Atun A Fis Feiengaw Watte

Andrew, seni Sierra Leone, a erá: “Atun aua kerán kúna kitetterilóón pisekim kewe ren eú séén me eú pwuun konik, aua unusen letipechou.”

David, seni Virgin Islands, a erá: “Aua liwiniti imwem mwirin eú taifun nge ese chúen wor mwirimwirin imwem we me pisekim kewe. Ause chúen silei met aupwe erá. Nei we nengngin a chék pwétérékútiw me kechiw.”

IKA ka fen nóm atun fisin eú feiengaw watte, áwewe chék ren taifun, chchech me metakkan, neman kopwe weweiti meefien ekkewe ekkóch mi fis ngeniir ekkena esin feiengaw. Áwewe chék ekkóch ra máirú, rukoruk, aúrek, rese lúkúmamaw, me ra niouttanei met a fis. Chómmóng ra lichippúng me mélúlúló pwe ese chúen wor ar mochen féri met repwe pwák ren.

Ika ka fen riáfféú pokiten ka nóm atun fisin eú feiengaw watte, neman ka meefi pwe kopwele chék fangetá. Neman kopwe pwal mwo nge poputá le meefi pwe ese chúen wor lamoten óm kopwe manaw. Iwe nge, ewe Paipel a apasa pwe a chúen wor lamotan, me ka tongeni eáni ewe ápilúkúlúk mi amwarar lón mwachkkan.

EWE ENLET SENI PAIPEL A ATOTO ÁPILÚKÚLÚK

Än Salomon Afalafal 7:8 a erá: “A mürina lesopolan mettoch meinisin lap seni lepopun.” Lupwen letipach a kerán chék poputá le chikaretá seni eú feiengaw watte, eli sipwe meefi ápilúkúlúkúngaw. Nge kopwe kúna pwe ekis me ekis epwe tongeni échúló nónnómum atun ka achocho fán mosonottam le émúrinnéló manawom.

Ewe Paipel a oesini pwe epwe wor eú fansoun lupwen “esap chüen wor eman epwe rongorong kechü me siön riaföü.” (Aisea 65:19) Epwe pwénútá ena lupwen ei fénúfan epwe wiliti eú paratis fán nemenien án Kot we Mwú. (Kölfel 37:11, 29) Esap chúen fis feiengaw watte. Sisap chúen chechchemeni metekin me riáfféún letipach pokiten repwe móróppékúló, pún Kot, ewe mi Unusen Manaman a pwonei: “Esap chüen wor eman epwe chechemeni ekewe mettochun lom o ekieki usun.”—Aisea 65:17.

Ekieki mwo ei: Ewe Chón Fératá a akkóta le fang ngonuk “eu fansounöch me apilükülük,” ewe sókkun manaw mi ekinamwe fán án Kot we Mwú mi unuséch. (Jeremaia 29:11) Itá óm silei ena pwóróus mi enlet epwe ámmeef ngonuk pwe mi chúen wor lamoten óm kopwe manaw? Sally, ewe mi mak alon lepoputáán ei lesen, a erá: “Ach ákkáchema ngeni pwisinkich ekkewe mettóch meinisin mi amwarar Mwúún Kot we epwe atoto wóóch lón mwachkkan, epwe álisikich ach sisap chúen nefótófót wóón met ekkewe mi ngaw a fen fis ngenikich, nge sipwe tongeni likiitú fán met mi fiffis ngenikich iei.”

Pwata kese alapaaló óm sile usun met Mwúún Kot we epwe féri ekiseló chék fán iten aramas? Óm féri ena epwe tongeni alúkúlúkuk pwe mi chúen wor lamoten óm kopwe manaw, inaamwo ika ka kúna riáfféú seni fisin feiengaw watte. Me iei ka mwétéresiti ewe fansoun mwach lupwen esap chúen fis feiengaw watte. Nge ren mwo iei, ewe Paipel a awora emmwen mi álilliséch ren ifa usun kopwe tongeni likiitú fán fisin feiengaw watte. Nengeni án Paipel keei álillis.

Ekkewe Wokisin mi Álilliséch

Annaféchú óm asésé.

“Ousipwe feila oukich chök lon eu leni mi toau seni lenien aramas, pwe oupwe tongeni ekis asösö.”—Markus 6:31.

Ekkewe soukáé ra erá pwe mwirin an fis ngonuk minne mi ngaw, nge ika “a nafangaw óm méúr kinamwe . . . iwe epwe tongeni alapaaló riáfféum me osukosuka óm ekiek me memmeef.” Ina minne, a eú alen tipachem óm kopwe annaféchú óm asésé.

Pwáraawu meefiom.

“Än eman aramas öürek lon lelukan a afisätä lolilen [are, “eletipechowu,” NW, footnote], nge eu kapas pwetete a apwapwai i.”—Än Salomon Fos 12:25.

Pwáraawu meefiom ngeni emén chón óm famili are emén chiechiom ka lúkúlúkú. Me lúkún ar repwe aúselinga meefiom, ra pwal tongeni awora kapasen apéchékkúl me álillis.a

Nennelói ewe fansoun éch.

“Än Kot pwon sia witiwiti eu läng mi fö me eu fanüfan mi fö ia pwüng epwe chöchöla ie.”—2 Petrus 3:13.

a Neman epwe lamot ngeni emén mi ssenúk an aúrek me letipechou ren fansoun langattam an epwe kútta álillisin tokter.