Kapas Eis Seni Ekkewe Chon Allea

Ifa ussun porausen pupulu lon ewe Allukun Moses mi aukuuku pupulu lefilen marar a kku ekkewe Chon Kraist ikenai?

Ewe Alluk Jiowa a ngeni Chon Israel ese titchiki kokkotun me mwokutukutun ewe apupulu. Nge a isetiu ekkoch alluk mi aukuuku io aramas repwe puluweni. Awewe chok, lon Lifitikos 18:6-​20, a eiteita io emon esap poluweni ika ir “pwisin aramasan”. Ewe wokisin a titchiki menni marar resap lisowufengen. Pwungun pwe Chon Kraist rese nom fan ewe Allukun Moses. (Efisus 2:15; Kolose 2:14) Iwe nge, sap minne pwe Chon Kraist repwe chok tunalo ei alluk lupwen repwe filata ion repwe puluweni. Mei wor ekkoch popun epwe iei ussun.

Akkomwan, mei wor allukun ewe muu mi aukuuku pupulu lefilen marar. Chon Kraist ra wiisen alleasochisi allukun ewe muu ikewe ie ra nonnom ie. (Mattu 22:21; Rom 13:1) Ekkeei alluk a sokkolo me ren eu me eu fonu. Lape ngeni ekkewe allukun ikenai ra alongolong won ekkewe aramas ika ir mi fifitukfengen. A pwung pwe pupulu lefilen ruuemon marar mi tongeni efisi tterin me semwennin nour kewe. Ren ei popun me pokiten ar “alleasochisi ewe mu mi nemeni ir,” ekkewe Chon Kraist mi mochen pupulu repwe alleasochisi ekkewe alluk ussun pupulu lon pwisin leenier.

Sipwe pwal ekieki ussun met chon ewe leeni ra mutata me met rese mutata. Lape ngeni eorenien fonu meinisin a wor ar alluk mi apwungu pupulu lefilen ekkewe aramas mi kanefengen. Fan chommong, ra apwungu pwe ei sokkun riri eu tipis watte. Inaamwo ika a sokkofesen met eu me eu fonu a kan mutata are rese mutata, The Encyclopædia Britannica a era pwe, “ika a kon kanefengen ruuemon marar, a pwal pochokulelo ewe alluk mi pinei ar lisowufengen.” Ina popun, inaamwo ika ese fis och pupulu lefilen chon eu famili nge, Chon Kraist rese mochen tunalo eorenien fonuer pwe resap aitengauaalo ewe mwichefelin Chon Kraist me iten Kot we.​—2 Korint 6:3.

Sisap pwal tunalo miritin letipach me ren Kot. Meinisin aramas a wor ar tufich le pukun silei met mi pwung me mwaal, me met mi murinno me ngau. (Rom 2:15) Miritin letiper a ereniir met mi pwung me murinno, me met mi ngau me annou, chiloon chok ika miritin letiper a fen poroingauolo. Jiowa a fen awewe won ei poraus lupwen a alluk ngeni chon Israel ussun pupulu lefilen marar. A era: “Ousap fori sokun fofor ekewe chon Isip ra fori lon ewe leni ia oua piin nonom ie me mwan. Ousap pwal fori sokun fofor ekewe aramas ra fori lon ewe fanu Kanaan ewe ia upwe emwenikemiila ie. Ousap apiru ar fofor.” (Lifitikos 18:3) Ekkewe Chon Kraist ra aucheani miritin letiper mi longolong won Paipel me rese mutata letiper an epwe poroingaualo ren ekiekin fonufan mi rikilo.​—Efisus 4:17-19.

Iwe, met filiach? Pwungun pwe ekkewe Chon Kraist rese nom fan ewe Allukun Moses, nge miritin letiper a affata pwe pupulu lefilen marar​—ren chowean sam me noun nengngin, in me noun at, mommongeang pupulufengen​—esap fiffis leiin ekkewe Chon Kraist.a Lupwen a chommongolo choochoon chon ewe eterenges, ekkewe Chon Kraist ra miritiiti pwe a wor ekkewe allukun mu mi nemeni pupulu me a pwal wor ekkewe eorenian aramas mi apwungu ika eu pupulu epwe pwung fan meser. Mi lamot ar afanni ekkeei mettoch ren ar repwe alleasochisi ewe wokisin: “Aramas meinisin repwe asamolu pupulu.”​—Ipru 13:4.

[Footnote]