Mbehi‘oyetegwire koroba’?

1. Ahabw’enki obumwe kiri kubasa kutugumira korobera obuhabuzi?

MBEHI nikikugumira koroba? Omugabe Dawudi na we kikaba nikimugumira, ni yo nshonga yashabire Ruhanga ngu: ‘Ompe oguri kukorobera.’ (Zab 51:12) Dawudi akaba nakunda Yehova konka obumwe kikaba nikimugumira kumworobera nk’oku n’itwe kiri kutugumira. Ahabw’enki? Ecokubanza, ni oku twaragirwe omucwe g’obugomi. Ecakabiri, Sitani naba ari kwenda ngu tugome nk’oku na we yagomire. (2 Kor 11:3) Ecakashatu, twetorwirwe n’abantu abine omwika g’okugoma, ‘ni go mwika oguri kukorera hati omu batari kuhurira.’ (Efe 2:2) Obwe rero tushemerire kutaho amani tukerinda kukora ekibi konka nambwenu twerinda kugemeserezibwa na Sitani n’eyi nsi eri kutuma twagoma. Obwe rero, twine kutaho amani tukorobera Yehova n’abu yahire obushoborozi.

2. Kuba ‘oyetegwire koroba’ nikimanyisa ki? (Yakobo 3:17)

² Shoma omuri Yakobo 3:17. Omuhandiki Yakobo akagamba ku abantu abine obwenge ari abari kuba ‘betegwire koroba.’ Eco nikimanyisa ki? Tushemerire kutaho amani kandi tukba twetegwire korobera abu Yehova yahire obushoborozi obwine obugarukiro. Konka Yehova tari kutushaba korobera abantu abari kutushaba kwehuzya ebiragiro byeye.—Byak 4:18-20.

3. Ahabw’enki Yehova ari kutushaba korobera abategeki?

³ Obumwe nikibasa kutworobera korobera Yehova kukira abantu. N’obundi Yehova burijo natuha ebiragiro ebihikire. (Zab 19:7) Konka abantu abine obushoborozi tibahikirire. N’obu kirabe kiri kisyo, Tata witu w’omu iguru akaha abazire, abategeki, n’abazehe obushoborozi obwine obugarukiro. (Emi 6:20; 1 Tes 5:12; 1 Pet 2:13, 14) Ku turi kuborobera, nituba turi nk’abayorobera Yehova. Reka turebe oku turi kubasa korobera abantu abu Yehova yahire obushoborozi n’obu obumwe kwikiriza obuhabuzi bwabo n’okubukuratiza cakuba kiri kutugumira.

GUMA OYOROBERE ABAZIRE BAWE

4. Ahabw’enki abana bingi batacayorobera abazire babo?

⁴ Abacari bato betorwirwe n’ab’orwingano rwabo ‘abari kugomera abazire babo.’ (2 Tim 3:1, 2) Ahabw’enki abingi bari kugomera abazire babo? Abazire abamwe nibashaba abana babo kukora ebintu ebi bo baremirwe kukora. Abandi nibareba obuhabuzi obu abazire babo bari kubaha nk’obwarugire aha murembe, ku butari kukora, kandi ku buri kubaremesa. Mbehi yaba ocari muto n’iwe ni ko oku ori kwehurira? Abingi nikibagumira kuta omu bikorwa ekiragiro ca Yehova ekiri kugamba ngu: ‘Mworobere abazire banyu omuri Mukama, ahakuba ni co kihikire.’ (Efe 6:1) Ni enki ekirije kukukwasa kukikora?

