¿Kámba ni resultadu u tɨsí al ubíntik ni aj Satanás?

Aj Adán tʼo ij Eva chɨmijoʼb kʼa mach u tsʼonbijob ni Dios (Génesis 3:6, 23)

Ij Eva u tsʼoni u tʼan ni chan i u kʼuxí u jut de jimba teʼ ke elbintik ke mach utʼs u kʼuxeʼ. De yai u ɨbi aj Adán u jut ni teʼ, i cheʼchi une u kʼuxí.

Lu ke u chijob mach utʼs: umpʼe pekadu. Dios u tikʼi aj Adán tʼo ij Eva, mach kolobijoʼb tan jardín.

Ni kuxle sujní difícil ta unejob i ta u bijchʼokob. Tʼo ni tiempu, a noxibijoʼb i a laj chɨmijoʼb. Mach bixijob tɨ cielu, i ni umpʼe lugar; u yektijob kuxle.

Ni aj chɨmejob u sujnéjob de pupuʼkaʼb i mach u chejob pode u chen ni umpʼe kosa (Génesis 3:19)

Ke petela a ke tela de aj Adán tʼo ij Eva. Jinukʼa, cheʼchi kɨ petela a kɨ chɨmola. Aj chɨmejob maniʼ u chejob chanen, ni u yubínob ni puede u chenob ni umpʼe kosa (Eclesiastés 9:5, 10).

Aj Jehová mach u yolí ke chɨmik ni gente. Seb u je u sutatsʼben u kuxle jin a laj chɨmijoʼb. I si unejob u tsʼonbenob, mach a ji te sujnéjob te chɨmo. Unejob u je tɨ kuxle u pete tiempu.