Nkatungira okushemererwa omu murimo gwa Yehova

Omwaka ogwakuratireho, tukahurira ekirango ekiri kugamba ku habire hari kwetengwa abayambi b’okuza kukora ahari Ofisi y’omuri Afurika y’amashuma, omu icapiro risaka. Nkatayo izina ryange, kandi ku bantorine kikanshemeza. Nkagenda hamwe n’abandi benetata bashatu b’ahari Beteli y’omuri Kanada ari bo Dennis Leech, Bill McLellan, na Ken Nordin. Bakatugambira ku twabire turije kumara obwire buringwa ahari Beteli y’omuri Afurika y’amashuma!

Nketa mama namugambira ku mwinire amakuru marungi. Nkamugambira ku nabire naza kuza omuri Afurika y’amashuma. Mama akaba ari omukazi oyehunamire, konka okuzire omu by’omwika kandi ayine okwikiriza. Taragambire ebintu byingi, konka nkaba nimanya ku ari kunshagika. N’obu tata na mama batarashemerirwe ahakuba nabire naza kubaza hare, konka tibarangire ensharamu eyi nabire nkozire.

NDIKUZA OMURI AFURIKA Y’AMASHUMA!

Twena oku twabire turi bana, tukabanza twaza ahari Ofisi ya Brooklyn kuhebwa amashomo agakwatirine n’okucapa. Bwanyima tukatemba obwato oburi kuza omuri Cape Town, omuri Afurika y’amashuma. Nkaba nahikize emyaka 20. Bukaba buri omu mwebazo obu twakwasire gari ya moshi eri kutwiha omuri Cape Town eri kututwara omuri Johannesburg. Tukabanza kwemerera omu katawuni kace ka Karoo, akabire kari omu mwanya g’obutayo. Hakaba hariyo omucucu kandi hari kosa. Twena tukaringuriza omu madirisa, ogo mwanya gwatutangaza. Tukebuza ebi twabire turi kuzamu! Bwanyima y’emyaka, tukagaruka kutayaya aho hantu twashanga buri obutawuni burungi kandi burimu obusinge.

Nkamara emyaka mice ndikukora ahari mashini eyabire eri kucapa za magazine z’Omunara g’Omurinzi na Musisimuke! Ofisi y’omuri Afurika y’amashuma ekaba necapa za magazini omu ndimi z’amahanga mingi g’omuri Afurika. Eri icapiro eryabire ritwihire omuri Kanada rikaba nirikoresibwa munonga!

Bwanyima, nkakora omu kishenge ecabire nikicapa ebitabo kandi kibyohereza. Nkaba nintura nyine byingi by’okukora kandi mazirwe.

NDI KUTASA KANDI NDI KUTUNGA EMIRIMO MISYA

Omu mwaka gwa 1968, nkagitwana n’omunyanyazi ori kwetwa Laura Bowen, owabire atwire hihi ya Beteli. Nambwenu akaba nakora omu kishenge c’obuhinduzi. Omuri obwo bwire, abatahize juba bakaba batari kwikirizibwa kuba omuri Beteli, obwe rero ofisi ekatuha omurimo g’okuba abapayoniya b’omutano. Nkagiramu obwoba. Bwanyima y’emyaka ikumi ndikuba ahari Beteli bari kumpa ebyokurya n’ebindi ebi nabire ndikwetenga, nkaba ninyebuza yaba nabire ndije kubasa kwefaho ndi omupayoniya w’omutano. Buri omwe akaba nahebwa dora 35 buri kwezi ku yabire nayijuza amashaha, akagaruka kutayaya kandi akatanga n’ebitabo. Omuri ezo sente tukaba nitwihamu ez’okushashura enju, ebyokurya, engendo, eby’ah’irwariro n’ebindi.

Bakatutwara kukorera omu mutwe muce ogwabire guri hihi n’etawuni ya Durban, aha nyanja y’abahindi. Hakaba hariyo abaturage bingi baba hindi ababire bagireyo omu myaka yaza 1875 kukora omu ruganda rwa sukari. Omuri obwo bwire bakaba batungire n’endijo mirimo konka bakaba bacayine omucwe g’owabo kandi bari n’okuteka ebyokurya byabo ebi bari kukunda. Ahabw’okuba babire bari kumanya Orujungu kubaburira kikaba nikitworobera.

Abapayoniya b’omutano bakaba nibashabwa kuburira amashaha 150 buri kwezi, obwe rero nyowe na Laura tukakora entebekanisa y’okuburira amashaha 6 aha izoba ry’okubanza. Hakaba hari kosa munonga. Ago mashaha mukaga tukaba nitugamara turi kuburira aha nju n’enju ahabw’okuba tukaba tutine abegi ba Bibuli. Ku hahwire obwire tutandikire, nkareba aha shaha nashanga hahwire edakika 40 kusha! Kikatuma nayebuza yaba twabire turije kubibasa.

