ENKURU Y’EBYABIREHO
Nkatungira oburinzi obwa buzima omu kwesiga Yehova
ABANTU ku bari kumbuza ebi nakozire omu kubaho kwange, akingi nimbagarukamu ngu: “Ndi omutwaro omu mikono ya Yehova!” Nabagambira basyo, nimba ndi kwenda kubamanyisa ku nashaziremu kukoresa amagara gange, ahu ari ho hona, ahu Yehova n’ekitongore ceye babire bari kunkoresa. Nkikiriza emirimo myingi, harimu n’eyabire eri kubasa kuta amagara gange omu kabi. Konka, nkamanya ku okwesiga Yehova ari byo ebyabire nibituma natunga oburinzi obwa buzima.
OKU NAMANYIRE YEHOVA N’OKU NATANDIKIRE KUMWESIGA
Nkazarwa omu mwaka gwa 1948 nazarirwa omu kacweka kace k’omuburengerwizoba bw’omu mashuma ga Nayijeriya. Omuri obwo bwire, murumuna wa Tata owabire ori kwetwa Moustapha, hamwe na mukuru wange owabire ori kwetwa Wahabi, bakabatizibwa baba Abahamya ba Yehova. Obu nabire nyine emyaka mwenda, tata akafa. Eco kikanshasha munonga. Wahabi akangambira ku twabire turayongere kubona tata yazoka. Ebyo bigambo ebiri kuhumuriza ni byo ebyatumire natandika kwega Bibuli. Nkabatizibwa omu mwaka gwa 1963. Abandi bojo bashatu abu turi kizarwana na bo bakabatizibwa.
Omu mwaka gwa 1965, nkaza kutura na mukuru wange ori kwetwa Wilson omuri Lagos, kandi twagirana obunywani n’abandi bapayoniya b’obwire bwona b’omu kibina ca Igbobi. Okushemererwa oku babire bine n’amani agu babire nibata omu murimo g’okuburira bikankora aha mutima, rero omu Kokubanza 1968, nanye naba omupayoniya.
Mwenetata owabire ari kukora ahari Beteli, ori kwetwa Albert Olugbebi, akakora enama y’omutano n’abacari bato, rero yatugambira ku hari kwetengwa ba payoniya b’omutano b’okuza kuburira omu matemba ga Nayijeriya. Ncayijuka oku mwenetata Olugbebi yatugambire n’ekihika ngu: “Mucari bato, kandi nimubasa kukoresa obwire bwanyu n’amani ganyu omu kukorera Yehova. Hariho byingi by’okukora!” Nkatoreza omuhanuzi Isaya owabire ayine omwika g’okwehayo, nayikiriza kwijuza fomu y’okuba omupayoniya w’omutano.—Isa 6:8.
Omu Kwakatano 1968, nkaba omupayoniya w’omutano omu tawuni ya Kano omu matemba ga Nayijeriya. Omuri obwo bwire hakaba hariyo orutaro rwa Biafran (ni okugamba omuri 1967-1970), ebyo bikatuma abantu bingi babonabona, bafa, kandi abingi bafurukira omu burugwizoba bwa Nayijeriya. Hariho mwenetata owagerizeho kunzibira kuzayo. Konka nkamugambira ngu: “Waba wakora ahabw’obuhabuzi obu wampa. Konka, yaba Yehova ari kwenda ngu nze kukora ogu murimo tinkabyanga, kandi ninyesiga ku ari hamwe nanye.”
NKESIGA YEHOVA OMU BWIRE OBU NABIRE NDI OMU KACWEKA AKARIMU ORUTARO
Kikanshasha munonga, kureba ebyabire biri kubaho omuri Kano. Orwo rutaro, rukashisha byingi omuri eyo tawuni mpango. Ku twabire nituza kuburira, tukaba nituraba aha mirambo y’abantu abafire ahabw’orwo rutaro. N’obu omuri Kano habire harimu ebibina byingi, abingi omuri benetata na banyanyazi bakaba bahungire. Hakaba hasigireyo ababurizi abatahikire n’ahari 15, kandi na bo bakaba bacwekire entege, bine obwoba. Abo benetata bakashemererwa munonga, ku twahikireyo turi abapayoniya b’omutano mukaga. Abo baburizi bakashuba kugira amani. Tukabakwasa kushuba kugira entebekanisa y’ebyomwika, bashuba kusindika ripoti zabo z’okuburira ahari ofisi n’okutumiza ebitabo.
