Akkamwöchü eü Letip mi Unus Ngeni Jiowa
“Nei mwän, kopwe lükü än semom we Kot, kopwe pwal angang ngeni ren unusen lelukom.”—1 KRON. 28:9.
KÜTTA PÖLÜWEN EKKEEI KAPAS EIS:
Met weween ewe letip?
Ifa ewe eü alen ach sipwe tongeni etittina letipach?
Ifa usun sipwe akkamwöchü eü letip mi unus ngeni Jiowa?
1, 2. Pwata a lamot ach sipwe weweiti weween ewe kapas letip?
FÄN chommong ewe Paipel a nöünöü kifetin inisich lon kapas äwewe pwe epwe äweweei och mettoch. Äwewe chök, Tafit a apasa: “Amwo meser repwe toputop . . . sökürür epwe pwor.” Ewe Paipel a pwal kapas usun ekkewe mettoch Jiowa a oput, kapachelong “peche müttir sä ngeni föför esepwüng.” Jiowa a pwal apasa: “Nengeni, üa makei itom lon pei me ruofoch.” Me ewe soufos Jeremaia a pwal apasa: “Oupwe rongorong ekei kapas, ämi aramas mi umwes o miritingau. A wor mesemi, nge ousap küna. A wor selingemi, nge ousap rongorong.”—Kölf. 69:23; SalF. 6:16-19; Ais. 49:16; Jer. 5:21.
2 Fän chommong Paipel a fos usun ewe leluk are letip. Äwewe chök, lupwen ewe mi tüppwöl itan Hana a iotek, a nöünöü ewe kapas leluk: “Ua pwapwa lon lelukei ren ewe Samol mi Lapalap [Jiowa].” (1 Sam. 2:1) Mi fokkun lamot ach sipwe weweiti weween ewe kapas letip, pun Paipel a erenikich pwe mi lamot ach sipwe tümünü.—Älleani Än Salomon Fos 4:23.
MET WEWEEN LETIP?
3. Ifa usun sipwe weweiti weween ewe kapas letip lon Paipel? Äweweei.
3 Inaamwo ika ewe Paipel ese awora ngenikich weween ewe kapas letip, nge sia tongeni silei weween. Ifa usun? Äwewe chök, ekieki eü lios mi fokkun ling a fför seni chommong föükükkünün faü mi kapachfengen. Ren ach sipwe künaöchü ewe lios mi fför seni chommong föükükkünün faü, mi lamot sipwe ekis towau seni me nengeni. Pwal ina chök usun, a lamot sipwe nengeni ia ewe kapas letip a mak ie lon Paipel pwe sipwe weweiti met weween. Iwe, met weween ewe kapas letip?
4. (a) Met weween ewe kapas letip me lon ewe Paipel? (b) Met weween alon Jises we lon Mattu 22:37?
4 Ekkewe soumakken Paipel ra nöünöü ewe kapas letip le äweweei met unusen napanapen ewe aramas me lon. A kapachelong mochenich, ekiekich, napanapach, föfförüch, tufichich, minne a achchüngükich, me minne sia mochen tikeri. (Älleani Tuteronomi 15:7; Än Salomon Fos 16:9; Fofor 2:26.) Nge fän ekkoch ewe kapas letip esap weneitiir meinisin. Äwewe chök, Jises a apasa: ‘Kopwe tongei om Samol Kot ren unusen letipom, o ren unusen manauom, o ren unusen ekiekum.’ (Mt. 22:37, TF) Me ikeei ie ewe kapas letip a weneiti alolloolun meefien me mochenin emön. Jises a äimufeseni ekkewe kapas letip, manau me ekiek, pun a mochen affata pwe sipwe pwäri ach tong ngeni Kot seni meefiach, ren ifa usun sipwe manaueni manauach me äeä ach ekiek. (Jon 17:3; Ef. 6:6) Nge ika ewe chök kapas letip, iwe, a wewe ngeni unusen napanapen ewe aramas me lon.
LAMOTEN ACH SIPWE TÜMÜNÜ LETIPACH
5. Pwata sia mochen föri ükükün ach tufich le angang ngeni Jiowa ren unusen letipach?
5 King Tafit a ächema ngeni Salomon: “Nei mwän, kopwe lükü än semom we Kot, kopwe pwal angang ngeni ren unusen lelukom me mochenin letipom. Pun ewe Samol mi Lapalap a etittina letip meinisin o weweiti iteiten akot me ekiek.” (1 Kron. 28:9) Jiowa a etittina letip meinisin, kapachelong letipach. (SalF. 17:3; 21:2) Sia tongeni chiechi ngeni Jiowa me küna pwapwa lon mwachkkan ika a sani minne a küna lon letipach. Ina popun sia mochen apwönüetä än Tafit kapasen fön ren ach föri ükükün ach tufich le angang ngeni Jiowa ‘ren unusen letipach.’
