Oupwe Uta O Unusoch Ren Luku Mi Lukuchar

“Eu Project Mi Amwarar”

SENI me loom Chon Pwarata Jiowa lon ei fansoun ra fokkun ekilapei eu me lein an Jises Kraist kewe oesini: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mattu 24:14) Mwen 1914,​—le poputaan “ekkewe ran le sopolon”​—ekkewe Chon Kaeo Paipel mi letip enlet ra achocho ngeni eu minefoon campaign won unusen fonufan fan iten ar repwe asukula aramas ussun ewe Paipel.​—2 Timoti 3:1.

Ren ar repwe apwonueta ewe angangen esileifeili ewe kapas allim won unusen fonufan, ekkeei chon angangen Jiowa ra aea eu minen afalafal mi fo, amwarar, me ffat. Sipwe nennesokur ren ach sipwe tongeni alapalo ach silei ussun ei mettoch.

Eu Minefoon Minen Esilei ewe Kapas Allim

January 1914. Anchangei mwo pwe ka mommot lein 5,000 aramas lon eu leenien mwich mi rochokkich lon New York City. Mei wor echo cho watteen maku mi pwech. Emon mwan mi pwech mokuran me a ufouf echo sekit mi ttam a pwa won ewe maku. Ka fen katon kachito esor mongungun aramas, nge ei mwan a fos, me ka tongeni rongorong an kewe kapas. En mi kukkuna och mettoch mi fo, me ewe poraus a sokkolo lapalapan. Iten ewe mwan Charles Taze Russell, ewe aemonun piresitentin ewe Watch Tower Society, me itelapen ewe kachito: “Photo-Drama of Creation.”

C. T. Russell a fen weweiti manamanen kachito fan iten ewe angangen asukula chommong aramas. Ina popun a poputa le angang won ewe “Photo-Drama of Creation” lon 1912. Lo, lo, lo, ena angang a wiliiti ukuukun walu awaan kachito, kachito nge sasing mi color, me mongungun aramas.

Ewe “Photo-Drama” a ffor pwe aramas repwe katon lon ruaanu kinikin, me a awewe ngeni chon katon foruten lang me fonufan me uruwoon aramas tori ewe fansoun letipen Jiowa Kot epwe fis ngeni aramas won fonufan le muchuloon ewe Engerou Ier an Kraist Nemenem. Fite ier epwe lo mwen ekkewe company repwe fori business watte ren ei sokkun kachito. Iwe nge, fite milion aramas ra fen katon ewe “Photo-Drama” me a free!

Nikattik mi ngioch me 96 afalafal won rekodo ra fen mmonleta fan iten ewe “Photo-Drama.” A fich sasingin ekkewe chunga mi awewei uruwoon aramas. Pwiich kewe ra pwal pwisin chungani me peiniti minefoon lios me mwirin ra fichi sasingir. Ekkoch ekkewe sasing me ekkoch kinikinin ewe kachito ra pwal color pokiten ar pwisin peiniti ekkewe sasing, me ra wiisen fori ei angang fan chommong pun ra wiisen fori 20 set me a wor ruaanu kinikin lon eu set. Iei ussun aramas mi tongeni fichi ewe “Photo-Drama” lon 80 telinimw lon eu chok ran!

Ifa Ussun Ra Fichi

Met a fiffis atun ra fichi ewe “Photo-Drama”? “Ewe Drama a poputa ren kachitoon Brother Russell,” emon Chon Kaeo Paipel itan Alice Hoffman a apasa. “Lupwen a pwa liosun me chonnauaan a mwokutukut, eu chikongki a poputa . . . me sia rongorong leuwan.”

Zola Hoffman a chechchemeni ifa ussun ra fen fichi sasingin och mettoch iteiten awa me mwirin ra apachafengenni ekkewe sasing lon eu kachito: “Ua unusen ingelo atun am aua katon met a fen fis lon ekkewe ranin an Kot forata mettochun fonufan. Epo poon ira a suukulo ekis me ekis mwen mesei lon fitu chok seken.”