Bwanyima tuketebekanisa ge. Buri kasheshe tukaba nitutebekanisa cayi n’omugati. Ku twabire nitwenda kuhumuramu, tukaba nitwemereza akamotoka kitu aha rubaju rw’ekiti, rero abana b’abahindi bija kutushungera. Bwanyima y’amazoba mace tukaba nitureba ebiro biri kwiruka.

Tukatunga okushemererwa ahabw’okuburira abantu b’omuri eyo teritori amazima g’omuri Bibuli! Tukabona Abahindi bari abantu barungi kandi bari kutina Ruhanga. Abahindu bingi bakaba nibakira obutumwa obu twabire nitubaburira. Bakaba nibakunda kwega aha biri kukwata ahari Yesu, Bibuli, ensi ensya erije kuba erimu obusinge n’amasiko agari kukwata aha bafire. Bwanyima y’omwaka gumwe tukaba twatungire abegi ba Bibuli 20. Buri izoba tukaba niturya n’eka emwe omu bu twabire turi kwegesa. Eco kikaba nikitushemeza munonga.

Bwanyima, tukija kutunga omurimo g’okutayayira ebibina ebyabire biri hihi n’enyanja y’abahindi. Buri sande tukaba nituba abagenyi omu ka emwe, tukora omurimo g’okuburira n’abagizire ekibina kandi tubagumya. Bakaba nibatukwata nk’ab’omu ka yabo kandi tukaba nitushemerererwa kuba hamwe n’abana babo n’amatungo agu babire batungire omu ka. Tukamara emyaka ibiri omuri ogo murimo. Bwanyima ahari ofisi bakatweta. Mwenetata akatugambira ngu: “Nitwenda ngu mugaruke ahari Beteli.” Nkamugambira ku turi kukunda omurimo ogu turimu kunuya. Konka tukaba turi kwikiriza kuza ahantu hona ahu batuta.

TURI KUGARUKA AHARI BETELI

Omurimo ogu nahirwe ku twagarukire ahari Beteli ni og’okukora omu kishenge c’eby’okuburira ahu nabire ninkora na benetata abakuzire omu by’omwika. Omuri obwo bwire ekibina kikaba nikitunga ebaruha eri kugamba ahari ripoti y’omureberezi bwanyima y’okubatayayira. Ago mabaruha gakaba gari ag’okugaruramu amani benetata n’abanyanyazi n’okubaha obuhabuzi obu bari kwetenga. Abahandiki bakaba nibakora omurimo gw’amani bari kuhindura ripoti z’abareberezi omu rurimi rw’Oruzosa, Oruzulu n’ezindi ndimi bari kuzita omu Rungereza, rero bazihindura bari kuziha omu Rungereza bari kuzita omu ndimi z’omuri Afurika. Mazima ninsima omurimo ogu abo benetata babire nibakora ahakuba bikatuma nacenga ebizibu ebi benetata b’omuri Afurika babire bari kubugana.

Omuri obwo bwire, omuri Afurika y’amashuma hakaba hariyo okushorora. Buri bwoko bw’abantu bukaba bwine omwanya ogu buri kuturamu, bituma batamara obwire n’ab’omu bundi bwoko. Benetata b’omuri Afurika bakaba nibagamba endimi zabo, baburira omu ndimi zabo kandi bekwatanisa omu bibina ebiri kukoresa orurimi rwabo.

Nkaba ntari kumanya benetata bingi b’omuri Afurika ahakuba ab’omu kibina eki nabire ndimu bona bakaba nibagamba Orungereza. Konka nkatunga omugisha g’okumanya byingi ebiri kukwata aha bantu b’omuri Afurika harimu omucwe gwabo n’emigenzo yabo. Nkamanya ebizibu ebi benetata babire bari kubugana ahabw’emigenzo y’amadini g’omu kacweka kabo. Ahabw’obumanzi bakaba nibareka emigenzo etari omu byahandikirwe kandi behanganira ab’omu maka gabo n’ab’omu kacweka kabo ababire bari kubahiganisa ahabw’okwanga kwekwatanisa na bo omu bikorwa by’obufumu! Omu byaro obworo bukaba bucwire ebintu. Abantu bingi bakaba batarashomire, konka bari kuha Bibuli ekitinisa.

Nkatunga omugisha g’okukora aha mishango emwe ekwatirine n’obugabe bwitu bw’okuramya n’okutejwanga omu by’obutegeki. Kikaba nikigaruramu amani kureba benetata abacari bato ababingirwe ah’ishomero ahabw’okwanga kushabira omu madini agandi n’okwanga kweshongora eceshongoro k’ihanga, konka bakaguma bari abesigwa kandi bine obumanzi.

Benetata b’omu ihanga eryabire niryetwa Swazilandi y’omuri Afurika bakabugana ekindi kizibu. Omugabe Sobhuza II ku yafire, abaturage bona bakagemwa kwekwatanisa omu migenzo y’okumuririra. Abashija bakaba nibeyihaho ishoki ryona, kandi abakazi baricendeza. Benetata na banyanyazi bingi bakahiganisibwa ahabw’okwanga kwekwatanisa omuri oko kuramya abafire. Okuguma bari abesigwa kikatukora aha mutima! Tukegera byingi ahari abo benetata b’omuri Afurika kugira okwikiriza n’okwehangana, kandi cagumya okwikiriza kwitu.

