Atun A Fis Kirikiringaw lón Pwúpwúlú

Maria seni Spein a erá: “Ua chék mochen má lupwen pwúlúwei we a ereniei pwe epwele péútieiló fán iten emén fefin mi kúkkún seniei. Me rei, ese fókkun pwúng ena, nge ákkáeúin lupwen ua chemeni meinisin met ua fen pennúkú fán itan.”

Bill seni Spein a erá: “Lupwen pwúlúwei we a chék péútieiló, usun emén a angei seniei och kinikinin manawei. Minne aua ápilúkúlúkú, akkóta, me met aua fen áneánei, ra chék móróppékúló. A wor ekkewe atun itá tipei nge ua fen ngase seni ai letipechou, nge mwirin chék ua fókkun letipechou.”

KIRIKIRINGAW lón pwúpwúlú a mmen fókkun ámmetek. Pwúngún, ekkóch pwúpwúlú ra meefi pwe ra tongeni omusaaló tipisin pwúlúwer we mi úkú seni an féffér, me apéchékkúlasefáli ar ririin pwúpwúlú.a Nge ese lifilifil ika ar osukosuk a pwák are ese, nge a mmen watte riáfféún letipen chókkewe pwúlúwer mi kirikiringaw ngeniir. Ifa usun repwe tongeni likiitú fán ar weires?

EKKEWE WOKISIN MI ÁLILLISÉCH

Chómmóng pwúpwúlú, pwúlúwer mi kirikiringaw ngeniir, ra kúna ourur seni Paipel pwal mwo nge fán watteen riáfféún letiper. Ra káé pwe Kot a áfánni chénún meser me a meefi metekin letiper.—Malakai 2:13-16.

“Lupwen a wor chomong ai öürek, en ka achipaei o apwapwai lelukei.”—Kölfel 94:19.

Iei met Bill a chemeni: “Lupwen ua álleani ena wokisin, ua anchangei pwe itá Jiowa a kan echipa letipei, usun chék met emén sam mi tong epwe féri.”

“Ka pwarata om tuppwel ngeni aramas mi tuppwel.”—Kölfel 18:25, Testament Mi Fö.

Iei alon Carmen ewe pwúlúwan we a kirikiringaw ngeni ren fitu maram: “Pwúlúwei we ese tuppwél ngeniei. Nge ua tongeni lúkúlúk pwe Jiowa a tuppwél ngeniei. Esap fókkun elichippúngúei.”

“Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot . . . Oupwe tüngor fansoun meinisin . . . Iwe, än Kot kinamwe mi tekia seni ach tongeni weweiti epwe tümwünü lelukemi.”—Filipi 4:6, 7.

Iei alon Sasha: “Ua álleani ena wokisin fán fite. Nge lupwen ua alapaaló ai ikkiótek ngeni Kot, iwe a ngeniei kinamween manawei.”

Meinisin chókkana mi mak alór asan, fán ekkóch ra chék mochen fangetá. Nge ra lúkúlúk wóón Jiowa Kot me angei péchékkúl seni an we Kapas. Iei met Bill a erá: “Ai lúkú Kot a atoto aúchean manawei lón ewe atun usun itá mettóch meinisin ra chék taló. Ikaamwo ren och fansoun ua fetál ‘lemolun nürün mäla,’ nge Kot a nónnóm rei.”—Kölfel 23:4.

a Ren pwal och pwóróus ika emén epwe omusaaló are esap omusaaló emén, ppii sópwun 13 lón ewe puk itelapan Ewe Kiien Pwapwaan Famili.

Usun án Ekkóch Likiitú

Ekilonei ekkewe wokisin mi oururukich.

Iei alon Bill: “Ua álleani ewe puken Hiop, me mwirin ewe puken Kölfel, nge ua kan erii ekkewe wokisin usun ra weneitiei. Ua mirititi pwe ekkena soumakken Paipel ra pwal kúna ewe esin aúrek me metekin letip ua pwal kúna.”

Angei ourur seni nikáttik.

Iei met Carmen a chemeni: “Ika use tongeni méúr lepwin, ua kan aúseling nikáttik. Iwe a fókkun ekinamweei.” Daniel a erá: “Ua káé kitar me ua meefi pwe ngingiin a eliwinsefálietó kinamween letipei.”

Uwawu meefiom.

Daniel a erá: “Use kan eéreni ai upwe uwawu meefiei. Nge a wor ekkóch chiechiei mi múrinné ua kan fós ngeniir iteiten rán. Ua pwár ngeniir met a aosukosukaei ren ai mak ngeniir are fós ngeniir. Ena mettóch a wesewesen álisiei.” Iei alon Sasha: “A mmen lamot álillisin ai we famili. Inei we a chék mómmólnetá le álisiei fansoun meinisin. Ika ua mochen fós ngeni, a kan awora an fansoun le aúseling ngeniei. Semei we a pwal álisiei le meefi tong me núkúnúkéch, me álisiei ai upwe chikar nge ese pwal atapwalaei.”

Ikkiótek fansoun meinisin.

Carmen a erá: “Ua ikkiótek iteitan. Ua meefi pwe Kot a kan arap ngeniei, akkaúseling ngeniei, me ákkálisiei. A péchékkúleló ai riri ngeni Kot lón ei fansoun ngang mi turutiw lón riáfféú.”