6. Met sipwe mirititi usun ach tipeppos lon ach angang ngeni Jiowa?
6 Sia fen pwäppwäratä pwe sia mochen angang ngeni Kot seni unusen letipach, ren ach achocho le angang usun nöün Jiowa aramas. Nge sia mirititi pwe än Setan ei otot mi ngaw me ach kewe pwisin apwangapwang ra tongeni etipetipakich me apwangapwangaalo ach tipeppos lon ach angang ngeni Jiowa ren unusen letipach. (Jer. 17:9; Ef. 2:2) Ika sise mochen an epwe fis ena, a lamot sipwe ekketittina letipach. Ifa usun sipwe föri ena?
7. Met a tongeni pwäri wesewesen masouen letipach?
7 Ese wor emön a tongeni küna met a nom lon kich, usun chök leutun ewe irä ese wor emön a tongeni küna. Iwe nge, lon än Jises we Afalafal me woon ewe Chuuk a erä pwe uwaan ewe irä a pwäri ika ewe irä mi mürinnö lon are ese, iwe, föfförüch kewe ra pwäri met a wesewesen nom lon letipach. (Mt. 7:17-20) Sipwe pworaus woon eü me lein ekkena föfför.
EÜ ALEN ACH SIPWE TONGENI ETITTINA LETIPACH
8. Ifa usun a pwälo minne a nonnom lon letipach me ren alon Jises lon Mattu 6:33?
8 Lon än Jises we Afalafal woon ewe Chuuk, a pwal ereni ekkewe mi aüseling ngeni met repwe föri pwe repwe pwäri ar mochen angang ngeni Jiowa ren eü letip mi unus. A apasa: “Oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.” (Mt. 6:33, TF) A pwälo met mochenich, ekiekich me met sia akkota sipwe föri seni letipach ren ekkewe mettoch sia akkomwa lon manauach. Iwe, eü alen ach sipwe silei ika sia angang ngeni Kot seni eü letip mi unus, ina ach ekiekifichi usun met a fokkun lamot lon manauach.
9. Jises a etiwa ekkoch mwän ar repwe föri met? Meefier a pwäraatä met?
9 Sipwele ppii met a fis ekiselo mwirin än Jises ereni nöün kewe chon äppirü ar repwe kükkütta akkomw an we Mwu. Ei pworaus a pwäri pwe mi tufich ach sipwe silei met emön a meefi lon letipan ren minne a akkomwa lon manauan. Luk a erenikich pwe Jises a fen lükülük lon an filatä le feilo Jerusalem, inaamwo ika a silei pwe epwe küna riäfföü. Lupwen i me nöün kewe aposel ra feilo Jerusalem ra chuuri ekkoch mwän, iwe, Jises a etiwer ar repwe wiliti nöün chon äppirü. Ekkena mwän ra fokkun pwapwaiti an na etiwetiw, nge ra mochen akkomw föri ekkoch mettoch. Emön leir a ereni Jises: “Kose mochen kopwe akom mwüt ngeniei ai üpwe feila lon leniei o peiaseni semei.” Pwal emön a erä: “Ai samol, üpwe etuk. Nge kopwe akom mwüt ngeniei pwe üpwe feila o kapongen amwirimwir ngeni chon ai famili.” (Luk 9:51, 57-61) Sia tongeni küna watteen sokkofesenin än Jises kefil mi lükülük le föri letipen Kot, me ekkewe mwän mi uwopwangapwang le etiwa än Jises we etiwetiw. Ra akkomwa pwisin mocheniir me pwäri pwe rese mochen angang ngeni Kot ren eü letip mi unus.
10. (a) Ifa meefiach ngeni än Jises etiwetiw pwe sipwe wiliiti nöün chon tapwelo mwirin? (b) Ifa ewe kapas äwewe Jises a eäni?
10 Meefien ekkena mwän a sokko seni meefiach. Pun kich sia etiwa än Jises etiwetiw le wiliti nöün chon äppirü me iei sia angang ngeni Jiowa iteiten rän. Ach föri ekkena mettoch a pwäri meefien letipach ngeni Jiowa. Inaamwo ika sia achocho le angang ngeni Jiowa, nge a lamot sipwe chechchemeni pwe letipach a chüen tongeni feiengaw. Met epwe efeiengawa letipach? Sipwe silei pölüwan seni met Jises a apasa ngeni ekkewe mwän a etiwer ar repwe wiliti nöün chon käeö. A öüröürer: “Are emon a iseta poun won plau, minen tu pwul, o epwe nennesefalliti mwirin, iwe, ese tufich ngeni muun Kot.” (Luk 9:62, TF) Ifa ewe lesen lon ei kapas äwewe?
