Hulda akahika aha ntego yeye

KURI watayayire ekirwa kice ca Sangir Besar c’omuri Indonejiya omu myaka mice ehwire, okaba orashange ahari eco kirwa abanyanyazi bashatu b’Abakristo. Nibamanywa munonga ahari eco kirwa, ahakuba bakaba nibahaburira bari kukwasa abantu kushoborocerwa Bibuli. Konka hine obwire obu bakozire ekintu ekiri kutana n’eco.

Bakaza omu nyanja bayihamu amabare bari kugata aha mushenyi. Gamwe omuri ago mabare okaba noshanga gari mahango gari kwingana n’omupira. Abo bakazi bakaba nibwakwata ago mabare bagatagura bakoresize enyundo, bihamo otubare tuce oturi kwenda kwingana n’amahuri g’enkoko. Bakaba nibakwata otwo tubare batupakira omu tudobo tuce, rero batutwara aha muhanda hihi y’ahu babire batwire. Bwanyima bakaba nibagata omu bideyi bihango, rero bagapakira emotoka kugira ngu gaze kukoresibwa omu kombeka emihanda.

Omwe omuri abo banyanyazi ni Hulda. Embera ezi yabire arimu zikamwikiririza kukora ogo murimo kukira abandi. Obushangirwe akaba nayihamo esente zo kukoresa omu kuronda ebi ab’omu ka yeye bari kwetenga. Konka obwo bwire, hine ekindi kintu eki yabire ari kwenda. Akaba ari kwetenga tabuleti kugira ngu agume kuyikoresa ahari JW Library^®. Hulda akaba ari kumanya ku vidiyo hamwe n’ebitabo ebiri ahari eyo porogaramu, byabire birije kumukwasa omu murimo g’okubirira n’okushoborocerwa Bibuli.

Hulda akaba nakora amashaha abiri buri kasheshe omu bwire bw’okwezi n’ekicweka, kugira ngu abase kuhonda amabare agari kubasa kwijura akamotoka kace. Bwanyima, akamara yahisa esente zo kugura tabuleti.

Hulda akagamba ati: “N’obu nabire ndi kuhurira nduhire ahabw’okumara obwire buringwa ndi kuhonda amabare, nkahika ndikwebwa obwo busaasi bwona ku namazire kubona tabuleti yange, ahakuba nkaba ningikoresa omu kuburira hamwe n’omu nterane.” Nambwenu akagamba ku eyo tabuleti yamukwasize munonga omu bwire bw’ecorezo, ahakuba ebikorwa byingi by’omu kibina bikaba nikorwa hakoresibwe ebyoma bya karimagezi. Mazima n’itwe twayesimira kuba Hulda yahikire aha ntego yeye.