Guma oyine amasiko gahamire

1. Ni gaha masiko agu Yehova yatuhire?

YEHOVA akatuha amasiko g’omuhendo g’okwija kubaho ebiro byona. Abamwe omuri itwe, bine amasiko g’okwija kutura omu iguru bine amagara agatari kufa. (1 Kor 15:50, 53) Kandi abingi, bine amasiko g’okwija kutura omu nsi bine amagara agahikirire, n’okushemererwa. (Kush 21:3, 4) N’obu twakuba twine amasiko g’okwija kutura omu nsi ninga omu iguru, amasiko gitu ni ag’omuhendo munonga.

2. Amasiko gitu gegamire ahari ki, kandi shi ahabw’enki turi kubasa kugamba basyoya?

² Ekigambo “amasiko,” eki Bibuli eri kukoresa, nikibasa kumanyisa “okwesiga ku ebintu birungi birije kubaho.” Amasiko gitu g’omu biro by’omu misho gahamire ahabw’okuba nigaruga ahari Yehova. (Rom 15:13) Nitumanya ku yakiraganisize kandi burijo nahikiriza ebi yaraganisize. (Kub 23:19) Nitwesiga tutari kubanganisa ku ebi Yehova yaturaganisize byona arije kubikora nk’oku yabigambire. Obwe rero, titwine masiko ahabw’ebintu ebi turi kwetekatecera, ahobwe amasiko gitu gine ebihamya kandi ni ag’amazima.

3. Ni enki eki twaza kushwijuma omuri eki kicweka? (Zaburi 27:14)

³ Tata witu w’omu iguru natukunda, kandi nayenda ngu tumwesige. (Shoma omuri Zaburi ya 27:14.) Amasiko gitu gaba gahamire, nitwija kubasa kwehanganira ebizibu ebi turije kubugana omu biro by’omu misho twine obumanzi n’okushemererwa. Reka turebe oku amasiko gitu gari kuturinda. Konka reka tubanze turebe oku amasiko gitu gari kugeranisibwa n’ecoma ekiri kusika obwato hamwe n’engofira. Bwanyima nitwija kushwijuma oku turi kubasa kugumya amasiko gitu.

AMASIKO GITU NI NK’ECOMA EKIRI KUSIKA OBWATO

4. Ni bata oku amasiko gitu gari nk’ecoma ekiri kusika obwato? (Abaheburayo 6:19)

⁴ Omu baruha eyi Pawulo yahandikire Abaheburayo, akagamba ku amasiko gitu gari nk’ecoma ekiri kusika obwato. (Shoma omu Baheburayo 6:19.) Ahakuba Pawulo yabire ari kukira kugenda omu nyanja, akaba ari kumanya oku ecoma ekiri kusika obwato cabire kiri kukoresibwa kugira ngu kitume obwato bwaguma bwemerire hamwe. Izoba rimwe, obu yabire ari omu bwato, hakija omuyaga gw’amani mingi. Omuri ogo muyaga mwingi, akerebera oku abavugi b’obwato bakoresize ecoma ekiri kusika obwato kugira ngu batume bwayemerera hamwe. (Byak 27:29, 39-41) Nk’oku biri kugenda aha coma ekiri kusika obwato, amasiko gitu na go nigatuma twahamira ahari Yehova n’obu twakubugana ebizibu ebiri nk’omuyaga gw’amani mingi. Amasiko gitu nigija kutukwasa kwehanganira ebigezo ebi turi kubugana, ahakuba nitwesiga tutari kubanganisa ku birije kuhwaho. Yijuka ku Yesu yagambire ku twabire turije kuhiganisibwa. (Yoh 15:20) Obwe rero okutekateka aha bi Yehova yaturaganisize ebirije kubaho omu biro by’omu misho, nibyija kutukwasa kuguma tuhamire.

