Eáni Káé mi Álilliséch Ngeni Aramas
1. Ifa ewe wis a nóm ren ekkewe chón afalafal mi kákkáé ngeni aramas?
1 Ese wor emén a tongeni angang ngeni Jiowa, ika Jiowa esap “panato.” (Joh. 6:44) Nge a pwal lamot ekkewe chón afalafal repwe féri wiser le ákkálisi aramas le arap ngeni Semer we lón láng. (Jas. 4:8) Iwe, a lamot ammólnatá. Óm chék álleani eú me eú parakraf me óm chék eis ewe kapas eis mi makketiw ese naf ren óm kopwe álisi ewe chón káé an epwe weweiti ewe pwóróus me feffeitá.
2. Epwe ifa uwaan eú sókkun káé mi álilliséch?
2 Ren an ekkewe chón afalafal repwe eáni káé mi álilliséch ngeni aramas a lamot repwe álisi néúr kewe chón káé pwe repwe (1) weweiti áitien ewe Paipel, (2) etiwa me (3) apwénúetá. (Joh. 3:16; 17:3; Jas. 2:26) Epwe tongeni an epwe fitu maram ach sipwe emmweni emén le féri ekkena mettóch. Nge eú me eú ekkena kinikin a pwáraatá mámmááritáán an ewe chón káé riri ngeni Jiowa me mámmááritáán an mochen fangóló manawan ngeni.
3. Pwata ekkewe sense mi lipwákéch ra eáni ewe sókkun kapas eis mi efisi an ewe chón káé epwe uwawu meefian?
3 Met Ekiekin ewe Chón Káé?: Ren ach sipwe silei ika néúch we chón káé a weweiti me etiwa met a kákkáé, túmúnú pwe kesap chék wisen fóffós nge pesei an ewe chón káé epwe uwawu meefian. (Jas. 1:19) Mi weweiti met ewe Paipel a apasa ren ewe pwóróus oua káé? A tongeni áweweei ewe pwóróus lón pwisin an fós? Met meefian usun minne a fen káé? A lúkú pwe met ewe Paipel a asukula ina alen tipachem? (1 Tes. 2:13) A weweiti pwe met a kákkáé a tongeni álisi lón manawan? (Kol. 3:10) Ren ach sipwe silei pélúwen ekkena sókkun kapas eis, a lamot sipwe lipwákéch le eáni kapas eis epwe efisi an epwe uwawu meefian me sipwe aúseling.—Mat. 16:13-16.
4. Met sipwe féri ika a weires án emén chón káé epwe weweiti are apwénúetá minne a káé seni ewe Paipel?
4 Fán chómmóng a kon péchékkúl minne ewe chón káé a kan ákkeáni ekiek me eérenaaló féfférún, ina popun a weires an epwe péútaaló. (2 Kor. 10:5) Nge epwele ifa ika néúch we chón káé ese etiwa are apwénúetá met a fen káé? A lamot mosonottam pwe epwe awora naféchún fansoun fán iten án Kot we Kapas me manaman mi fel epwe angang lón letipan. (1 Kor. 3:6, 7; Ipru 4:12) Lap seni ach sipwe eriáni ewe chón káé, fán chómmóng ika pwe a weires ngeni an epwe weweiti me apwénúetá eú án Paipel kewe asukul, epwe múrinné sipwe sópweló le káé pwal eú itelap. Atun sia sópweló le asukula fán mosonottam me tong, neman lón eú fansoun epwe chúng letipan, iwe epwe féri ekkewe ekkesiwil mi lamot.