Elter Me Ministerial Servant Mi Kefilita Fan An Kot Nemenem
“Oupwe pwisin tumunukemi me meinisin lon ewe pwin siip, pun seni lon ena mwich ewe ngun mi fel a fen filikemita pwe chon maser.”—FOFOR 20:28, New World Translation.
1, 2. Ifa ussun Aisea 60:22 a fen pwonueta?
JIOWA a oesini me loom pwe och mettoch mi amwarar epwe fis lon ekkewe ranin le sopwoloon. Ren noun we soufos Aisea, a apasa: “Ewe mi tekison leimi epwe wiliti eu cho, nge ewe mi kis epwe wiliti eu mwu mi pochokul. Ngang ewe Samol mi Lapalap, upwe muttir apwonueta ai pwon lon fansoun ua filata.”—Aisea 60:22.
2 Mei wor pisekin annet pwe ei oesini a pwoppwonuta iei? Ewer! Lefilen 1870 me 1880, eu mwichefelin noun Kot kewe aramas a poputa lon Allegheny, Pennsylvania, U.S.A. Seni ena kukkun mwichefel, fite ngerou mwichefel ra fen poputa me ra pochokkulelo won unusen fonufan. Fite milion chon afalafala ewe muu—eu muu mi pochokkul—ra chiechifengen lon ekkewe 91,000 som mwichefel lon 235 fonu won unusen fonufan. Esor tipemwaramwar pwe Jiowa a amuttiri ionfengennin ekkewe chon fel mi enlet mwen poputaan ewe “riaffou mi lapalap” mi arapoto.—Mattu 24:21; Pwarata 7:9-14.
3. Ifa weween an emon epwe papatais ‘fan iten ewe Sam, ewe Nau, me ewe ngun mi fel’?
3 Mwirin ar pwisin filata le fangolo manauer ngeni Jiowa, me fan tipeeu ngeni an Jises awewe, ekkeei fite milion ra papatais “fan iten ewe Sam, me ewe Nau, me ewe Ngun mi Fel.” (Mattu 28:19) Papatais “fan iten ewe Sam” a wewe ngeni an ewe chon papatais silei pwe Jiowa Semer lon lang me ewe Chon Liffang Manau, me ra anomuur fan an nemenem. Papatais ‘fan iten ewe Nau’ a wewe ngeni ar apasa pwe Jises ewe Sou Awora ewe Moon Kepichilo, ewe Sou Emmwen, me ewe King. Ra pwal weweiti angangen an Kot ngun mi fel ren emmwennin manauer. A ina weween ar papatais ‘fan iten ewe ngun mi fel.’
4. Ifa ussun noun Kraist kewe chon angang ra seikita?
4 Atun ar papatais, ekkewe minefoon chon kaeo ra seikita ren ar repwe wiliiti chon angangen Jiowa Kot. Io a seikiireta? Ekkewe kapas lon 2 Korint 3:5 ra pwal tongeni weneitiir: “Ach lipwakoch [ussun chok chon afalafal] a popu seni Kot.” Esap tongeni wor och sufol mi watte seni an Jiowa pwisin seikiireta! Mwirin ar papatais, repwe chuen maarita lon pekin ngun ussun chok chon angangen ewe “kapas allim” ika repwe chuen etiwa emmwennin an Kot ngun mi fel me apwonueta an we Kapas.—Mattu 24:14; Fofor 9:31.
Kefilita Fan Eu Kokkot Mi Theocratic Sap Democratic
5. Elter me ministerial servant ra kefilita fan eu kokkot mi democratic? Awewei mwo.
5 Emmwen mi murinno mi kawor ren elter mi fich fan iten wiiser me ministerial servant mi tufichoch a lamot ika epwe wor tumun ngeni ekkewe chon afalafal mi chommongolo iei. (Filipai 1:1) Ifa ussun ekkena mwan ra angei wiiser? Rese kefilita me ren an Kirisentom we kokkot. Ren chok awewe, ekkewe elter resap angei wiiser pokiten chommong aramas lon ewe mwichefel ra uttiir lon eu uttut mi democratic. Ekkewe elter ra kefilita fan eu kokkot mi theocratic. Met weween ena?
6. (a) Ifa weween eu theocracy mi enlet? (b) Met popun sipwe apasa pwe kefilitaan elter me ministerial servant a fis fan eu kokkot mi theocractic?