5. Nk’oku biri kugambwa omuri Luka 2:46-52, ahabw’enki Yesu yabire ari korobera abazire beye?

⁵ Nobasa kwega okoroba wayegera aha cokureberaho kirungi ca Yesu. (1 Pet 2:21-24) N’obu obu yabire ahikirire akaba ayine abazire abatahikirire. Konka akaba nayorobera abazire beye n’obu obumwe babire nibakora enshobe kandi batamucenge. (Kur 20:12) Reba ecabireho obu Yesu yabire ayine emyaka 12. (Shoma omuri Luka 2:46-52.) Abazire beye bakamusiga enyima obu babire bagire Yerusalemu. Yosefu na Mariya ni bo ababire bine omurimo g’okureba yaba abana babo bona bari hamwe na bo, obu babire bari kutaha. Yosefu na Mariya kubabwine Yesu, Mariya akamugambira kubi yamugambira ku ari we otumire ebyo byabaho! Yesu akaba ari kubasa kugambira nyina ku eki yakora kitahikire. Omu mwanya gw’eco akabagarukamu ge, aturize kandi ari kubaha ekitinisa. Yosefu na Mariya, ‘tibarashoborokirwe ekigambo eki yabagambire.’ Konka Yesu ‘akaguma naborobera.’

6-7. Ni enki ekiri kubasa kukwasa abana korobera abazire babo?

⁶ Imwe abacari bato, mbehi nikibagumira korobera abazire banyu bakora enshobe ninga batari kucenga ebi muri kukora? Ni enki ekiri kubasa kubakwasa? Ecokubanza, mugume mutecereze aha ku Yehova ari kwehurira. Bibuli negamba ku wayorobera abazire bawe ‘eco ni co kiri kushemeza Mukama.’ (Kol 3:20) Yehova naba nabireba abazire bawe baba batari kukucenga omu bwijwire ninga shi bakuteraho ebiragiro ebiri kurebeka nk’ebitahikire. Konka washaramu kuborobera nikimushemeza.

⁷ Ecakabiri, guma otecereze aha ku abazire bawe bari kwehurira. Ku ori korobera abazire bawe, nikibashemeza kandi bakizaho kukwesiga. (Emi 23:22-25) Eco nikija kutuma wakizaho kugirana obunywani na bo. Mwenetata w’omuri Belijiyamu ori kwetwa Alexandre akagamba ati: “Ku natandikire korobera ebi abazire bange babire nibanshaba, obunywani bwange na bo bukahinduka kandi twena twashemererwa.”b Ecakashatu, guma otecereze oku okoroba kiri kukukwasa hati n’omu biro by’omu misho. Paulo otwire omuri Burezili, akagamba ati: “Okwega korobera abazire bange kikankwasa korobera Yehova n’okorobera abandi abine obushoborozi.” Ekigambo ca Ruhanga nikituhiga korobera abazire bitu. Nikigamba ku twakikora ‘turije kuba ge, tukahangara omu nsi.’—Efe 6:2, 3.

8. Ahabw’enki abacari bato bingi bari kusharamu korobera abazire babo?

⁸ Abacari bato bingi bakerebera oku kiri kubagasira bayoroba. Luiza, na we w’omuri Burezili, omu kubanza kikaba nikimugumira kwehuriza enshonga ahabw’enki abazire beye batari kumwikiririza kukoresa esimu. Akaba natecereza ngu, konka shi ab’orwingano rwange bo ku bazine. Konka bwanyima akerebera ku abazire beye babire bari kumurinda. Akerebera ku korobera abazire beye kitari omutwaro, ahobwe ku obuhabuzi obu bari kumuha ari bwo obu yabire ari kwetenga. Omunyanyazi ori kwetwa Elizabeth w’omuri Amerika obumwe nikimugumira korobera abazire beye. Akagamba ati: “Obumwe ku ndi kuba ntari kwetegereza enshonga abazire bange bataho ekiragiro nanka nikituma natecereza aha biragiro ebi bampire nkabikuratiza kandi bikanyamba.” Monica otwire omuri Arumeniya, akagamba oku biri kumugasira yayorobera abazire beye omu mwanya g’okubagomera.

