Ekkewe Foffor Murinno Ra Alingalo Kot

REN AR foffor me angang mi murinno, ekkewe Chon Kraist mi enlet ra alingalo Kot. (1 Piter 2:​12) A pwaalo ei mettoch ren met a fis lon Italy lon ekkewe ier kukkuto.

Fan September 1997, a fis chechchech watte lon kinikinin Marche me Umbria, me a talo arapakan 90,000 imw. Mwichen Chon Pwarata Jiowa ra muttir awora alillis ngeni pwiir kewe me ekkewe ekkoch. Ra awora trailer, kieki, sitof, mwesinnen tengki me pwal ekkoch mettoch mi lamot. Aramas ra affani ekkeei sokkun alillis.

Ewe simpung Il Centro a aporausa: “Ekkewe Chon Pwarata Jiowa seni Roseto ra akkom awora alillis lon ekkewe leeni mi kuna feiengau . . . Me lukun ar mwichefengen fan iten iotek, Chon Pwarata Jiowa ra tinikken le awora alillis ngeni ir kewe mi riaffou nge rese pwal ekieki ika ir chon menni lamalam.”

Ewe mayor lon Nocera Umbra, eu me lein ekkewe sopw mi kuna watte feiengau a makkei ussun ekkewe Chon Pwarata: “Ua fokkun kilisou seni lon letipei ren ekkewe alillis oua awora ngeni aramasen Nocera. Ese mwaal iei pwal meefien meinisin chon ei sopw.” Pwal eu, ewe Ministry of the Interior a liffang ngeni ewe Congregazione Cristiana dei Testimoni di Geova (An Chon Pwarata Jiowa Mwichefel) echo certificate me eu medal “ren an epwe pwarata an mwareitiir lon ar angangen awora alillis atun ewe feiengau lon Umbria me Marche.”

Fan October 2000, eu noter watte a efeiengaua ewe leeni itan Piedmont lon ennefelin Italy. Ekkewe Chon Pwarata ra pwal muttir mwokutukut le awora alillis. Aramas ra pwal kuna ekkeei foffor murinno. Ewe leeni Piedmont a liffang ngeniir eu plaque fan iten ar “angangen volunteer mi auchea mi alisata ekkewe chon Piedmont mi feiengau seni ewe noter.”

Jises Kraist a aiti ngeni noun kewe chon kaeo: “Iei usun ami saram epwe pwapwalo ngeni aramas, pwe repwe kuna ami fofor murinno o mwareiti Sememi we mi nonnom lang.” (Mattu 5:​16) Chon Pwarata Jiowa ra pwapwa le alingaalo Kot, esap pwisin ir, nge ren ar “fofor murinno” ra alisi chon orun kewe lon pekin ngun me pwal lon pekin aion.