SIA “KAMWÖCHÜNÜK WON MINE A MÜRINA”?
11. Lon än Jises kapas äwewe, met a fis ngeni än ewe mwän angangen ttu pwül, me pwata?
11 Sipwe tichiki än Jises we kapas äwewe pwe sipwe weweöchüti ewe lesen lon. Emön chon angang a ttu pwül. Nge lupwen a ttu pwül a chök ekkekieki pwe itä a nonnom ren chon an famili me chiechian kewe lon leenian we, ra pwapwa le möngöfengen, aüseling nikättik, tattakir me asösö fän och chümon. A pwosiiti ekkeei mettoch. Ekis chök mwirin an ttu ewe pwül, an pwosiiti ekkena mettoch mi apwapwaai manauan a pöchökkülelo, iwe, a nennesefäliti ekkewe mettoch “mwirin.” Inaamwo ika a chüen chommong met epwe föri tori an epwe fotuki ewe atake, nge a tänechelo me ese föröchü an angang. Pwüngün, ewe masta a letipengaw pokiten nöün na chon angang ese likiitü.
12. Ifa usun emön Chon Kraist ikenäi epwe wewe ngeni ewe chon angang lon än Jises we kapas äwewe?
12 Iei sipwe ppii ifa usun ena pworaus a pwal fiffis lon ei fansoun. Ewe chon angang a tongeni wewe ngeni emön Chon Kraist mi nikinikin achocho, nge ren enletin mi apwangapwang lon pekin lükü. Äwewe chök, emön Chon Kraist mwän a fiffiti mwich me angangen afalafal. Iwe nge ese tongeni ükütiw le ekkekieki ekkewe mettochun fönüfan a kan sani. Lon letipan a fokkun sani ekkena mettoch. Mwirin an angang ngeni Kot fitu ier, a pöchökkülelo an mochen ekkena mettoch, iwe, a kulsefäl me nennengeni ekkewe mettoch “mwirin.” Inaamwo ika a chüen chommong met epwe föri lon ewe angangen afalafal, nge a tanechepwakelo me ese chüen angang ngeni Kot usun minne a föfföri me mwan. (Fil. 2:16) Jiowa, “Samolun ewe räs,” a letipengaw ika emön lein nöün kewe chon angang ese chüen wor an likiitü.—Luk 10:2.
13. Met weween ach angang ngeni Jiowa ren eü letip mi unus?
13 A fokkun ffat ewe lesen fän itach. Ach angang ngeni Jiowa ren eü letip mi unus, ese chök wewe ngeni ach fiffiti mwich me akkafalafal. (2 Kron. 25:1, 2, 27) Ika lon letipen emön Chon Kraist a sopwelo le tongei ekkewe mettoch “mwirin,” weween ekkewe mettochun fönüfan, iwe epwe ta an ririöch ngeni Jiowa. Ren ach sipwe angang ngeni Kot seni unusen letipach, sipwe “oput mine a ngau” me “kamwöchünük won mine a mürina.” (Rom 12:9; Luk 9:62) Inaamwo ika a wor ekkewe mettoch lon än Setan ei otot ra nikinikin lamot me apwapwa, nge mi lamot sipwe tümünü pwe esap wor met epwe aükatiw ach angang ngeni Kot seni unusen letipach.—2 Kor. 11:14; älleani Filipai 3:13, 14.
MAMMASAFICHI!
14, 15. (a) Ifa usun Setan a sotun apwangapwangaalo ach tinikken lon ach angang ngeni Jiowa? (b) Äweweei ifa usun Setan a sotun otupukich.
14 Ach tong ngeni Jiowa a amwökütükich le fangolo manauach ngeni i. Seni ena atun, chommong me leich sia änneta ren langattamen fansoun pwe sia tipeppos le angang ngeni Jiowa ren eü letip mi unus. Nge Setan a chüen achocho le etipetipakich, a kan änna letipach. (Ef. 6:12) Pwüngün, i a silei pwe sisap mwittir ükütiw lon ach fel ngeni Jiowa. Iwe, a kan sotuni le otupukich ren an äeä “pisekisekin ei fonufan” le akükkünaalo ach tinikken ekis me ekis. (Älleani Mark 4:18, 19, EWE KAPASEN GOD.) Pwata ei angangen otuputup a fisöch?
