Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • mwbr16 November p. 1-8
  • Áwewe fán Iten Manawach me Ach Angangen Afalafal Mwich

Ese wor video fán iten ei kinikin.

Omusaaló, a wor osukosuk le eppietá ewe video.

  • Áwewe fán Iten Manawach me Ach Angangen Afalafal Mwich
  • Áwewe fán Iten Manawach me Ach Angangen Afalafal Mwich (2016)
  • Itelap Kisikis
  • November 7-13
  • November 14-20
  • November 21-27
  • November 28–December 4
Áwewe fán Iten Manawach me Ach Angangen Afalafal Mwich (2016)
mwbr16 November p. 1-8

Áwewe fán Iten Manawach me Ach Angangen Afalafal Mwich

November 7-13

PWÓRÓUS AÚCHEA SENI KAPASEN KOT | ÄN SALOMON FOS 27-31

“Ewe Paipel A Fós Usun Emén Fin Pwúpwúlú mi Lipwákéch”

w15 1/1 19 ¶10

Aúetá eú Ririin Pwúpwúlú mi Péchékkúl me Pwapwa

10 Jiowa a fang ngeni ewe fefin eú wis mi aúchea lón ewe famili. I ‘chiechien’ pwúlúwan we. (Mal. 2:14) Atun eú pea pwúpwúlú a féri kefil fán iten ar famili, fán súfél ewe fefin a apasawu ekiekin me meefian, nge a chék tipemecheres ngeni pwúlúwan. Ewe mwán mi tipachem epwe aúselingéch ngeni meefien pwúlúwan we. (SalF. 31:10-31) Álleasochis mi fiti tong a tongeni atoto pwapwa, kinamwe me tipeeú lón famili. Iwe, mwán pwúpwúlú me fin pwúpwúlú ra tongeni meefi pwapwa pokiten ra silei pwe ra apwapwaai Kot.​—Ef. 5:22.

w00-E 2/1 31 ¶2

Án Emén In Kapasen Éúréúr mi Tipachem

Usun emén fin pwúpwúlú mi lipwákéch, iei met Lemuel a rong: “Pwülüan we a anomu an apilükülük won.” (Wokisin 11) Weween pwe ewe mwán esap allúkú ngeni pwúlúwan an epwe tingor mumutá iteitan epwe féri mettóch. Nge mi lamot ngeni ekkewe pwúpwúlú ar repwe pwúngúpwúngfengen me mwen epwe eáni kefil mi lamot, áwewe chék ren ekkewe pisek repwe kamé nge mi mémmóng are ifa usun repwe emiriti néúr kewe. Pwóppwóróusfengen wóón ekkena mettóch epwe anúkúchara ar riri.

it-2-E 1183

Fin Pwúpwúlú

Fin pwúpwúlú ra kúna túmún fán ewe Allúkún Moses. Mwán pwúpwúlú i ewe a tekia wisan lón ewe ririin pwúpwúlú nge Kot a allúkú ngeni an epwe túmúnú an famili lón pekin aion me lón pekin lúkú. Pwal och, ika emén chón ewe famili a féri och féfféringaw epwe tongeni eitengawa i pokiten itá wisan an epwe túmúnú féfférún an famili. Inaamwo ika a watte an pwúúng le féri mettóch lap seni pwúlúwan we nge án Kot allúk a túmúnú ewe fefin me a ngeni ekkóch pwúúng pwe epwe tongeni eáni eú manaw mi pwapwa me pwal uwaéch.

Ikkeei ekkóch mettóch ra kawor lón ewe Allúk fán iten fin pwúpwúlú: Mwán pwúpwúlú are fin pwúpwúlú ra tongeni kúna kapwúngún máló pokiten tipisin lisowumwáál. Ika ewe mwán pwúpwúlú a ekieki pwe pwúlúwan we a kirikiringaw ngeni, iwe epwe emmwenaato ren ewe souasor pwe Jiowa Kot epwe apwúngú ena mettóch. Nge ika ewe fefin a tipis epwe riit nge ika ese tipis wisen ewe mwán pwe epwe apwopwooi, ina usun epwe pwár ngeni aramas pwe ewe fefin a liméch. (Num 5:12-31) Emén mwán mi pwúpwúlú a tongeni mu seni pwúlúwan ika a kúna pwe a wor och féfférún limengaw ren. Kapachelong ewe féffér mi kon pwáraatá súfélúngaw ngeni are eitengawa an famili are án seman ewe mwán famili. Nge ewe fefin a kúna túmún seni ena pún ewe mwán epwe makkeei ewe taropween mufesen me ngeni, iwe ewe fefin a tongeni pwúlúweni pwal emén mwán. (Tut 24:1, 2) Ika ewe fefin a féri och pwon nge pwúlúwan a ekieki pwe ese éch are a tongeni efeiengawa ewe famili, ewe mwán a tongeni ómóeló ena pwon. (Num 30:10-15) Ei a mwo nge túmúnú ewe fin pwúpwúlú pwe ete tolong lón eú weires ren an mwittir féri mettóch nge ese akkomw ekiekiéchú.