6 Lon kapas mi mecheres, theocracy a wewe ngeni an Kot nemenem. Chon Pwarata Jiowa ra pwapwa le anomuur fan an nemenem me angang fan tipeeu ren ar repwe apwonueta letipan. (Kol Fel 143:10; Mattu 6:9, 10) Kefilitaan ekkewe elter me ministerial servant a fisita fan eu kokkot mi theocratic pokiten ra kefilita fan an Kot we kokkot ussun chok a fen makketiu lon ewe Paipel. Pokiten Jiowa a “tekia seni meinisin,” a pwuungun filata ifa ussun an we mwicheich won fonufan epwe mwokutukut.—1 Kronika 29:11; Kol Fel 97:9.
7. Awewei ewe kokkotun nemenem an Chon Pwarata Jiowa?
7 Chon Pwarata Jiowa ra mwaalfesen me chommong mwicheichen lamalam lon Kirisentom pokiten ar rese pwisin filata lapalapen ewe nemenem lon pekin ngun repwe angang fan. Ra sotun pache ngeni an Jiowa kewe kokkot. Ar kewe elter rese angei wiiser pokiten nemenemen chon ewe mwichefel meinisin, nemenemen eu mwichen nouwis mi tekia, are nemenemen ekkoch elter. Ika ekkewe muu are aramas lon ei fonufan ra sotun le angolong lon filien chokkeei, noun Jiowa kewe aramas rese mut ngeni. Repwe eani ewe ekiek an ekkewe aposel lon ewe aewin senturi: “Sipwe fakkun alleasochisi Kot lap seni aramas.” (Fofor 5:29) Iwe, ekkewe Chon Pwarata ra anomuur fan Kot ren mettoch meinisin. (Ipru 12:9; Jemes 4:7) Ar angang me ren ekkewe kokkot mi theocratic a fen atoto ngeniir feioch seni lang.
8. Ifa sokkofesennin ekkewe kokkot mi democratic me theocratic?
8 Pokiten kich chon angangen ewe Theocrat mi Lapalap, Jiowa, a murinno ach weweiti sokkofesennin ekkewe kokkot mi democratic me theocratic. Lon eu kokkot mi democratic, meinisin mi lollopok me a kan fis campaign me uttut. Esor ekkena mettoch lupwen emon a angei wiisan fan eu kokkot mi theocratic. Kefilitan ese pop seni aramas are seni eu mwicheich. Sia luku pwe Paul a fos ussun pwisin kefilitan me ren Jises me Jiowa ussun chok “chon kuno ngeni ekkewe Jentail,” lupwen a ereni ekkewe Chon Kalesia pwe an kefilita “esap pwal ren emon aramas, pwe ren chok Jises Kraist pwal Kot Semach, ewe mi autasefalli atewe seni malo.”—Rom 11:13; Kalesia 1:1.
Kefilita Ren Ngun Mi Fel
9. Met a mak lon Fofor 20:28 ussun kefilitaan elter?
9 Paul a achema ngeni ekkewe elter lon Efisus pwe Kot a fen kefiliireta ren ngun mi fel. A apasa: “Oupwe pwisin tumunukemi me meinisin lon ewe pwin siip, pun seni lon ena mwich ewe ngun mi fel a fen filikemita pwe chon maser, pwe oupwe foleni an Kot mwichefel, ewe a mooni ren chchaan [noun we].” (Fofor 20:28, New World Translation) A lamot pwe ekkena elter Chon Kraist repwe likiitu le kutta emmwennin ewe ngun mi fel atun ra apwonueta wiiser, wiisen chon masen noun Kot pwin siip. Ika emon mwan mi eani eu wiis ese chuen fich ngeni wiisan, mwirin och fansoun ewe ngun mi fel epwe mwokutukut me ena mwan esap chuen eani wiisan.
