¿Kácheʼda u je tɨ te ni Reinu de ni Dios?

1. ¿Ka ni Reinu de ni Dios?

Jin umpʼe gobiernu tɨ cielu. Ke u je u paʼsen ni gobiernujob pan Kaʼb, i u je u chen ke utik lu ke Dios u yolín pan Kaʼb i tɨ cielu. Ni Reinu de ni Dios, jin ni gobiernu ke kʼɨnɨ ukʼa u pete personajob, i u je u michʼeʼ u pete ke yaʼanob tɨ kuxlé pan Kaʼb. ¿Tu tojá ke jinda ni pitsil tʼanob? Tsikí tɨ Mateo 6:9, 10; 24:14 i Lucas 4:43.

Tan u pete Reinujob kʼɨnɨ ajnek untú Rey, aj Jehová u yaki u yajloʼ, aj Jesucristu, kaʼ Rey de u Reinu. Tsikí tɨ Apocalipsis 11:15.

2. ¿Kokʼa aj Jesús une ni rey más uts?

U yajloʼ Dios une ni rey ke u pete yo ajnek tubajob, kʼa une buenu i une u chen u pete kosa taj toj (Juan 1:14). Kʼa une yaʼan u poder tuba u tɨklen ni gente, i u je u kʼɨneʼ jin kʼin u chen mandá pan Kaʼb desde tɨ cielu. De yai ke a kuxpesintik aj Jesús a tʼɨbí tɨ cielu, bajká u pijní tu noji aj Jehová ixta ke ɨbintik mandá ta u chen goberná (Hebreos 10:12, 13). Ixta ke kʼotí kʼin i ɨbintik ni mandá. Tsikí tɨ Lucas 1:32, 33.

3. ¿Kátak u je u chen goberná tʼo aj Jesús?

Ni Biblia u yeleʼ ke yebé ke u tsʼonbenob u tʼan Dios u je u lotinob aj Jesús al u chen goberná. Tɨ Daniel 7:27 u joʼkanob «santujob». Najtɨkɨl ke a yakintik tʼo Dios ta xikob santujob jin ni apóstolob tuba aj Jesús. Aj Jehová yaʼ chi to an u yakɨn bada ni winikob i xiktakob ke yaʼan u fe ta xikob santujob. Kaʼ chi aj Jesús, jimba personajob da, al chɨmikob u bixejob tɨ cielu i u ɨbinte umpʼe kuerpu de espíritu ta kuxlíkob tɨ cielu. Tsikí tɨ Juan 14:1-3 i 1 Corintios 15:42-44.

Mach kʼen u je te bixejob tɨ cielu. Aj Jesús u jokʼí «umpʼe chʼok grupu de oveja» (Lucas 12:32, NM). Ni númeru u tsʼɨktan 144,000 personajob, ke u je u lotinob aj Jesús al u chen goberná pan Kaʼb. Tsikí tɨ Apocalipsis 14:1.

4. ¿Ka kosajob u chi pasá al ɨbintik u mandá aj Jesús?

Aj Jesús a uti rey tɨ 1914,a i lu ke najtɨkɨ u chi, u paʼsí ni aj Manap i u demoniojob tɨ cielu i a julkijob pan Kaʼb. Kʼen tʼo kɨrɨxlé, aj Manap u tɨkʼí u tɨsen kʼuxe tan u pete Kaʼb (Apocalipsis 12:7-10, 12). Jinukʼa, u kuxlé ni gente u sujné kada kʼin mach uts. Ni guerras, ni jitsʼo, ni yajob i cheʼchi u nikɨn-uba ni kaʼb u pete jinda u chen demostrá ke yaʼan u chen-uba kumplí ni profecía ke u yeleʼ ke ni Reinu de ni Dios tsʼitaʼ yo ta u chen goberná pan Kaʼb. Tsikí tɨ Lucas 21:7, 10, 11, 31.

5. ¿Ka yaʼan u chen ni Reinu de ni Dios?

Por ni pitsil tsʼají ke yaʼan tɨ ɨlkan tan u pete Kaʼb ni Reinu de ni Dios yaʼan u woyeʼ ni «kʼenel gente» de u pete kajob. Millonob de winik i xiktak ke yo u yubínob tʼo u pete u pixanob u yɨkʼeʼ u chen-ubajob goberná al u tsʼonbenob aj Jesús. U pete jindajob u je u japɨn-ubajob al u tsupsen ni Reinu de ni Dios aj xuxlejob pan Kaʼb. Si kolinla kɨ chen-kɨbala beneficiá de lu ke ni Reinu u je u chen, debe kɨ tsʼonbenla aj Jesús. Tsikí tɨ Apocalipsis 7:9, 14, 16, 17.

Tan ni 1,000 jab, ni Reinu u je u chen lu ke u yolín Dios ta u pete personajob. Ni Kaʼb u je tɨ sujné umpʼe pitsil Kaʼb. De yai, aj Jesús u je u sutatsʼben ni Reinu u Pap (1 Corintios 15:24-26). ¿A wo a tsʼajben ni gente de jimba Reinu da? Tsikí tɨ 2 Pedro 3:13.