GUMA OYOROBERE ‘ABARI KUTEGEKA’

9. Ni bata oku abantu bingi bari kwehurira aha bikwatirine n’okorobera ebiragiro?

⁹ Abantu bangi nibikiriza ku turi kwetenga abategeki kandi ku tushemerire korobera bimwe omu biragiro ebi ‘abakama abari kutegeka’ bari kutuha (Rom 13:1) Konka abamwe nibasharamu kugomera bimwe omu biragiro ebi bari kutuha ebiri kurebeka nk’ebitahikire ninga shi ebiri kurebeka nk’ebi bari kutushaba ebirengire. Reka tukwate ecokureberaho aha bikwatirine n’okushashura emishoro. Omu makuru agayorekirwe, gakereka ku “kimwe ca kana c’abantu b’omu ihanga rimwe ry’omuri Buraya abu bacondorizeho, bari kwikiriza ku omuntu ayine obugabe bwo kwanga kushashura omushoro, yatecereza ku gutahikire.” Tikiri kutangaza kureba ku abaturage bari kushashura bibiri bya kashatu by’emishoro eyi abategeki bari kubashaba.

10. Ahabw’enki tushemerire korobera ebiragiro n’obu byakuba bitari kutushemeza?

¹⁰ Bibuli negamba ku obutegeki bw’abantu oburi kuretera abantu kubonabona obwebembirwe na Sitani, burije kurugaho juba aha. (Zab 110:5, 6; Mub 8:9; Luk 4:5, 6) Nambwenu, Bibuli negamba ngu: ‘Ori kugomera obutegeki, naba agomire eki Ruhanga yatireho.’ Yehova nayikiririza abategeki kutegeka kugira ngu ate ebintu omu buryo kandi natushaba ngu tuborobere. Obwe rero tushemerire ‘kubaha ebibashemerire’ harimu emishoro, ekitinisa, n’okuborobera. (Rom 13:1-7) Obumwe hine obu turi kureba ekiragiro kitahikire ninga shi kigumire kucorobera. Konka nitworobera Yehova ahakuba natushaba korobera abategeki baba batari kutushaba ebintu ebiri kwita ebiragiro byeye.—Byak 5:29.

11-12. Nk’oku biri kugambwa omuri Luka 2:1-6, ni enki eki Yosefu na Mariya bakozire kugira ngu borobere ebiragiro kandi shi ni enki ecarugiremu? (Nambwenu reba ekishushani.)

¹¹ Nitubasa kutoreza ecokureberaho ca Yosefu na Mariya ababire bari kuba betegwire korobera obutegeki n’obu obumwe cabire kiri kuba kibagumire. (Shoma omuri Luka 2:1-6.) Obu Mariya yabire ayine enda, eyine nk’amezi mwenda, we na Yosefu bakashabwa kukora ekintu ecabire kiri kubashaba kwereka okoroba. Ogusito owabire ari kutegeka obutegeki bwa Roma akataho ekiragiro c’okubarura abantu. Yosefu na Mariya bakaba bashemerire kukora orugendo oruri kwingana na kiromita 150 bari kuraba omu mishozi bari kuza Yerusalemu. Orwo rugendo rukaba rugumire namunonga ahari Mariya owabire ayine enda nkuru. Yosefu na Mariya nibabasa kuba babire bemerize omutima ahabw’amagara ga Mariya n’omwana owabire atakazirwe. Mbehi bikaba biragende bata kuri Mariya ebisha byamukwatire omu muhanda? Oyijuke ku yabire arije kuzara Mesiya. Mbehi eco kikaba kiramubere orwekwaso rero kituma atayorobera ebiragiro?

¹² Yosefu na Mariya tibarikirize ekintu cona ngu kitume batayorobera eco kiragiro. Yehova akabaha omugisha ahabw’oko koroba. Mariya akahika ge Betelehemu, yazara omwana oyine amagara marungi kandi eco kikamukwasa kuhikiriza obuhanuzi bw’omuri Bibuli!—Mik 5:2.

