Oupwe Fetäl Ussun Ekkewe Aramas Mi Tipatchem

¹ Lupwen Jises a etiwa fömön chon attau pwe repwe nöün chon äppirü, “ra muttir . . . feilo mwirin i.” (Mt. 4:18-22) A ina ussun Saul me Tarsus lupwen a wiliti emön chon Kraist me a nenelosefäl, “a muttir afalafala lon ekkewe sinakok usun Jises.” (Fof. 9:20) Fetälin ewe kulok a chök fetälelo, ese tongeni epwe pwal liwinsefäl. Ina popun mi lamot ach sipwe fetäl ussun ‘ekkewe mi tipatchem.’​—Ef. 5:15, 16.

² Mettoch Mi Weweitä: Ekkewe fansoun mi suuk ngenikich ach sipwe angang fän iten Jiowa ikenäi repwe tongeni morolo lesor. (Jem. 4:14) Esor emön mi tongeni sü seni “feiengaw [are mettoch mi weiweitä] a tori aramas meinisin.” (SalAf. 9:11, EWE KAPASEN GOD) Pwal eü, ewe “ran me ier mi anoninen” a pwal fiti chinnapelo. Ina a aüküükü ach angang ngeni Jiowa lon ei ootoot. (SalAf. 12:1) Ina popun, esap eü alen tipatchem ach sipwe mmang le fangelo manauach ngeni Jiowa are ach sipwe witiwiti pwe nonnomuch epwe öchchülo me mwen ach sipwe alapalo ach angang. (Luk 9:59-62) Eperiam a küna kinamwe lon fansoun än chinnap, a “malo” fän menemenöch pokiten a äeä manauan ren tipatchem me a unusen tuppwöl ngeni Jiowa.​—Ken. 25:8.

³ Fansoun A Mwochomwoch: Sia mochen äeäfichi ach fan­soun pokiten “ewe fansoun a chok mochomoch.” (1 Kor. 7:29-31) Ekiselo chök, ei ootoot mi ngaü epwele much. Ach fiti ewe angang mi watte le ionifengenni aramas ussun chök siip atun ei “klokun ras” woon ei fönüfan epwele wesilo. (Pwar. 14:15) Sipwe tümünükich pwe sisap mut ngeni aürekin manau epwe aosukosukakich pwe sisap tongeni äeäfichi ach fansoun lon ach ang­ang­en afalafal. (Luk 21:34, 35) A ifa me watteen ach pwapwa lupwen sipwe lesöküriti pwe sia unusen fiti ewe angangen räs!

⁴ Sipwe mammasa fansoun meinisin pwe esap pöüt senikich ekkewe angang mi suuk me apwapwa a nom mwach. Sipwe tipeppos le angang ngeni Jiowa “lon ei fansoun mi iteni ‘Ikenai.’” (Ipru 3:13) Ika sipwe ina ussun sipwe pwäratä pwe kich mi wesewesen tipachchem pokiten “i mi fori letipen Kot epwe nonnom feilfeilo chok.”​—1 Jon 2:17.