Ewe Kúkkún Kou Mi Ffér Seni Kolt

OOO! Met ekkeei aramas ra fér? Ra fel ngeni emén kúkkún kou! Pwata ra féri ei mettóch?

Lupwen Moses a nómottam wóón ewe chuuk, ekkewe aramas ra apasa: ‘Sise silei met a fis ngeni Moses. Ina popun sipwe féri emén kot pwe epwe emmwenikichewu me lón ei fénú.’

Pwiin Moses we Aaron a apasa: ‘Iwe ina. Ou pwiliti néúmi kana iering kolt me wato rei.’ Lupwen ekkewe aramas ra waló ekkewe kolt, Aaron a átenaaló, iwe a féri ululun emén kúkkún kou kolt. Iwe ekkewe aramas ra apasa: ‘Iei i ach Kot, ewe mi emmwenikichewu me lón Isip!’ Iwe, ekkewe chón Israel ra féri eú apwapwa mi watte, iwe ra fel ngeni ewe kúkkún kou kolt.

Lupwen Jiowa a kúna ei mettóch, a fókkun song. Ina minne a ereni Moses: ‘Kele mwittiritiw. A fókkun ngaw féfférún ekkewe aramas. Ra fen ménúki ai kewe allúk, iwe ra chapetiw ngeni emén kúkkún kou kolt.’

Moses a mwittiritiw me wóón ewe chuuk. Lupwen a arap ngeni ewe leeni, iei ewe mettóch a kúna. Ekkewe aramas ra pweppwelli ewe kúkkún kou kolt, nge kékkél me pwéppwérúk! A kon watte án Moses song, pwe iei a oturatiw ekkewe rúúaché faú mi chépép, ekkewe mi mak ekkewe allúk wóón, iwe a tatakkisitiw. A angei ewe kúkkún kou kolt, iwe a átenisefállietiw. Mwirin, a ataietiw tori an a wiliti súsú.

Ekkewe aramas ra fen féri eú mettóch mi wesewesen ngaw. Ina pwata Moses a ereni ekkóch ekkewe mwán pwe repwe angei néúr kewe ketilas. Moses a apasa: ‘Ekkewe aramas mi ngaw, iir kewe mi fel ngeni ewe kúkkún kou kolt, repwe fókkun ninniiló.’ Iwe, ekkewe mwán ra nieló 3,000 aramas! Esap pwe ei pwóróus a pwáraatá lamoten ach sipwe fel ngeni Jiowa chék, nge esap ekkewe kot chofona?