PWÓRÓUS LÚKÚNPÉÉN | EN MI MOCHEN KÁÉ EWE PAIPEL?

Eú Kókkótun Káéén Paipel Fán Iten Meinisin

Chón Pwáraatá Jiowa ra silleló ren ar afalafalfetál. Nge en mi silei pwe mi pwal wor ám kókkótun káéén Paipel mi fis wóón unusen fénúfan?

Lón ewe ier 2014, lap seni 8,000,000 Chón Pwáraatá seni 240 fénú ra fen féri arapakkan 9,500,000 káéén Paipel iteiten maram.a Ewer, a wor órun 140 mwú chóchóón aramasen lón eú me eú a fen kúkkún seni chóchóón ekkewe aramas mi káé Paipel rem!

Ren an epwe fis ei angangen asukul, iteiten ier Chón Pwáraatá Jiowa ra féri arapakkan eú esopw billion Paipel, puk, me pwal ekkóch minen álillis le káé Paipel lón órun 700 fósun fénúfan! Ena angang ese wor táppin a atufichi aramas le káé Paipel lón ewe fós ra pwisin filatá le káé lón.

“Use fókkun sani le káé lón sukul, nge ei esin káé a mmen apwapwa. Ekkewe mettóch ua káé ra fókkun oururuei!”—Katlego, South Africa.

“Ewe kókkótun káé a pélúweni meinisin ai kewe kapas eis me pwal chómmóng.”—Bertha, Mexico.

“Ewe káéén Paipel a fis lón imwei lón fansoun mi fich ngeniei. Iwe, itá pwata usap menemenéch ren?”—Eziquiel, Brazil.

“Fán ekkóch ttamen ám káé a kan 15 ngeni 30 minich are fen lu seni, a chék lóngólóng wóón met a mecheres ngeniei.”—Viniana, Australia.

“Ewe kókkótun káé ese kamé, a fókkun amwarar!”—Aimé, Benin.

“Ewe chón káé Paipel ngeniei a mmen mosonottam me kirekiréch. A mááritá eú riri mi péchékkúl lefilem.”—Karen, Northern Ireland.

“Chómmóng aramas ra káé ewe Paipel nge rese wiliti Chón Pwáraatá.”—Denton, England.

IKKEEI EKKÓCH KAPAS EIS ARAMAS RA KAN EÁNI FÁN ITEN ÁM EI KÓKKÓTUN KÁÉÉN PAIPEL ME PWAL PÉLÚWER

Ifa usun kókkótun masouen ewe káé?

Aua káé sokopaten itelap lón Paipel me etittinafichi ekkewe wokisin lón Paipel mi riri ngeni ekkena itelap. Áwewe chék, ewe Paipel a pélúweni ekkeei esin kapas eis: Ié ena Kot? I met sókkun Kot? Mi wor itan? Ia a nónnóm ie? Sia tongeni ririéch ngeni? Nge a tongeni weires án aramas repwe kúna pélúwer pún rese silei tefen lón Paipel repwe kútta me ie.

Ren ám aupwe tongeni álisi aramas le kúna pélúwen ekkena kapas eis, aua kan néúnéú ewe puk itelapan Met ewe Paipel A Wesewesen Apasa?b Ei puk a ffér lón ewe napanap epwe álisi aramas le weweiti ekkewe popun káit lón Paipel. A kapachelong ekkewe lesen usun Kot, Jesus Kraist, án aramas riáfféú, ewe manawsefál, iótek, me pwal chómmóng itelap.

Ineet ei káé a tongeni fis me ia epwe fis ie?

Ei káé a tongeni fis lón ewe kulók me leeni mi fich ngonuk.

Ifa úkúkún ttamen eú káé?

Chómmóng aramas ra awora órun eú aua iteiten wiik pwe repwe káé ewe Paipel. Nge ka tongeni pwisin filatá úkúkún ttamen óm kopwe káé. Aupwe akkóta ám fansoun pwe epwe fich ngeni óm. Ekkóch a fis ar káé ren úkúkún 10 are 15 minich iteiten wiik.

Fite liwinin ena kókkótun káé?

Ena kókkótun káé me ekkewe mettóch oupwe néúnéú le káé rese kamé. Ei esin kókkót a tipeeú ngeni án Jesus we kapasen emmwen ngeni néún kewe chón káé: “Oua angafatei . . . , oupwe pwal fangafat.”—Mateus 10:8.

Epwe ifa úkúkún fansoun ai káé?

Úkúkún ttamen óm káé a chék pwisin lóngólóng wóóm. Ewe puk Met ewe Paipel A Wesewesen Apasa? a wor 19 lesen lón. A pwisin nónnóm reom ika ka mochen mwittir are mmang le káé ekkóch lein ekkena lesen are fen iir meinisin.

Itá mi wor allúk ai upwe wiliti emén Chón Pwáraatá Jiowa ika ua fiti ewe kókkótun káé?

Aapw. Ám aua mirititi pwe emén me emén aramas a pwisin wor an pwúúng le filatá met epwe lúkú, me aua súféliti. Iwe nge, ika emén a silei ekkewe popun pwóróus lón Paipel, a tongeni filatá met epwe lúkú fán mirit.

Ia ua tongeni kúna me ie pwal ekkóch pwóróus?

A kawor wóón ewe Web site jw.org pwóróus mi enlet usun met Chón Pwáraatá Jiowa ra lúkú me met ra féfféri.

Ifa usun ua tongeni tingor án emén epwe káé ngeniei Paipel?

Waalong óm tingor wóón www.pr418.com.
Mak ngeni eú me lein ekkewe address mi kkan ngeni leeniom, mi mak lón pekin taropwe 2 lón ei puk.

a Lap ngeni, ewe káéén Paipel a kan fis ren emén me emén aramas are kúkkúnún kúmiin aramas.

b Férien Chón Pwáraatá Jiowa. Lap seni 230 million kapiin ei puk a fen peres lón lap seni 260 fósun fénúfan.

A ÁLISI EKKEWE FAMILI

“Lupwen pwúlúwei we a poputá káé Paipel, ua kúna pwe a watte siwil lón manawan. Ám famili a múrinnéló. Ren ai mochen silei met a kákkáé, ua pwal poputá le káé. Minne ua káé a ámúrinnééló napanapei. Ám káé ewe Paipel a efisi ám aupwe pacheéchfengen lón ám famili.”—Eziquiel.

“Mwirin ai poputá káé Paipel, ua úkútiw le akkangei ekkewe sáfei mi efeiengaw me use chúen únnúmmóng sakaw. Ua pwal káé le nemeni ai song. Imwei we a limeliméch me torotoréch seni me lóóm. A lapóló ai aúcheani ai famili me ua sani le féri ekkewe mettóch epwe atoto ngeniir pwapwa. A fókkun lapóló ai pwapwa.”—Karen.

“Ekkóch aramas ra esiitaei ren ai kákkáé Paipel. Nge pwúlúwei we a peniei lón met ua filatá ren an ereniei: ‘Use pwal ekieki met aramas ra apasa. Ai kúna múrinnélóón manawom, ina met a lamot ngeniei. Sópweló lón met ena ke féfféri.’ Esap mwo fán eú lón ánein manawem epwe iei usun múrinnéén ám ei famili!”—Viniana.