Jiowa A Äkkäitikich le Föri ei Angang
1. Lupwen Jiowa a ewisa ngeni aramas eü wis, met a pwal föri?
1 Atun Jiowa a ewisa ngeni aramas eü wis, a pwal älisiir le äwesöchüolo ar angang. Äwewe chök, atun Jiowa a ereni Noa pwe epwe föri ewe waimw, a pwal tichiki ifa usun fförün, pun Noa esaamwo föri fän eü. (Ken. 6:14-16) Iwe, pwal Moses, i emön chon masen siip mi tipetekison. Lupwen Jiowa a ewisa ngeni an epwe fos ngeni ekkewe chinnap mwän me Farao, Jiowa a alükülükü ngeni: “Ngang üpwe alisuk le kapas o aiti ngonuk mine kopwe eäni fos.” (Eks. 4:12) Iwe, Jiowa a pwal äkkäitikich ifa usun sipwe föri ewe angangen afalafala ewe kapas allim. A föri ena ren ewe Sukulen Angangen Chon Kraist me ewe mwich itan Käitin Chon Afalafal. Ifa usun sipwe angei älillis seniir?
2. Ifa usun sipwe angei älillis seni ewe Sukulen Angangen Chon Kraist?
2 Sukulen Angangen Chon Kraist: Iteiten wiik me mwen ach fiti ei mwich, sipwe älleani me käeö ekkewe pworaus mi affat lon kokkotun ach sukul. Iwe, atun ka katol än ekkewe chon sukul äeä ekkena lesen lon ar kewe afalafal, epwe lapolo om weweiti ifa usun kopwe asukula aramas. (SalF. 27:17) Iwe nge, kopwe fokkun feiöch ika kopwe choni ena sukul. Ka fen fiti? Atun epwe wor om kinikin, kopwe ammolnaöchü me pwal apwönüetä ewe kapasen fön. Äeä minne ka käeö me lon ena sukul atun ka lo afalafal.
3. Ifa usun ewe mwich itan Käitin Chon Afalafal epwe älisikich le angangöchülo?
3 Käitin Chon Afalafal: Ika sia akkomw älleani minne sipwe käeö me pwal uwawu meefiach, sipwe chechchemeni ekkewe pworaus mi katowu lon ei mwich. Ika sipwe amwocha ach kewe memmeef, iwe, chommong repwe tongeni uwawu meefier. Nengenifichi ekkewe pwoomw me äeä minne ka käeö seniir atun ka lo afalafal. Kopwe isoni kapiin ekkewe lesen mi älisuk lon om angangen afalafal seni Ach Angangen Afalafala ewe Mwu.
4. Pwata sipwe alamotafichi ekkewe käit seni Jiowa?
4 A chou wisach ei le afalafala ewe kapas allim woon unusen fönüfan usun chök wisen Noa me Moses. (Mt. 24:14) Sipwe sopwöch ika sia eäni lükülük woon Jiowa, ach we Chon Föratä, me alamotafichi ekkewe minen käit a akkawora.—Ais. 30:20.