¿Kácheʼda u je u chen Dios ke ni Kaʼb sujnek de pitsil Kaʼb?

1. ¿Kokʼa u chi Dios ni Kaʼb?

Aj Jehová u ɨbí ni Kaʼb ni winikob i xiktakob, jinda ni kototla. Al u chen aj Adán tʼo ij Eva, ni najtɨkɨl-winik, i najtɨkɨl-ixík pan Kaʼb, mach u chi ta ajnek u bijchʼokob tɨ cielu, Dios u chi ni ángelob ta kuxlíkob yai (Job 38:4, 7). Aj Jehová u yɨkʼí najtɨkɨl-winik tan umpʼe pitsil Kaʼb u kʼabaʼ Edén (Génesis 2:15-17). Cheʼchi u ɨbí ta une i ta u bijchʼokob, kuxlik u pete tiempu pan Kaʼb. Ni Biblia u yeleʼ: «Jin bajká u chenob tu tojá u je u mɨtanob ni kaʼb i yai u je tɨ kuxlejob u pete tiempu» (Salmo 37:29). Tsikí tɨ Hechos 17:26.

Najtɨkɨ mach u pete ni Kaʼb ajní pitsí, tan umpʼe tsʼitaʼ Kaʼb ajní ni jardín tɨ Edén. Aj Adán tʼo ij Eva debía ajnek u bijchʼokob i u kʼeʼnesan-ubajob ta u butʼeob ni Kaʼb, i de tsʼitaʼ en tsʼitaʼ u je u chenob u pete pan Kaʼb de umpʼe pitsil Kaʼb (Génesis 1:28). Ni Kaʼb jin u je de u yotot ni personajob u pete tiempu, i mach u je tɨ xupo. Tsikí tɨ Mateo 5:5.

2. ¿Kokʼa ni Kaʼb mach umpʼe pitsil Kaʼb bada?

Kʼa aj Adán tʼo ij Eva mach u tsʼonijob u tʼan Dios i a paʼsintijob tɨ Edén (Génesis 3:23, 24). Jinukʼa, ni najtɨkɨl pitsil Kaʼb a sɨtí, i niʼ untú mach to u che podé u sujtatsʼen. Ni Biblia u yeleʼ ke ni Kaʼb a ɨkʼí tu kʼɨb ni gente aj xuxlejob (Job 9:24).

Bada, ¿mach u niʼ ji u chen aj Jehová ni umpʼe kosa ta ni personajob? Mach kaini, kʼa une yaʼan tʼo u pete poder lu ke u yeleʼ jini u chen (Isaías 45:18). Tan ba tiempu ke u je tɨ te, Dios u je u chen ke ni kuxlé tuba winik xik kaʼ u yolí najtɨkɨ. Tsikí tɨ Romanos 8:21.

3. ¿Kácheʼda u je tɨ sujné ni pitsil Kaʼb?

Aj Jesús, ni Rey ta Reinu tuba Dios, u je u chen ke sujlik ni Kaʼb en umpʼe pitsil Kaʼb. Tʼo ni ángelob, u je u tsupsen u pete aj xuxlejob, tan umpʼe guerra u kʼabaʼ Armagedón. De yai, u je u mɨkeʼ 1,000 jab aj Manap. Jin u tsʼonben Dios mach a ji tɨ tsupsíntejob, kʼa aj Jesús u je u yeʼben kamba bij u je u chʼeʼob i u je u kɨnɨntanob, i tu xupibá u pete u je tɨ kuxlejob chʼaja u jinob u pete tiempu tan ni pitsil Kaʼb. Tsikí tɨ Apocalipsis 20:1-3 i 21:3, 4.

4. ¿Ka kʼin u je tɨ xupo ni kʼuxe?

¿Ka kʼin u je u tsupsen Dios ni xuxlé? Aj Jesús u yelí lu ke u je tɨ «chɨnkan» al u nɨtsʼelan jimba kʼin. Lu ke yaʼanonla kɨ chinenla bada, jin ba kosajob da ke yojob u tsupsen tʼo u pete kuxlé de ni personajob, u chen demostrá ke mach kʼen yo ta kʼotik «u xupiba kʼin pan kaʼb». Tsikí tɨ Mateo 24:3, 7-14, 21, 22.

Tan ni 1,000 jab aj Jesús u je u chen mandá pan Kaʼb desde tɨ cielu, i u je u paʼsen lu ke u ɨbénonla kʼuxe (Isaías 9:6, 7; 11:9). Une ni rey, cheʼchi u je tɨ ajne kaʼ aj nojá de ni sacerdotejob, i u je u paʼsen ni u pekadujob ta jin u yajinob ni Dios. Kaini aj Jehová u je u chen ke aj Jesús u tsupsen tʼo ni yajob, ni Biblia u yeleʼ: «niʼ untú u je u yeleʼ: yaʼanon kʼojó» (Isaías 33:24). Cheʼchi aj Jesús u je u tsupsen tʼo ni noxiban i ni chɨmó. Tsikí tɨ 1 Corintios 15:26.

5. ¿Kátak u je tɨ kuxlejob tan ni pitsil Kaʼb?

Ni personajob ke u tsʼonben u tʼan ni Dios u je tɨ kuxlejob tan ni pitsil Kaʼb (1 Juan 2:17). Aj Jesús u yelbí u discípulujob u sakɨn ni gente ke yo u yubínob tʼo u pete u pixanob, ta u yeʼben kacheʼda u je u chʼajalesbenob u jin ni Dios. Bada aj Jehová yaʼan u yeʼben ni millonob de personajob tuba kuxlíkob tan pitsil Kaʼb (Sofonías 2:3). Jin u woyeʼubajob tan ni Salonob ta Reinu de ni aj testigujob tuba aj Jehová, bajká u pete familiajob woyó u chenob adorá ni Dios, ni winikob i ni xiktakob ke lotó an u kɨneʼob u yajin ubajob i ni papop i u bijchʼokob u chen-uba beneficiá de ni pitsil tʼanob ke u ɨbénonla ni Biblia. Tsikí tɨ Apocalipsis 15:4.