13. Oku turi koroba nikikwata kita aha bandi benetata?

¹³ Ku turi korobera abategeki nikitugasira kandi kigasira n’abandi. Bata shi? Nibiturinda kuhikwaho n’ekihano ekiri kuhika ahari abo abari kwanga korobera ebiragiro. (Rom 13:4) Ku turi koroba nikituma abategeki bareba ge Abahamya ba Yehova b’omu nsi yona. Ecokureberaho: Omu myaka eyahwire omuri Nayijeriya abasirikare bakataha omu Nju y’Obukama omu bwire bw’enterane, bari kuronda abantu ababire bari kwesharinga batari kwenda kushashura emishoro. Konka omwebembezi akagambira abasirikare ngu: “Aho muhesize, nimanya ku Abahamya ba Yehova bari kushashura emishoro.” Burijo ku ori korobera ekiragiro nikikuhesa izina rirungi kandi kikwasa n’abandi Bahamya ba Yehova b’omu nsi yona obundi bwire.—Mat 5:16.

14. Ni enki ecakwasize munyanyazi ‘korobera abategeki’?

¹⁴ Konka na bwo hine obu kiri kubasa kutugumira korobera abategeki. Munyanyazi ori kwetwa Joanna w’omuri Amerika akagamba ati: “Kikaba nikingumira koroba ahabw’okuba bamwe omu b’omu ka yange bakahikwaho n’obutariburinganiza birabire aha bategeki.” Konka Joanna akakora cona ekiri kubasika kugira ngu ahindure emitecerereze yeye. Ecokubanza, akemereza kushoma ebintu by’aha mbuga z’okuganiriraho ebyabire biri kubasa kutuma yareba kubi abategeki. (Emi 20:3) Ecakabiri, akashaba Yehova ngu amukwase kumwesiga omu mwanya g’okurondera empinduka omu bategeki b’abantu. (Zab 9:9, 10) Ecakashatu, akaba nashoma ebicweka by’omu bitabo byitu ebiri kugamba aha kutagwera rubaju. (Yoh 17:16) Joanna hati nagamba ngu: “Okuha ekitinisa abategeki n’okuborobera kikandetera obusinge.”

GUMA OYOROBERE OBUHABUZI OBURI KURUGA AHA KITONGORE CA YEHOVA

15. Ahabw’enki kiri kubasa kutugumira korobera obuhabuzi obu turi kuhebwa n’ekitongore ca Yehova?

¹⁵ Yehova natushaba kuhuririra abebembezi bitu kandi tukaborobera omu kibina. (Heb 13:17) N’obu Yesu Omwebembezi witu ahikirire, abu ari kukoresa ngu batwebembere hanuya omu nsi bo tibahikirire. Obumwe nikitugumira kuborobera batushaba kukora ekintu eki itwe tutari kwenda kukora. Hine n’obu n’entumwa Petero camugumire koroba. Obu marayika yamushabire kurya enyamishwa ezabire ziri kuzira tukuratize ebiragiro bya Musa, Petero akabyanga emirundi ishatu yona! (Byak 10:9-16) Ahabw’enki? Ni ahabw’okuba eco kiragiro kisya akaba atari kukicenga ge. Akaba amanyirire oburyo oburi kutana n’obwo bw’okukoramu ebintu. Mazima yaba Petero camugumire korobera obuhabuzi obu marayika owabire ahikirire yabire yamuha, n’itwe nikibasa kutugumira korobera obuhabuzi obu turi kuhebwa n’abantu abatahikirire!

