Kot A Etiwa Sokkun Fel Meinisin?

Pölüwan me ren aramas:

▪ “Lamalam meinisin repwe emmwenikich ngeni Kot.”

▪ “Ika ka chök wenechar lon letipom, ese pwal lifilifil met ka lükü.”

Met Jises a apasa?

▪ Iwe, oupwe tolong lon ewe asam mi pwangkukkun. Pun mi pwangwatte ewe asam o mi cholap ewe al a alelo ngeni kiteter; iwe, mi chommong mi tolong lon. Pun mi pwangkukkun ewe asam o mi chokukkun ewe al a alelo ngeni manau; iwe, mi chokisikis mi kuna.” (Mattu 7:13, 14, TF) Jises ese lükü pwe lamalam meinisin repwe emmwenikich ngeni Kot.

▪ “Chomong repwe apasa ngeniei lon ewe ränin kapwüng, ‘Samol, Samol, ifa usun, äm aisap afalafal fän itom? Aisap asüela anün rochopwak fän itom? Aisap pwal föri chomong manaman fän itom?’ Mürin ngang üpwe üreniir, ‘Ngang üsap fokun silekemi. Oupwe sü seniei, ämi chon föri föför mi ngau!” (Mattu 7:22, 23) Jises esap etiwa meinisin mi apasa pwe iir chon äppirü i.

CHOMMONG chon lamalam ra echeni ar kewe afalafal me eörenien ar lamalam. Nge met sipwe erä ika ekkena afalafal are eöreni rese tipeeü ngeni än Kot we Kapas, ewe Paipel? Jises a pwäratä feiengaüen än emön lükü ekkewe afalafal mi chök popu seni aramas lupwen a apasa ngeni ekkewe nöüwisen lamalam lon na fansoun: “Iei usun oua aücheangauei än Kot allük, pwe oupwe föri mine ämi kewe lewo ra aiti ngenikemi.” Mwirin a aloni alon Kot: “Ekei aramas ra asamoluei ren ar kapas, nge leluker a wesewesen toau seniei. A lomotmwäl ar fel ngeniei, pun ra aiti ngeni aramas förien aramas allük usun itä nge ai kewe allük!”​—Mattu 15:1-9; Aisea 29:13.

Esap naf än emön epwe chök lükü, nge a pwal lamot an kewe föfför. Iei alon Paipel ussun ekkoch mi apasa pwe ra fel ngeni Kot: “Ra apasa pwe ra silei Kot, nge ar föför a pwärätä pwe resap silei i.” (Taitos 1:16) Iwe, iei pwal alon ewe Paipel ussun lape ngeni aramas lon ach ei fansoun: “Ra efich pwapwan fanüfan, nge resap echeni Kot. Repwe pomweni pomwen souläng, nge manamanan ra pöütala.”​—2 Timoti 3:4, 5.

Esap naf än emön epwe chök wenechar lon letipan. Pwata? Pun emön epwe pwal tongeni wesewesen lükü minne mi mwääl. Ina minne a fokkun lamot sile mi enlet ussun Kot. (Rom 10:2, 3) Ach käeö ekkena pworaus mi enlet ussun Kot me atipeeüfengeni ach kewe föfför ngeni met ewe Paipel a apasa epwe atufichikich ach sipwe apwapwaai Kot. (Mattu 7:21) Ach eäni ewe lamalam mi pwüng epwe wewe ngeni an epwe pwüng minne epwe achchüngükich, epwe pwüng ekkewe afalafal, me epwe pwüng ach kewe föfför. Iwe, ach föfföri minne mi pwüng a wewe ngeni ach sipwe föri letipen Kot iteiten rän!​—1 Jon 2:17.

Ika ka mochen alapalo om sile ussun met ewe Paipel a apasa ussun Kot, tingorei Chon Pwäratä Jiowa pwe repwe käeö ngonuk ewe Paipel, nge ese kamö.

[Ekis Pworous lon pekin taropwe 9]

Ach eäni ewe lamalam mi pwüng epwe wewe ngeni an epwe pwüng minne epwe achchüngükich, epwe pwüng ekkewe afalafal, me epwe pwüng ach kewe föfför.