Twena bapayoniya b’omutano, tukatandika kwega orurimi rw’Oruhawusa. Abantu bingi ku bahurire obutumwa bw’Obukama omu rurimi rwabo, kikatuma batuhurikiza. Konka, abanyamadini tibarayesimire omurimo g’okuburira, obwe rero kikaba nikitushaba kugira obwenge. Izoba rimwe, nyowe n’owu twabire tugenzire hamwe kuburira, hine omushija owayizire kuturwanisa ayine omusyo. Ekiri kushemeza, tukiruka twamusiga tiyatukwata! Omuri ezo mbera zigumire, Yehova akagumizamu kuturinda, kandi ababurizi batandika kweyongera. (Zab 4:8) Omuri obu bwire, omuri Kano harimu ababurizi abari kurenga 500 abari omu bibina 11.
TURI KUHIGANISIBWA OMURI NIJERI
Obu nabire ndi omupayoniya w’omutano omuri Niamey, Nijeri
Bwanyima omu Kwamunana 1968, obu nabire mazire amezi mace omuri Kano, bakanyohereza omuri Niamey, etawuni nkuru ya Nijeri, ngu nze kukorana n’abandi bapayoniya babiri b’omutano. Bwanyima, ni bwo obu twamanyire ku Nijeri y’omuburengerwizoba bwa Afrika, ari kamwe omu tucweka oturi kutagata munonga omunsi. Oyihireho okwehanganira obwo butagasi, tukaba tushemerire n’okwega orururimi rw’Orufurenci orwabire ruri kukoresibwa munonga omuri ako kacweka. N’obu twabire twine ebyo bizibu byona, tukesiga Yehova twatandika kuburira omuri eyo tawuni tukwatanisizize n’ababurizi ababire batwiremu. Bwanyima y’obwire buce, omuntu wena owabire ori kubasa kushoma w’omuri Niamey, tukamuha ekitabo ecabire nikikwasa abantu kwega Bibuli ekiri kwetwa “Amazima agari kuhisya aha magara agatahwaho” (The Truth That Leads to Eternal Life). Abantu bakaba nibija n’okutweshabira eco kitabo!
Hatakahwire obwire, tukamanya ku abategeki babire batari kwesimira omurimo gw’Abahamya ba Yehova. Omu Kwamushanju 1969, ni bwo obu twakozire ekiterane c’okubanza omuri ako kacweka kandi tukaba turi abantu nka 20. Tukaba tutegerize n’ekihika, kureba oku ababurizi babiri basya barabatizibwe. Konka ah’izoba ry’okubanza ry’ekiterane, abaporisi bakija batwemereza. Bakakwata bapayoniya b’omutano n’omureberezi ori kutayayira ebibina, batutwara ahari porisi. Ku bamazire kutubuza ebibuzo byingi, bakaturagira kugaruka ah’izoba eryabire rirakurateho. Tukareba ku abategeki babire bari kubasa kuteza ebizibu rero twatebekanisa oku turatange toku y’okubatizibwa omu ka emwe, kandi ababire barabatizibwe babatirizibwa omu mugera bweshereke.
Bwanyima y’esande nce, nyowe n’abandi bapayoniya batano b’omutano bakatubinga omuri ako kacweka. Bakatuha amashaha 48 g’okuba twarugire omu ihanga kandi tuketegera. Tukorobera abo bategeki twaruga omuri eryo ihanga, twaza ahari ofisi ya Nayijeriya, ahu twahibwe emirimo misya.
Bakahika bari kunyohereza omuri Nayijeriya omu kacweka ka Orisunbare, ahu nayekwatanisize omu murimo g’okuburia ndi hamwe n’ababurizi bace ababire batwireyo. Konka ku namazire amezi mukaga, ofisi ekanshaba kugaruka omuri Nijeri. N’obu byantungwire kandi bikantinisa, nkikiriza rero naza kushuba kubugana na benetata na banyanyazi b’omuri Nijeri!