16. Nobu Pawulo yatungire obuhabuzi obu atari kucenga ge ni enki ekiyakozire? (Ebyakozirwe 21:23, 24, 26)

¹⁶ Entumwa Pawulo akaba ‘ayetegwire koroba’ n’obu yakutunga obuhabuzi obu atari kucenga ge. Abakristo b’Abayudaya bakaba bahurire ebishuba ebiri kugamba ku Pawulo yabire ari kwegesa ‘kureka ebya Musa’ n’’okugomera ebiragiro bya Musa’. (Byak 21:21) Abakuru b’omuri Yerusalemu bakaragira Pawulo kukwata abashija bana akabatwara omuri hekalu bakaza kweyeza kugira ngu ayereke ku yabire nayorobera ebiragiro. Konka Pawulo akaba namanya ku Abakristo batacagendera aha biragiro bya Musa. Obwe rero, tihine enshobe n’emwe eyi yabire yakozire. Konka nabwo Pawulo tarabyangire. ‘Pawulo akakwata abo abashija, ku bwasheshire yayeyeza na bo.” (Shoma omu Byakozirwe 21:23, 24, 26.) Okoroba kwa Pawulo kukaretaho obumwe.—Rom 14:19, 21.

17. Ni enki eki wayegera aha cokureberaho ca Stephanie?

¹⁷ Omunyanyazi ori kwetwa Stephanie kikamushaba obwire buringwa kugira ngu agume kwikiriza ensharamu ezi abazehe b’omu ihanga ryeye babire nibakora. We n’omushija weye bakaba nibashemerererwa kuhereza omu mutwe oguri kukoresa orundi rurimi. Bwanyima ofisi ekemereza ogo mutwe rero bagaruka omu kibina cabo. Stephanie akagamba ati: “Kikanshasha munonga, ahakuba nkaba nindeba ekibina kitu kitari kwetenga obuyambi bwingi.” N’obu byagenzire basoya akasharamu kushagika obwo buhabuzi obwabire buri busya. Akagamba ati: “Obwire ku bwahikire nkerebera ku eyo yabire ari ensharamu y’obwenge.” Tukabera Abakristo bingi abazire b’omu buryo bw’omwika b’omu kibina kitu. Ninyegesa na munyanyazi owabire yafukirire kandi hati nintunga obwire oburi kumara bw’okweyegesa.” Akongeraho ati: “Hati nyine omuntuwomunda otari kucwera orubanja ahabw’okuba nimanya ku ndi kukora cona eki ndi kubasa ngu nyorobere obuhabuzi.”

18. Ni eha migisha eyi turi kutunga ku turi koroba?

¹⁸ Nitubasa kwega okoroba. Yesu ‘akega koroba,’ birabire ‘omu bi yabonabonesibwemu.’ (Heb 5:8) Kimwe na Yesu n’itwe tukunzire kwega okoroba twaraba omu bizibu. Ecokureberaho: Mbehi kikakugumira koroba omu bwire bw’ecorezo ca COVID-19 ku batuzibire kuteranira omu Nju z’Obukama n’okwekwatanisa omu murimo g’okuburira aha nju n’enju? Oko koroba kukakurinda, kwatuma wakizaho kugirana obumwe n’Abakristo bagenzi bawe kandi bikashemeza Yehova. Twena hati tuketegura korobera obuhabuzi obu turije kutunga omu bwire bw’okubonabona kwingi. Nitwija kurokoka birugire ahari oko koroba!—Yob 36:11.

19. Ahabw’enki ori kwenda kuguma ori koroba?

¹⁹ Twayega ku koroba biri kuturetera emigisha myingi. Konka enshonga y’okubanza eri kutuma twayorobera Yehova ni ahabw’okuba turi kumukunda kandi turi kwenda kumushemeza. (1 Yoh 5:3) Tituri kubasa kubona eki turi kubasa kuha Yehova ekiri kwingana n’ebi yatukorire. (Zab 116:12) Konka nitubasa kumworobera kandi tworobera n’abu yatireho ngu batwebembere. Ku turi koroba nituba twayereka ku turi abanyabwenge. Kandi twagira obwenge nikishemeza omutima gwa Yehova.—Emi 27:11.