Sia Pwäratä Ach Äpilükülük Ussun ewe Mwu

¹ Lon ekkeei ränin sopwoloon mi weires, chommong esor ar äpilükülük allim. (Ef. 2:12) Ekkoch rese pwäratä tipatchem lupwen ra äpilükülük woon ekkewe pisek, sou nemenemen fönüfan, science me met kan. A ifa me watteen ach pwapwa ren ewe äpilükülük mi enlet a nom mwach, “usun efoch angkön ngunuch mi enlet o wenechar”!​—Ipru 6:19.

² Fan nemenien Mwuun Kot, ewe fönüfan epwe wiliti eü paratis. Attongach kewe mi fen mälo repwe manausefäl. (Fof. 24:15) Mwelele, pwüngüngaü, samau, chinnapelo me mälo resap chüen wor. (Kol F. 9:18; Mt. 12:20, 21; Pwar. 21:3, 4) Ikkeei ekkoch än Jiowa kewe pwon repwele pwönuetä. Menni lein ekkewe äpilükülük ka kon ekekkieki ren mwach kan?

³ Arongafetälei ewe Kapas Allim: Sisap chök tukumi ewe äpilükülük allim fän iten ewe Mwu a nom rech. Ach tongei Kot me chon oruch epwe amwö­kü­tü­kich le äppirü Jises me “arongafeili ewe kapas allim, . . . pwarata ar ngaselo ngeni chon eolo, pwal ar anennelosefalli ngeni chon mesechun, . . . angasalo ekkewe chon riaffou.” (Luk 4:18) Ewe aposel Paul a afalafala ewe kapas allim lon ewe leenien amömö me ese pwal lifilifil ikkewe aramas ra nonnom ie. A äeä unusen an fansoun le afalafal. (Fof. 18:5) “Aurekin fonufan me otupuen pisek o mochenia” rese tongeni pwölüelo ach äpilükülük ika sipwe äppirü än Paul we tinikken lon ewe angangen afalafal.​—Mk. 4:19.

⁴ Inaamwo ika ekkoch aramas resap mochen aüseling ngenikich are eriäfföükich, nge ach äpilükülük fän iten ewe Mwu ese tongeni kükkünülo. Sia “aka­mwo­chu ach apilukuluk allim sia fen pwarata, o sisap mokutukut.” (Ipru 10:23) Sisap mwo “sau ren ewe kapas allim.” (Rom. 1:16) Eli ach pwäratä ach tipeppos me likiitü epwe tongeni lukieto ekkoch aramas.

⁵ Inaamwo ika sia kan äiti ngeni aramas pwe ngaüelon ei fönüfan ra apwönüetä ewe oesini lon Paipel, nge esap kich chon uwei kapas mi aniuokkus. Ach ang­ang a menlapei ewe äpilükülük ussun ewe Mwu, ewe kapas allim ussun Mwuun Kot. Amwo itä sipwe afalafala ewe kapas allim ren tipeppos me mwasangasang pwe sipwe “kuna uren ach apilukuluk allim tori le sopwolon.” ​—Ipru 6:11.