10. Ifa lamoten ewe ngun mi fel lon kefilitaan elter fan eu kokkot mi theocratic?
10 Ifa ussun ewe ngun mi fel a mwokutukut lon kefilitaan aramas? Iwe, ewe puk mi awewei ekkewe lapalap emon mi kefilita epwe fich ngeni a pop seni ewe ngun mi fel. Lon noun kewe taropwe ngeni Timoti me Taitos, Paul a awewe ekkewe lapalap elter me ministerial servant repwe fich ngeni. A makketiu 16 mettoch. Awewe chok, ekkewe elter repwe itoch, mosonoson me mirit, repwe kokkotoch, awasolaochu aramas, sense mi murinno, me forfichi lon wiiser ussun chok mokuren famili. Resap unnummong ren sakau, resap tongei moni, me repwe nemeniochu meefier. Ekkewe ministerial servant ra pwal wiisen fich ngeni ekkena lapalap mi tekia.—1 Timoti 3:1-10, 12, 13; Taitos 1:5-9.
11. Ikkefa ekkoch ekkewe lapalap ekkewe mwan mi mochen angei eu wiis lon ewe mwichefel repwe loom apwonueta?
11 Lupwen sia enniwili ekkena lapalap, a ffat pwe chokkewe mi wiisen emmweni aramas lon ewe fel ngeni Jiowa repwe eani foffor mi fich ngeni Chon Kraist ren manauer meinisin. Epwe pwalo ngeni chon ewe mwichefel pwe ewe ngun mi fel a wesewesen angang lon manauen ekkewe mwan mi mochen eani wiiser. (2 Timoti 1:14) Epwe fokkun pwalo pwe ngunun Kot a fen uwaani lon ekkeei mwan ekkewe uwaan ngun, “tong, pwapwa, kinamwe, mosonoson, kirokiroch, lipwakoch, luku, tipefesir, forfichi.” (Kalesia 5:22, 23) Ekkena uwaan ngun repwe pwal pwalo lon ar kewe foffor ren chon luku me aramas meinisin. Pwungun pwe esap lollopok ukuukun an ekkewe mwan uwaani iteiten uwaan ngun are ukuukun ar fich ngeni iteiten lapalap ekkewe elter ra wiisen fich ngeni. Nge ren unusen manauer, ir meinisin mi mochen wiiseni ewe wiis elter are ministerial servant repwe pwaralo pwe ir aramas mi achocho ngeni mettochun ngun, me ra fich ngeni ekkewe lapalap mi mak lon an Kot we Kapas.
12. Io kewe ra kefilita me ren ewe ngun mi fel?
12 Lupwen Paul a pesei aramas le appiru i, epwe tongeni apasa ena pokiten i pwisin a achocho le appiru Jises Kraist, ewe a likiti rech ‘eu leenien appiru sipwe tapweilo mwirin.’ (1 Piter 2:21; 1 Korint 11:1) Iwe, chokkewe mi fich ngeni ekkewe lapalap mi mak lon ewe Paipel lupwen ra kefilita ussun chok elter are ministerial servant ra fen filita ren ngun mi fel.
13. Ifa ussun ewe ngun mi fel a alisi chokkewe mi wiisen filata io kewe mi tongeni eani wiis lon ewe mwichefel?
13 Mei wor pwal eu poraus a affata ifa ussun ngun mi fel a mwokutukut lon kefilitaan elter. Jises a apasa pwe ‘ewe Sam lon lang a fangelo ngun mi fel ngeni chokkewe mi tingorei i.’ (Luk 11:13) Ina ewe popun repwe iotek pwe ngunun Kot epwe emmweniir lupwen ra mwichfengen ren ar repwe fos ussun io kewe mi tongeni eani eu wiis. Filier kewe ra alongolong won met a mak lon an Kot we Kapas mi pop seni ngunun we, me ena ngun mi fel a tongeni atufichi ar miritiiti ika emon a wesewesen fich ngeni ekkena lapalap. Chokkewe mi wiisen filata resap kon annefota ewe mwan lukun, ukuukun an sukul, are watteen an tufich. Repwe nengeni akkom ika ena emon a achocho ngeni mettochun ngun, me i emon chon ewe mwichefel resap pireir le feilo alillis ngeni lupwen ra osupwangen fon lon pekin ngun.