Karl F. Klein, emon a fiti ewe Mwichen Pwungupwung iei, a fokkun saani nikattik. A apasa: “Atun a ffich ekkewe sasing, aramas ra rongorong nikattik mi ngingioch. Iten ruu me lein ekkewe nikattik Narcissus me Humoreske.”

Mei wor pwal ekkoch mettoch ra fisita me aramas ra chuen chemeniir. “Fan ekkoch mettoch mi atakirikir a fis atun aramas ra katon.” Clayton J. Woodworth, Jr. a chechchemeni. “Fan eu a tik won chikongki ewe nikattik itan ‘Sulo Ngeni Chukuchukuta Ussun Chok Emon Matchang,’ nge a fich sasingin dinasouar mi watte, 160 feet ttaman, a fen manau won fonufan mwen ewe Nooter”!

Lukun ewe “Photo-Drama of Creation,” mei pwal wor ekkoch set iter “Eureka Drama”. A wor afalafal ren alillisin chikongki fengen me ekkewe nikattik. Ewe eu a wor mongungu seni chikongki pwal ekkewe sasing. Esor kachito lon ewe “Eureka Drama” nge a fokkun och ar fichi won ekkewe leeni ikkewe ese wor chommong aramas ie.

Eu Minen Afalafal Mi Manaman

Le muchuloon 1914, lap seni 9,000,000 aramas ra fen kuna ewe “Photo-Drama” lon Merika, Iurop, me Australia. Ekkewe Chon Kaeo Paipel ra chok chokisikis nge rese osupwangen ewe luku mi lukuchar mi lamot ren ar repwe esilei ewe kapas allim ren alillisin ei minefoon minen alillis. Ra pwapwa le fangolo wouur ren ar repwe rentini ekkewe leenien fich kachito. Iei ussun ewe “Photo-Drama of Creation” a fori och angang watte lon ewe angangen esilei ngeni chon katon ussun letipen Kot me porausen an we Kapas.

Emon a makkei echo taropwe ngeni C. T. Russell: “Ai kuna ewe aewin kinikinin om Drama a unusen siwili manauei; are, neman upwe apasa pwe a unusen siwil ai sile ussun ewe Paipel.” Pwal emon a apasa: “Arapakan ua fen kkuf ren ewe tipisin lisowu mwaal nge iei ua luku pwe ewe ‘Photo-Drama of Creation’ a fen amanauaei lupwen oua fichi ikei ie lon ewe summer. . . . Iei, a nom rei och kinamwe ewe fonufan ese tongeni atoto ngeniei me usap fangeta ren wouun fonufan meinisin.”

Emon a fen pin angang ren fansoun langattam lon ofesin ei Society itan Demetrius Papageorge a apasa: “Ewe ‘Photo Drama’ eu angang mi amwarar, lupwen sia chechchemeni chokisikisin chochoon ekkewe Chon Kaeo Paipel me kukkunun ewe moni repwe tongeni awora. Ngunun Jiowa a fokkun alisata ei angang!”

[Box/Pictures on page 30, 31]

Ewe “Eureka Drama”

Walu maram mwirin a poputa ar fichi ewe “Photo-Drama,” ewe Society a weweiti ewe lamoten ar repwe fori ewe “Eureka Drama.” Ra fichi ewe “Photo-Drama” mi unus lon ekkewe telinimw watte, me ewe “Eureka” won sopw kukkun, nge ewe poraus lon mi wewe chok me ewe lon ewe Photo Drama. Alon eu awewe, ewe “Eureka Drama” a fokkun suuk ngeni “ekkewe sister” eu tufich mi “sokkolo aucheaan” ren ar repwe afalafal. Pwata? Pokiten chouun ewe kiwiver me ekkewe rekoto 30 paun chok. Repwe pwal wiisen eki ewe chikongki.