15 Ei kapas äwewe a tongeni älisikich le pölüweni ena kapas eis. Anchangei pwe itä ka ällea puk fän eü tengki a fokkun saramaram, nge mwirin ewe tama a mwu. Ka mwittir silei met a fis pwe ewe ruumw a kirocholo. Ka siwili ewe tama me ewe ruumw a saramsefäl. Lon ewe pwinin mwirin, ka ällea puk fän ewe pwal chök tengki. Nge kese silei pwe emön a siwili ewe mineföön tama ngeni eföü mi ekis ttinengaw. Eli kese tongeni esilla sokkofesenin. Iwe pwal sorotä, emön a pwal siwili ewe tama ngeni eföü mi ttinengaw seni ena, ese mwääl kese pwal esilla. Pwata? Pokiten saramen ewe tengki a kükkünülo ekis me ekis, ina pwata kese esilla. Pwal ina chök usun, etipetipaen än Setan ei otot a tongeni ekis me ekis apwangapwangaalo ach tinikken lon än Jiowa angang. Ika emön Chon Kraist ese mammasa, iwe esap tongeni esilla ewe siwil a fiffis ekis me ekis, iwe, Setan epwe win.—Mt. 24:42; 1 Pit. 5:8.
A LAMOT SIPWE IOTEK
16. Ifa usun sipwe tümünükich seni Setan?
16 Ifa usun sipwe tümünükich seni Setan me sopwelo ach angang ngeni Jiowa ren eü letip mi unus? (2 Kor. 2:11) A lamot sipwe iotek. Mwirin än Paul apöchökküla ekkewe Chon Kraist ar repwe “üpöchökül ngeni än ewe Tefil angangen otuputup,” a ereniir ar repwe “iotek fansoun meinisin, ren sokkun iotek are tingor meinisin.”—Ef. 6:11; Ef. 6:18, TF; 1 Pit. 4:7.
17. Ifa ewe lesen sia käeö seni än Jises iotek?
17 Ren ach sipwe akkamwöchü ach tüppwöl, a lamot sipwe äppirü Jises me an mochen angang ngeni Jiowa ren eü letip mi unus. Luk a mak usun napanapen än Jises iotek lon ewe pwinin mwen an epwele mälo: “Non an riaffou wachemuk a fakkun achocho ne iotek.” (Luk 22:44, KG) Jises a achocho le iotek, nge lon ei atun epwele küna watteen riäfföü lon manauan, a “fakkun achocho” le iotek, iwe, a pölü an iotek. Minne Jises a föri a äiti ngenikich pwe ekkoch iotek a tongeni alollool lap seni ekkewe ekkoch. Ewin ach küna ekkewe sossot mi weires me pöchökküloloon än Setan kewe etipetip, pwal ewin ach sipwe fokkun achocho le tingor än Jiowa tümün.
18. (a) Met sipwe pwisin eisinikich usun ach iotek? Pwata? (b) Ikkefa ekkoch mettoch a tongeni kküü letipach? Lon menni napanap? (Ppii ewe pwoor lon pekin taropwe 22.)
18 Met mwiriloon ach achocho le iotek? Paul a apasa: “Lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi.” (Fil. 4:6, 7) Ika sia mochen amwöchü eü letip mi unus ngeni Jiowa, a lamot ach iotek epwe alollool me sipwe iotek iteitan. (Luk 6:12) Iwe pwisin eisinuk: ‘Ifa ükükün alolloolun ai iotek? Fän fite ua kan iotek?’ (Mt. 7:7; Rom 12:12) Minne ka pölüwen ngeni ekkeei kapas eis, epwe pwäri ükükün pöchökkülen om mochen angang ngeni Kot.
19. Met kopwe föri pwe epwe sopwosopwolo om angang ngeni Jiowa ren eü letip mi unus?
19 Usun met sia fen pworaus woon, ekkewe mettoch sia akkomwa lon manauach ra tongeni äiti ngenikich met a nonnom lon letipach. Sia mochen alükülükükich pwe ekkewe mettoch sia lüküsökürür me än Setan angangen otuputup resap apwangapwangaalo ach kefil le angang ngeni Jiowa ren eü letip mi unus. (Älleani Luk 21:19, 34-36.) Sipwe usun chök Tafit le sopwelo lon ach tittingor ngeni Jiowa an epwe ‘fang ngenikich eu leluk esap tipekinikin.’—Kölf. 86:11.