5. Ni gaha masiko agu Yesu yabire ayine obu yabire yaza kwitwa?

⁵ Reka turebe oku amasiko gakwasize Yesu kugumizamu kwehangana, omu bwire obu yabire ari hihi kufa. Ahari pantekote y’omu gwa 33 B.Y., entumwa Petero akagamba ebigambo by’obuhanuzi ebiri omu kitabo ca Zaburi ebiri kwereka amasiko agu Yesu yabire ayine. Akagamba ati: “Ahakuba torireka amagara gange omu kuzimu, n’obu kwakuba okureka ori kwera wawe. Kandi oryanyijuza okushemererwa ahabw’okutura omu misho gawe.” (Byak 2:25-28; Zab 16:8-11) N’obu Yesu yabire ari kumanya ku yabire arije kufa akaba ari kwesiga ku Ruhanga yabire arije kumuzora, kandi ku yabire arije kushemerererwa kushuba kutura n’Ishe omu iguru.​—Heb 12:2, 3.

6. Ni enki eki mwenetata omwe yagambire aha masiko?

⁶ Amasiko gitu gakakwasa benetata na banyanyazi bingi kwehangana. Reba ecokureberaho ca mwenetata w’omwesigwa ori kutura omuri Buraya ori kwetwa Leonard Chinn. Omu rutaro rwa kabiri rw’ensi yona akasibwa ahakuba yayangire kuza omu mahe. Akamara amezi abiri asibirwe wenka kandi bamukoresa emirimo egumire. Akahandika ati: “Ebyambireho bikanyijusya amasiko g’omuhendo agari kunkwasa kwehangana. Twine ecokureberaho ca Yesu, entumwa, n’abahanuzi, kandi twine ebiraganiso by’omutano by’omuri Bibuli. Ebyo byona nibituha amasiko g’ebiro by’omu misho agari kutuha amani g’okwehangana.” Amasiko gakakwasa Leonard kwehangana, kandi n’itwe nigabasa kutukwasa kwehangana.

7. Ni bata oku ebigezo biri kubasa kugumya amasiko gitu? (Abaroma 5:3-5; Yakobo 1:12)

⁷ Amasiko gitu nigakizaho kuhama twayehanganira ebigezo kandi tukerebera ku Yehova ari kutukwasa kandi ku ari kutwemera. (Shoma omu Baroma 5:3-5; Yakobo 1:12.) Obwe rero, nitugira amasiko gahamire kukira agu twabire twine obu twamanya amazima aha murundi g’okubanza. Sitane nayenda ngu ebigezo bitumaremu amani, konka Yehova natukwasa kwehanganira buri kigezo eki twakubugana.

AMASIKO GITU GARI NK’ENGOFIRA

8. Ni bata oku amasiko gari nk’engofira? (1 Abatesalonika 5:8)

⁸ Nambwenu Bibuli negeranisa amasiko gitu n’engofira. (Shoma omu 1 Batesalonika 5:8.) Omusirikare najwara engofira kugira ngu arinde omutwe gweye kuhutara. Omu rutaro rwitu rw’eby’omwika, nitwetenga kurinda ebitekateko byitu kugira ngu Sitane atabitahirira. Natutahirira n’ebigezo hamwe n’ebishuba ebiri kushisha emitecerereze yitu. Nk’oku engofira eri kurinda omutwe g’omusirikare, amasiko gitu na go nigarinda emitecerereze yitu kugira ngu tugume turi abesigwa ahari Yehova.

9. Ni enki ekiri kubaho abantu baba batine amasiko?

⁹ Amasiko gitu g’amagara agatahwaho nigatukwasa kugira obwenge n’okwetegereza. Konka nambwenu, amasiko gitu ku gari kucendera kandi tukikiriza emitecerereze y’ensi kuza omu bitekateko byitu, nitubasa kuremwa kuguma twine entego y’okutunga amagara agatwahwaho. Reba ebyahikire aha Bakristo bamwe b’omuri Korinto ya kare. Amasiko gabo omu kiraganiso ca Ruhanga c’amagara agatahwaho gakahwaho. (1 Kor 15:12) Pawulo akagamba ku abantu abatine masiko g’ebiro by’omu misho bari kuhazya ebyetengo ebi bine hati kusha. (1 Kor 15:32) Omuri obu bwire abantu bingi abatine amasiko omu biraganiso bya Ruhanga nibatorana eby’okweshemeza byona ebi barabone. Konka itwe nitwesiga amasiko g’ebiro by’omu misho agu Ruhanga yaturaganisize. Amasiko gitu gari nk’engofira y’akamanyiso eri kurinda emitecerereze yitu kandi ekaturinda kutorana eby’okweshemeza ebiri kubasa kushisha obunywani bwitu na Yehova.​—1 Kor 15:33, 34.