NDI KUGARUKA OMU ICAPIRO

Omu gwa 1981, nkashabwa kuza kuyamba omu kucapa hakoresibwe kompiyuta. Obwe rero nkagaruka omu icapiro. Kikanshemeza munonga! Omurimo g’okucapa gukaba gwahindukire. Abashubuzi bakaba bahire ofisi ecoma c’okucapa aha bwa busha kugira ngu barebe yaba kiri kukora ge. Eco kikatuma baturetera ebyoma bitano omu mwanya gwa mwenda ebi twabire nitukoresa omu kucapa. Nambwenu tukakora erindi icapiro risya. Ebintu bikaba biri kwiruka!

Za kompiyuta zikaba nizitukwasa kukoresa puroguramu eri kukwasa abahinduzi kuhandika omu ndimi nyingi (MEPS). Kwiha twaza omuri ofisi y’omuri Afurika y’amashuma turi kuruga aha y’omuri Kanada, ebyoma by’obwenge bikaguma nibiza aha murembe! (Isa 60:17) Omuri obwo bwire twena tukaba twatahize abanyanyazi bakuzire omu by’omwika kandi b’abapayoniya. Nyowe na Bill tukaba tucari ahari Beteli. Ken na Dennis bo bakaba bazire abana.

Emirimo y’ahari Ofisi ekaba eri myingi. Ebitabo ebiri kwegesa Bibuli bikaba biri kuhindurwa, biri kucapwa omu zindi ndimi, kandi biri koherezibwa omu gandi mahanga. Hakaba nihetengwa endijo nju ya Beteli. Benetata bakombeka enju omu mwanya murungi omu burugwizoba bw’etawuni ya Johannesburg, kandi yahebwa Yehova omu gwa 1987. Gukaba guri omugisha kuba omwe omu bayombekire eyo nju n’okuba omwe omu b’omuri Komiti ya ofisi ya Afurika y’amashuma.

TURI KUTUNGA OGUNDI MURIMO!

Nkatangara ku banyesire omu gwa 2001 ngu nze kukorera omuri Komiti ya ofisi y’omuri Amerika. N’obu twabire twaza kusigaho omurimo gwitu na banywani bitu omuri Afurika y’amashuma, tukashemererwa ahakuba tukaba twaza kutandika amagara masya ahari Beteli y’omuri Amerika.

Konka tukatekateka aha ku twabire twaza kusigaho mama wa Laura owabire akuzire. Tukaba tutari kubasa kumuyamba byingi turi omuri New York, konka banyanyazi ba Laura bashatu bakaba nibamufaho omu by’omubiri, omu nyehurira n’akasente. Bakatugambira ngu: “Itwe tituri kubasa kuza omu murimo g’obwire bwona, konka twareberera mama nikija kubakwasa kugumizamu omurimo gwanyu.” Mazima nitukibasimira munonga.

Nambwenu mukuru wange n’omukazi weye ababire batwire omuri Toronto omuri Kanada, bakaba nibareberera mama owabire ari omufakazi. Omuri obwo bwire akaba atwire na bo kumara emyaka eri kurenga ahari 20. Mazima nitubasima aha bwa rukundo eyi bamwerekire kandi bakamufaho kuhisya obu yafire hahwire obwire buce tuhikire omuri New York. Mazima ni omugisha kugira abanyabuzare abarikuba betegwire kugira eki bahindura omu kubaho ngu bareberere abazire babo abari kuba bakuzire n’obu kiri kuba kitorobi!

Nkamara emyaka myingi ahari ofisi y’omuri Amerika ndi kukora aha murimo g’okushohoza ebitabo, ogwagenzire niguhindahinduka kandi guri koroba. Hati ninkora omu Kishenge c’eby’okugura. Mazima ni omugisha muhango kuba mazire emyaka eri kurenga ahari 20 ndi ahari Beteli y’abakozi abari kuhika aha 5,000 n’abari kukora bari kutaha abari kuhika aha 2,000!

Omu myaka makumi mukaga ehwire, nkaba ntari kutekateka ku ndije kuhika aha. Laura akanshagika n’omutima gweye gona omuri eyo myaka yona. Tukatunga okushemererwa kwingi! Nitwesima munonga ahabw’emirimo myingi eyi twatungire na benetata abu twakozire na bo harimu ab’omuri za ofisi ezi twatayayire omu bicweka byingi by’ensi. Ahakuba nyine emyaka eri kurenga omuri 80, bakancendereza emirimo; hariho benetata abacari bato abari kubasa kukora eyo mirimo.

Omuhandiki wa zaaburi akahandika ati: ‘Ryine omugisha ihanga eri [Yehova] ari Ruhanga waryo.’ (Zab 33:12) Ago ni amazima gijwire! Mazima nikinshemeza munonga kukora n’abahereza ba Yehova abashemerirwe.