14. Met sia kaeo seni Fofor 6:1-3?
14 Ewe mwichen elter fengen me ewe elter mi sai fetal ra fos ussun io kewe mi tongeni eani ewe wiis elter are ministerial servant, nge kefilitaan ekkewe mwan a fis me ren eu kokkot mi fen isetiu lon ewe aewin senturi. Fan eu, mei wor eu osupwangen ekkoch mwan mi achocho lon pekin ngun, pwe repwe apwonueta eu angang mi lamot. Iei ewe emmwen seni ewe mwichen sou pwungupwung: “Oupwe filata seni leimi fumon mwan mi itoch, mi ur ren ewe Ngun o pwal ren tipatchem, pwe sipwe awisa ngenir ei sokkun angang.” (Fofor 6:1-3) Inaamwo ika ekkewe mwan lon ewe mwichefel ra fen fos ussun io kewe mi tongeni fori ewe angang, nge kefilitaan chokkewe repwe eani ena wiis a nom ren ekkewe aramas mi asimau lon Jerusalem. A ina ussun ewe kokkot ren ikenai.
15. Ifa wiisen ewe Mwichen Sou Pwungupwung lon kefilitaan aramas?
15 Ewe Mwichen Sou Pwungupwung an Chon Pwarata Jiowa a pwisin awiisa ngeni wiiser chokkewe repwe eani wiiser lon ekkewe Branch Committee. Lupwen ra pwungupwung won io kewe repwe eani ena wiis, ewe Mwichen Sou Pwungupwung a chechchemeni an Jises kapas: “Are Kot epwe ngeni emon chommong mettoch, iwe, epwe pwal kutta seni i chommong mettoch. O are aramas repwe lukuluk ren chommong mettoch ngeni emon, iwe, repwe pwal kutta seni och mi lap seni ekkewe mettoch.” (Luk 12:48) Ewe Mwichen Sou Pwungupwung a pwal pwisin awiisa ngeni wiiser ekkewe elter lon Bethel, me ekkewe elter mi sai fetal. Iwe nge, ra pwal awiisa ngeni ekkoch mwan mi tuppwol wiiser le filata aramas fan iten ekkoch wiis. Ei kokkot a alongolong won ewe Paipel.
‘Awiisa Ngeni Aramas Wiiser, Ussun Chok Ua Fen Alluk Ngonuk’
16. Met popun Paul a likitalo Taitos lon Krit, me met sia kaeo seni ena ussun kefilitaan aramas fan eu kokkot mi theocratic ikenai?
16 Paul a ereni chienan chon angang Taitos: “Iei popun ua fen likitukolo lon Krit, pwe kopwe amurinnoolo ekkewe mettoch mi mwaal me awiisa ngeni ekkewe mwan mi asimau wiiser lon telinimw meinisin, ussun chok ua fen alluk ngonuk.” (Taitos 1:5, NW) Mwirin Paul a menlapei ekkewe lapalap Taitos epwe kutta lon ekkewe mwan ren an epwe silei ika ra fich ngeni ar repwe kefilita. Ina popun, ewe Mwichen Sou Pwungupwung a awiisa ngeni pwiich kewe mi fich ngeni ewe wiis lon ekkewe branch ofes, wiiser le tupuni ewe Mwichen Sou Pwungupwung ren kefilitaan ekkewe elter me ministerial servant. Chokkewe mi tupuni ewe Mwichen Sou Pwungupwung ra weweiti me angang me ren ekkewe kapasen emmwen lon ewe Paipel mi kawor fan iten kefilitan chon mas. Ina popun ekkewe mwan mi fich ngeni ena wiis ra kefilita fan an ewe Mwichen Sou Pwungupwung emmwen fan iten wiiser lon ekkewe mwichefelin Chon Pwarata Jiowa won unusen fonufan.
17. Met eu branch ofes epwe fori lupwen ra angei iten aramas mi tongeni wiiseni ewe wiis elter me ministerial servant?
17 Lupwen iten ekkewe aramas mi tongeni apwonueta wiiser ussun chok elter me ministerial servant ra tittiilo ewe branch ofes, ekkewe mwan mi asimau ikkewe ie ra tingor alillis seni an Kot ngun mi fel ren ar repwe awiisa ngeniir wiiser. Ra meefi watteen wiiser, me ra silei pwe resap muttir iseta pour won emon, pwe resap pwal eti tipisin ena emon.—1 Timoti 5:22.
18, 19. (a) Ifa ussun porausen an emon kefilita epwe tittiilo? (b) Ifa ussun a fisita an aramas kefilita fan iten wiiser?
18 Porausen ekkoch aramas mi kefilita mi tongeni tittiilo lon taropwe mei wor impwangen eu mwicheich won. Mi tongeni mak porausen kefilitaan fitemon lon ewe mwichefel me lon eu taropwe.
