayo 10:24, 25.) Twaba tucwekire entege, enterane nizitugaruramu amani. Ebitekateko ebirugire aha mutima ebi benetata na banyanyazi bari kutanga nibitugaruramu amani. Za toku n’ebyokureberaho ebyegamire ahari Bibuli nibitukwasa kugumizamu turi kuhereza Yehova. Kandi ebiganiro ebi turi kugira mbere y’enterane na bwanyima yazo nibitugaruramu amani. (1 Tes 5:14) Nambwenu, enterane nizituha omugisha g’okukwasa abandi kandi eco kituma twatunga okushemererwa. (Byak 20:35; Rom 1:11, 12) Ebyo tibyo birungi ebi turi kutunga omu nterane zitu kusha. Nambwenu, nizitukwasa kuba ababurizi n’abegesa barungi. Ecokureberaho: Nizitwegesa kukoresa ge ebikoreso ebi turi kukoresa omu kwegesa abantu Bibuli. Obwe rero tebekanisa ge enterane. Omu bwire bw’enterane, ogume ohurikize ge oyetonzire. Bwanyima y’eterane, ogume ote omu nkora ebi wazegeramu. Ku orakore ebyo byona, noyija kuba ‘omusirikare murungi owa Kristo Yesu.’—2 Tim 2:3.

14. Ni buha bundi buyambi obu twine?

¹⁴ Nambwenu nitutunga obuyambi bwa ba marayika bingi kandi bine amani. Tekateka aha ki marayika omwe kusha ari kubasa kukora! (Isa 37:36) Tihariho omuntu ninga shi dayimoni eyine amani agari kukira aga marayika omwe wa Yehova. Yehova yaba ari n’itwe nituba twine amani agari kukira ag’abangi bitu bona beterine hamwe. (Bar 6:16) Eco ni amazima gijwire! Ogume oyijuke ebyo bigambo wahurira wahwamu amani ahabw’ebi omukozi mugenzi wawe, omunyabuzare ninga shi omwegi mugenzi wawe yakugambira ninga shi yakukorera. Oyijuke ku otari wenka omuri orwo rugamba. Yehova ni we okwebembire.

YEHOVA ARYAGUMIZAMU KUTURINDA

15. Tukuratize ebiri omuri Isaaya 54:15, 17, ahabw’enki abahereza ba Ruhanga batari kureka kuburira?

¹⁵ Ensi eri kutegekwa Sitaane eyine enshonga nyingi eziri kutuma yatwanga. Tituri kwejwanga omu by’obutegeki kandi tituri kuza omu ntaro. Nituburira abantu izina rya Ruhanga kandi tuburira ku Obukama bwa Ruhanga ari bwo oburije kuturetera obusinge kandi tugendera aha misinge ya Yehova ehikirire. Nituburira ku omutegeki w’egi nsi ari omubihi kandi ku ari omwisi. (Yoh 8:44) Kandi nitutangaza okucwecerezibwa kw’egi nsi ya Sitaane. N’obu Sitaane n’abashagiki beye bari kugezaho ngu bemereze omurimo g’okuburira, tibarije kugira eki bahikaho. Omu mwanya gw’eco, nitwija kukora cona eki turi kubasa kugira ngu tuhimbise Yehova! N’obu Sitaane ayine amani, tarabasize kwemereza obutumwa bw’Obukama kuhika aha bantu b’omu nsi yona. Ebyo bikamurema ahakuba Yehova ni we ori kuturinda.—Shoma omuri Isaaya 54:15, 17.

16. Ni bata oku Yehova arije kucungura abahereza beye omu bwire bw’okubonabona kwingi?

¹⁶ Ni enki ekiri kwenda kubaho juba aha? Omu kubonabona kwingi, Yehova nayija kutucungura omu buryo bubiri oburi kutangaza. Obw’okunza, nayija kutucungura omu bwire obu arituma abagabe b’ensi bacwecereza Babuloni orurembo orukuru, ni okugamba amadini gona ag’ebishuba. (Kush 17:16-18; 18:2, 4) Bwanyima, nayija kutucungura obu ariba ari kucwecereza abantu babi abariba basigireho ahari Haramagedoni.—Kush 7:9, 10; 16:14, 16.

17. Ni bata oku turi kugasirwa twaguma twine obunywani burungi na Yehova?

¹⁷ Twaguma twine obunywani burungi na Yehova, Sitaane tarije kubasa kutukorera ebintu bibi ebiri kumara obwire buringwa. Ahobwe, ni we orije kucwecerezibwa ebiro byona. (Rom 16:20) Obwe rero, jwara eby’okurwanisa byona ebya Ruhanga kandi ogume obijwire! Otarigezaho kurwanisa Sitaane n’abashagiki beye ori wenka. Shagika benetata na banyanyazi, kandi ogume oyorobere obuhabuzi bwa Yehova. Ku orakikore basyoya, noyija kwesiga ku Sho ow’omu iguru ori kukukunda arije kukugumya kandi akurinde.—Isa 41:10.