Nkagaruka omu kacweka ka Niamey. Ku hahwireho ekiro kimwe mpikireyo, hariho omushubuzi w’omuri Nayijeriya owamanyire ku ndi Omuhamya wa Yehova kandi yatandika kumbuza ebibuzo byingi ahari Bibuli. Nkamwegesa Bibuli, yareka kuresa no kunywa amarwa mingi, rero yabatizibwa. Bwanyima, nkesimira oku omurimo gwagenzire guri kutunguka omu tucweka twingi omuri Nijeri. Nkahika omuri eryo ihanga hariyo Abahamya 31, konka nkaza kurugayo bahikire 69.
“TITURI KUMANYA BYINGI AHA BIKWATIRINE N’OMURIMO G’OBUKAMA OMURI GINEYA”
Bwanyima omu mwaka gwa 1977, nkagaruka omuri Nayijeriya kugira ngu nze kumanyizibwa. Bwanyima y’esande ishatu ndi kumanyizibwa, mwenetata owabire ari omubuganisa wa Komiti ya Ofisi, ori kwetwa Malcolm Vigo, akampa ebaruha eyabire yaruga ahari ofisi ya Sierra Leone yashaba kugishoma. Bakaba bari kwenda mwenetata w’omupayoniya, oyine amagara marungi, otakatahize, ori kumanya kugamba Orujungu n’Orufurenci kugira ngu aze kuba omureberezi ori kutayayira ebibina omuri Gineya. Mwenetata Vigo akangambira ku babire barije kumanyiza ogo murimo. Konka nambwenu akangambira ku ogo murimo gwabire gutari ogo kuzanisa. Akanshaba ngu kitecerezeho nyetonzire mbere y’okukikiriza. Nkahika ndi kumugarukamu ngu: Yaba ari Yehova owanyoherezayo, ninzayo.”
Nkakwata endege naza omuri Sierra Leone kandi nabugana na benetata b’ahari ofisi. Omwe omu babire bagizire komiti ya ofisi, akangambira ngu: “Tituri kumanya byingi aha murimo g’Obukama oguri kukorwa omuri Gineya.” N’obu eyo ofisi ari yo eyabire eri kureberera omurimo g’omuri Gineya, bakaba batari kubasa kumanya amakuru g’ababurizi ahabw’ebizibu by’eby’obutegeki ebyabire biriyo. Bakaba bagerizeho koherezayo benetata ngu batayayire eryo ihanga konka byarema. Bwanyima, nkashabwa kuza omu tawuni nkuru ya Gineya, eri kwetwa Conakry, kugira ngu nshabe oruhusya rw’okuturayo.
“Yaba ari Yehova owanyoherezayo, ninzayo”
Ku nahikire omuri Conakry, nkaza ahari embase ya Nayijeriya rero nabugana na ambasada waho. Nkamugambira ecetengo eki nabire nyine c’okuburira omuri Gineya. Akandabura ku nabire ntashemerire kuturayo ahakuba babire bari kubasa kunsiba ninga bangirira kubi. Akangambira ngu “Yegarukire omuri Nayijeriya obe ni ho ahu waburira.” Konka nkamugarukamu ngu: “Nasharamu kuguma kunu.” Obwe rero akahandikira gavumenti y’omuri Gineya ari kuyishaba kunkwasa, kandi mazima bakankwasa.
Bwanyima nkagaruka ahari ofisi ya Sierra Leone rero nabagambira ensharamu eyi ofisi yabire ekozire. Benetata bakashemererwa munonga ku bamanyira ku Yehova yampire omugisha omuri orwo rugendo. Nkaba nayikirizibwa kutura omuri Gineya!
Obu nabire ndi kutayayira ebibina omuri Siyera Lewone
Kwiha omu mwaka 1978 kuhisya 1989, nkaba omureberezi ori kutayayira ebibina omuri Gineya na Sierra Leone, kandi naba n’ori kusimbura omuri Liberia. Omu kubanza nkaba ninkunda kurwaragurika. Kandi ebyo bikaba nibikunda kumbaho ndi omu tucweka tw’ecaro. Konka benetata bakaba nibakora ebiri kubasika byona bantwara ah’irwariro.