10. Ni bata oku amasiko gari kuturinda emitecerereze etahikire?

¹⁰ Nambwenu engofira yitu y’amasiko neturinda kutecereza ku hatariho akarungi k’okushemeza Yehova. Ecokureberaho: Abamwe nibabasa kutecereza ngu: ‘Tindije kubaho ebiro byona. N’obundi ndi omusiisi. Tindibasa kukuratiza emisinge ya Ruhanga.’ Yijuka ku munywani wa Yobu mubi, ari we Elifazi ari byo ebi yagambire Yobu. Elifazi akagira ati: “Omuntu ni kintu ki, kuba oshemire?” Akashuba yagamba ahari Ruhanga ati: “Reba, Ruhanga tayesiga abari kwera be, nangwa n’iguru tirishemire mu misho geye.” (Yob 15:14, 15) Ebyo ku ni ebishuba! Yijuka ku ori enyima y’ebyo bishuba ari Sitane. Namanya ku wata omutima ahari ebyo bishuba, okwikiriza kwawe kuri kucendera. Omu mwanya gw’eco, yerinde ebyo bishuba kandi ote omutima aha biraganiso bya Yehova. Guma oyikirize otari kubanganisa ku ari kwenda ngu obeho ebiro byona kandi ku arije kukukwasa kuhika aha ntego yawe.​—1 Tim 2:3, 4.

GUMYA AMASIKO GAWE

11. Ahabw’enki tushemerire kwehangana tutegerize ngu amasiko gitu gahikirire?

¹¹ Burijo ti ko kiri kuba corobi kuguma twine amasiko gahamire. Nitubasa kuremwa kutegereza Ruhanga. Konka, Yehova ni Ruhanga otahwaho, kandi oku ari kubara obwire nikitana n’oku itwe turi kububara. (2 Pet 3:8, 9) Nayija kuhikiriza ekigendererwa ceye omu buryo burungi, konka omu bwire obu tutari kutekateka. Ni enki ekiri kubasa kutukwasa kugumya amasiko gitu tutegerize ngu Ruhanga ahikirize ebiraganiso byeye?​—Yak 5:7, 8.

12. Tukuratize ebiri omu Baheburayo 11:1, 6, ni bata oku amasiko gine obuzare n’okwikiriza?

¹² Nitwija kuhamya amasiko gitu twaguma twine obunywani burungi na Yehova, ori kutuha ago masiko. Ahobwe Bibuli negamba ku kugira ngu tugire amasiko gahamire tushemerire kuba twine okwikiriza ku Yehova ariho kandi ku “ari kuha ebihembo abari kumurondesa batireho amani.” (Shoma omu Baheburayo 11:1, 6.) Yehova ku arabe owa buzima ahari itwe, ni bwo turayesige ku arije kuhikiriza byona ebi yaturaganisize. Reka turebe ebintu bina ebi turi kubasa kukora tukakizaho kugira obunywani burungi na Yehova, rero amasiko gitu gakaguma gahamire.

13. Ni bata oku turi kubasa kuhika hihi ya Ruhanga?

¹³ Guma oshabe Yehova kandi oshome Ekigambo ceye. N’obu tutari kubasa kureba Yehova, nitubasa kumuhika hihi. Nitubasa kugamba na we, kandi twesiga ku aratuhurire. (Yer 29:11, 12) Nitubasa kuhurikiza Ruhanga turi kushoma Ekigambo ceye kandi turi kukitecerezaho. Twashoma oku Yehova yafire aha bantu abagumire bari abesigwa ahari we omu bwire bwa kare, amasiko gitu nigahama munonga. Byona ebiri omu Kigambo ca Ruhanga “bikahandikwa kutwegesa, ngu tubone kugira amasiko ahabw’okugumisiriza, n’ahabw’okuhumuzibwa.”​—Rom 15:4.