19 Kefilitaan aramas fan iten wiiser fan eu kokkot mi theocratic a pop seni Jiowa ren Noun we, ren “ewe chon angang mi tuppwol o tipatchem” me ren an we Mwichen Sou Pwungupwung ikei ie won fonufan. (Mattu 24:45-47) Unusen ewe kokkot ren kefilitaan chokkewe mi eani eu wiis a nom fan emmwennin ewe ngun mi fel. A ina ussun pokiten ekkewe lapalap aramas repwe achocho ngeni ra fen isetiu lon an Kot we Kapas, ewe a pop seni ngunun Kot we, me chokkewe mi kefilita ra fen pwaralo ar uwaani uwaan ena ngun. Ina popun sipwe tongeni apasa pwe ewe ngun mi fel a fen filiireta. Ussun chok ekkewe elter me ministerial servant ra fen filita fan eu kokkot mi theocratic lon ewe aewin senturi, iwe, a ussun we chok ikenai.
Sia Kilisou Ren An Jiowa Emmwen
20. Met popun meefien Tafit lon Kol Fel 133:1 me meefiach ra wewe chok?
20 Lon ei fansoun wouoch lon pekin ngun me lapeloon ewe angang fan iten ewe Muu, sia kilisou pwe Jiowa a akkaewin wiiseni ewe wiis chon kefilita elter me ministerial servant a nom ren i. Ei kokkot mi alongolong won ewe Paipel a alisata an Chon Pwarata Jiowa akkamwochu an Kot pwung mi tekia. Pwal och, ngunun Chon Kraist me ewe angang mi tuppwol an ekkeei mwan a pwal alisata ewe kinamwe me tipeeu mi amwarar lein Chon Pwarata Jiowa. Ussun chok ewe sou mak kol itan Tafit, sia tongeni apasawu: “Nengeni usun lapalapen murinno o pwal lapalapen pwapwa, are chon pwipwifengen ra nonnomfengen fan ar tipeeu!”—Kol Fel 133:1.
21. Ifa ussun Aisea 60:17 a pwonueta ikenai?
21 A ifa me watteen ach kilisou ren an Jiowa emmwen mi kawor ren an we Kapas me an we ngun mi fel! Met ren ochchun ekkewe kapas lon Aisea 60:17: “Iwe, ami piras upwe siwili ngeni kolt, nge ami macha ngeni silifer. Ami mwuch upwe siwili ngeni piras, nge ami fau ngeni macha. Upwe seikata kinamwe pwe epwe samolunikemi, nge pwung epwe nemenikemi.” Pokiten ekkeei kokkot mi theocratic ra pwoppwonuta lein Chon Pwarata Jiowa, sia fen pwapwaiti eu feioch lon an Kot we mwicheich won fonufan.
22. Sia kilisou fan iten met, me sia apposa letipach le fori met?
22 Sia fokkun kilisou fan iten ekkeei kokkot mi theocratic. Sia pwal afanni ewe angang weires mi apwapwa a fis ren ekkewe elter me ministerial servant mi kefilita me ren eu kokkot mi theocratic. Sia unusen mwareiti Semach lon lang mi tong, ewe a liffang ngenikich ach wouoch lon pekin ngun. (An Salomon Fos 10:22) Amwo sipwe apposa letipach le feffetal pok me an Jiowa we mwicheich. Lap seni meinisin, sipwe likiitu le angangfengen fan tipeeu ngeni ach sipwe asamolu, mwareiti, me alingalo iten Jiowa we mi pin me lapalap.
Ifa Ussun Kopwe Polueni?
• Met popun sipwe tongeni apasa pwe kefilitaan elter me ministerial servant mi theocratic, sap democratic?
• Ifa ussun ewe ngun mi fel a filata ekkewe mwan Chon Kraist mi tuppwol?
• Ifa ussun ewe Mwichen Sou Pwungupwung a kapachelong lon kefilitaan elter me ministerial servant?
• Met popun sipwe kilisou ngeni Jiowa fan iten kefilitaan aramas fan an we kokkot mi theocratic?
[Pictures on page 11]
Elter me ministerial servant ra eani wiiser kewe mi auchea pokiten ra fen kefilita fan eu kokkot mi theocratic