Izoba rimwe, nkarwara malariya yayenda kunyita, kandi nkayirwarira rimwe n’enjoka. Ku namazire kukira nkamanya ku benetata babire bari kuganira aha ku babire barije kunzika ahabw’okuba bakaba bari kutecereza ku ndafe! Omuri ezo mbera zigumire ezi narabiremu, tindatecereze kureka omurimo ogu nahirwe. Kandi nkagumizamu kwikiriza ku oburinzi obwa buzima buri kuruga ahari Ruhanga ori kubasa kutuzora twafa.
TURI KWESIGA YEHOVA NK’EKA
Ah’izoba ry’obugenyi bwitu omuri 1988
Omu mwaka gwa 1988, nkabugana na Dorcas, omunyanyazi ori kwecureza munonga, kandi w’omupayoniya okuzire omu by’omwika. Tukagitwa, rero yankwasa omu murimo g’okutayayira ebibina. Dorcas akakwasa munonga kandi akaba naba ayetegwire kwehayo omu murimo gwa Yehova. Tukaba nitukora za kilomita zirengire 25 kugira ngu tuhike omu kibina, kandi tugenda twegwire n’ebikapa byitu. Ku twabire nitutayayira ebibina bya hare, tukaba nitutega tukoresize oburyo obu twabona, ninga tugenda n’amaguru omu mihanda mibi erimu ebyondo.
Dorcas ni omukazi oyine obumanzi. Ecokureberaho: Obumwe tukaba nitwambuka emigera erimu engona. Hariho obu twakozire orugendo rw’ebiro bitano kandi twayambuka omugera tukoresize obwato, ahakuba ekiraro kikaba kicwekire. Dorcas akaza kuruga omu bwato yagwa omu mizi rero yatobera. Twena tukaba tutari kumanya koga, kandi omuri ago mizi hakaba harimu engona. Ekiri kushemeza, hakija abasigazi bamwihamu. Bwanyima tukagumizamu kurota ebyo bintu ebyatubireho, konka eco tikiratuzibire kukora omurimo gwitu.
Abana bitu, Jahgift na Eric, bakatubera ebiconco ebiri kuruga ahari Yehova
Omu ntandikiro z’omwaka gwa 1992, tukatungurwa no kumanya ku Dorcas yabire ayine enda. Mbehi ogo gukaba guri omuheru g’omurimo gwitu g’obwire bwona? Tukatecereza ngu: “Eki ni ekiconco eki Yehova yatuha!” Obwe rero, tukasharamu kweta muhara witu ngu Jahgift eriri kumanyisa ngu: Ekiconco ca Yehova. Obu twabire tumazire emyaka ina tuzire Jahgift tukanazara munyanya weye Eric. Bona bakatubera ebiconco ebiri kuruga ahari Ruhanga. Muhara witu obumwe nakora ahari ofisi y’obunduzi ya Conakry, kandi Eric ni omuhereza w’ekibina.
N’obu Dorcas yayemerize omurimo g’obupayoniya bw’omutano akagumizamu kuba omupayoniya w’obwire bwona ari kurera n’abana bitu. Yehova akankwasa nyowe nagumizamu kukora omurimo g’obupayoniya bw’omutano. Abana ku bamazire kukura, Dorcas na we akongera yaba omupayoniya w’omutano. Hati twena turi abamishonari omuri Conakry.
OBURUGO BW’OBURINZI OBWA BUZIMA
Burijo, nkaba ninza ahu Yehova yanyohereza. Akingi nyowe n’omukazi wange tukaba nitwerebera oku ari kuturinda n’emigisha eyi ari kutuha. Okwesiga Yehova bikaturinda ebizibu ebiri kuhika aha bantu abari kwesiga obutungi. Nyowe na Dorcas ebyatubireho bikatwegesa ku oburugo bw’oburinzi obwa buzima ari “Ruhanga omujuni witu,” Yehova. (1 Bus 16:35) Nimpamya ku omuntu wena ori kumwesiga arije kumurinda, nk’oku omuntu ari kufa aha kintu c’obuguzi bwingi kugira ngu kitasisikara.—1 Sam 25:29.