Emén Nau Mi Múrinné, Me Emén Mi Ngaw

NENGENI mwo Kain me Epel iei. Iir me rúúemén ra fen wattetá. Kain a wiliti emén chón atake. A foffot iráán mwéngé me féún irá.

Epel a wiliti emén chón masen siip. A sani an epwe túmúnú ekkewe kúkkún siip, mi kan mááritá ngeni siip watte. Iwe, mwirin ekis fansoun, Epel a túmúnú eú pwiin siip.

Eú rán, Kain me Epel ra waló och liffang ngeni Kot. Kain a waló ekkóch uwaan ffotan kewe irá. Nge, Epel a waló emén siip mi múrinné lap seni meinisin me lein néún kewe man. Jiowa a pwapwaiti Epel me an we liffang. Nge ese pwapwaiti Kain me an we liffang. Ka silei pwata?

Jiowa a sani án Epel liffang lap seni án Kain, pokiten Epel emén mwán mi múrinné. A tongei Jiowa me pwiin we. Nge Kain mi ngaw, ese tongei pwiin we. Ina popun Kain ese apwapwaai Kot.

Iwe, Jiowa a ereni Kain an epwe siwili napanapan kewe. Nge Kain ese aúseling. A lingeringer pún Jiowa a sani Epel lap seni i. Iwe, Kain a ereni Epel: ‘Sipwe feiló lemal.’ Ikewe ie, ra chék rúúeménúló ie, iwe Kain a opuni pwiin we Epel. A wesewesen angemmóng me nieló. Esap ina eú mettóch mi wesewesen ngaw Kain a féri?

Inaamwo ika Epel a máló, nge Kot a chúen chechchemeni i. Epel mi múrinné, iwe Jiowa esap ménúkaaló emén mi múrinné. Iwe eú rán, Jiowa Kot epwe amanawasefálietá Epel. Lón ena fansoun Epel esap chúen máló. Epwe tongeni nónnóm wóón fénúfan tori feilfeiló chék. Esap pwe a mmen apwapwa ach sipwe chuuri ekkewe aramas mi usun chék Epel?

Nge Kot ese pwapwa ren aramas mi usun chék Kain. Iwe, mwirin án Kain we nieló pwiin we, Jiowa a apwúngú ren an asúoló ngeni eú leeni mi towau seni an we famili. Lupwen Kain a feiló ngeni pwal eú kinikinin fénúfan, a uwei emén me lein fefinan kewe, iwe a pwúlúweni.

Fetál, fetál, Kain me pwúlúwan we ra néúnéú. Pwal ekkóch néún Atam me Efa kewe ra pwal pwúpwúlúfengen me pwal néúnéú. Iwe, ló, ló, ló, a chómmóngóló aramas wóón ei fénúfan. Sipwele káé usun ekkóch me leir.