14. Ahabw’enki tushemerire kutecereza aha bi Yehova yakorire abandi?

¹⁴ Guma otecereze aha ku Yehova yahikirize ebiraganiso byeye. Reba eki Ruhanga yakorire Aburahamu na Sara. Bakahika omu myaka ya za bukuru batakazire abana. Konka Ruhanga akabaraganisa ku babire barije kuzara omwana. (Kut 18:10) Ni bata oku Aburahamu yatwarize? Bibuli negira eti: ‘Aburahamu akikiriza, yagira amasiko ngu aryaba ishenkuru w’amahanga mingi.’ (Rom 4:18) N’obu byabire biri kurebeka nk’ebitari kubasika, Aburahamu akaba ari kwesiga ku Yehova yabire arije kuhikiriza ekiraganiso ceye. Ogo mushija w’omwesigwa tarahemukirwe. (Rom 4:19-21) Enkuru nk’ezo z’ebyabireho nizitwegesa ku turi kubasa kwesiga ngu Yehova burijo nahikiriza ebiraganiso byeye, n’obu byakuba biri kurebeka nk’ebitari kubasika ahari itwe.

15. Ahabw’enki tushemerire kutecereza aha bi Ruhanga yamazire kutukorera?

¹⁵ Guma otecereze aha bi Yehova yakukorire. Guma otecereze aha ku wagasirwe iwe ahabwawe ahabw’ebintu ebiri omu Kigambo ca Ruhanga ebyamazire kuhikirira. Ecokureberaho: Yesu akaraganisa ku Ishe burijo arije kukuha ebi oceniire. (Mat 6:32, 33) Yesu akakuhamiza ku Yehova arije kukuha omwika oguri kwera wagushaba. (Luk 11:13) Yehova akahikiriza ebyo biraganiso. Nobasa kuba ori kutecereza aha biraganiso ebi yakuraganisize kandi akabihikiriza. Ecokureberaho: Akakuraganisa ku arije kukusaasira, kukuhumuriza n’okukugaburira ebyokurya by’omwika. (Mat 6:14; 24:45; 2 Kor 1:3) Watecereza aha bi Ruhanga yamazire kukukorera, amasiko gawe nigija kuhama kandi noyija kwesiga ku arije n’okukorera ebindi omu biro by’omu misho.

SHEMERERWA OYINE AMASIKO

16. Ahabw’enki amasiko gari ekiconco c’omuhendo?

¹⁶ Amasiko gitu g’amagara agatahwaho ni ekiconco c’omuhendo eki Ruhanga yatuhire. Tutegerize n’ekihika ebiro birungi by’omu misho ebi turi kwesiga tutari kubanganisa ku biribaho. Ago masiko ni nk’ekiri kusiga amagara; nikitugumya kugira ngu twehanganire ebigezo, okuhiganisibwa, n’orufu. Nambwenu ni nk’engofira; nigarinda emitecerereze yitu kugira ngu twerinde ekibi tuhamire aha kirungi. Amasiko gitu g’omuri Bibuli nigatuma twagira obunywani burungi na Ruhanga kandi gatwereka oku ari kutukunda munonga. Nitugasirwa munonga twaguma twine amasiko kandi tukagahamya.

17. Ahabw’enki amasiko gitu gari kubasa kutuma twashemererwa?

¹⁷ Omu baruha eyi Pawulo yahandikire Abakristo ba Roma, akabahiga ‘kushemererwa bine masiko.’ (Rom 12:12) Pawulo akaba nabasa kushemererwa ahakuba akaba nayesiga ngu yaguma ayine okwikiriza, akaba arije kutunga amagara agatahwaho mu iguru. N’itwe nitubasa kushemererwa twine amasiko ahakuba nitwesiga ku Yehova arije kuhikiriza ebiraganiso byeye. Nk’oku omuhandiki wa zaburi yahandikire, ‘ahirirwe omuntu ori kuta amasiko ahari Yehova Ruhanga weye, otura ari omwesigwa ebiro byona.’​—Zab 146:5, 6.