Allúkún Moses a esen ngeni ewe mwán an epwe pwúlúweni lap seni emén nge a wor allúk pwe epwe túmúnú ewe fefin. Lupwen epwe ineti wéún ngeni néún kewe mwán, esap tongeni ngeni átewe néún me wóón neminnewe a tongei ewe wisen mwánichi nge epwe ngeni átewe néún me wóón neminnewe esap kon sani pún ina i wesewesen néún mwánichi. (Tut 21:15-17) Lupwen emén sam chón Israel a améméló néún fépwúl pwe epwe chón angang nge an we samol ewe a mééni a angei pwe epwe wiliti úlúpwúlúwan nge mwirin esap chúen efich, epwe mutatá án emén epwe mééni nge esap améméló ngeni chón ekis. (Eks 21:7, 8) Ika i are néún alúwél a pwúlúweni nge mwirin a pwúlúweni pwal emén, iwe esap kisiló anan neminnewe, úfan me an we pwúúng ren ewe féffér lefilen mi pwúpwúlú.​—Eks 21:9-11.

Ika emén mwán pwúpwúlú a kirikiringaw ren an tipimwáál ngeni neminnewe pwe a fen tori mwán me mwen ar pwúpwúlú nge a pwá pwe ese pwúng, iwe ewe mwán epwe kúna kapwúng me ménatiw fán ruu ngeni seman neminnewe méén ewe kiis fán iten emén fépwúl esaamwo tori mwán me esap tongeni péútaaló lón ánein manawan. (Tut 22:13-19) Are emén mwán a otupu emén fépwúl esaamwo tori mwán, ese mwo pwal kofot iwe a lisowu ngeni epwe ngeni seman kisan nge ika ewe sam a mutatá pwe epwe pwúlúweni néún na, iwe esap tongeni péútaaló lón ánein manawan.​—Tut 22:28, 29; Eks 22:16, 17.

Inaamwo ika nónnómun fin pwúpwúlú chón Ipru mi sókkóló seni nónnómun ekkewe ekkóch fin pwúpwúlú lón ach ei fansoun, nge fin pwúpwúlú mi tuppwél chón Ipru ra tongeni pwapwaiti wiser me ar angang. A álisi pwúlúwan we, túmúnú an famili me angangen lón imw me a kúna chómmóng mettóch epwe pwapwaiti ren an unusen anganga pwisin tufichin emén fefin a nóm ren.

Napanapen Emén Fin Pwúpwúlú mi Lipwákéch. Nónnómun mi pwapwa me angangen emén fin pwúpwúlú mi tuppwél a mak lón Án Salomon Fos 31. A erá pwe me ren pwúlúwan, a kon aúchea seni faú aúchea. A tongeni onómu an ápilúkúlúk wóón. Neminnewe a fókkun achocho le angang, a túrúni me tei úf fán iten an famili, a kamé met an famili a osupwang ren, a angang lón ewe tánipiin wain, a anganga néún kewe chón angang, a álisi chón mwelele, a aúféúfaéchú an famili, a pwal mwo nge améméló mettóch a pwisin féri ren péún, a túmúnú an famili pwe esap kúna feiengaw, a eáni kapasen tipachem me kirekiréch, a niwokkusiti Jiowa me féfféréch, pwúlúwan me néún kewe ra mwareiti. Ina popun neminnewe a atoto súfél ngeni pwúlúwan me an famili lón fénúan. Ren enletin, emén mwán a kúna emén fefin mi múrinné, a kúna eú mettóch mi múrinné me angei chen seni Jiowa.​—SF 18:22.

Lón án Chón Kraist Mwichefel. Me ren án Chón Kraist mwichefel emén mwán pwúpwúlú epwe chék wor emén pwúlúwan. (1Ko 7:2; 1Ti 3:2) A allúkú ngeni ekkewe fin pwúpwúlú ar repwe nóm fán nemenien pwúlúwer, ese lifilifil ika pwúlúwer emén Chón Kraist are esap. (Ef 5:22-24) Fin pwúpwúlú repwe ngeni pwúlúwer minne ra osupwangan pwal ina chék usun ren ewe mwán pwúpwúlú. Mwán pwúpwúlú are fin pwúpwúlú esap ‘wor ar nemenem won püsin inisir.’ (1Ko 7:3, 4) A allúkú ngeni ekkewe fefin mi pwúpwúlú pwe ar liéch epwe akkomw pwá lón letiper, mi eáni uwaan án Kot we manaman mi fel pún neman ren féfféréchúr chék, pwúlúwer kewe rese lúkú Jiowa repwe tongeni wiliti emén Chón Kraist.​—1Pe 3:1-6.

Kapas Áwewe. Lón kapas áwewe, Jiowa a erá pwe Chón Israel pwúlúwan pokiten a féri och pwonen etipeeú ngeni mwúún Israel. (Ais 54:6) Ewe aposel Paulus a fós usun Jiowa, Seman ekkewe Chón Kraist mi kepit me a pwal fós usun “ewe Jerusalem lon läng” iner usun itá pwúlúwen Jiowa fán iten epwe néúni ekkewe Chón Kraist mi kepit. (Kal 4:6, 7, 26) Ewe mwichefelin Chón Kraist a iteni emén fin apwúpwúlú sefé, pwúlúwan Jesus Kraist.​—Ef 5:23, 25; Pwä 19:7; 21:2, 9.

w00-E 2/1 31 ¶3-4

Án Emén Inelap Kapasen Éúréúr mi Tipachem

Ewer, emén fin pwúpwúlú mi lipwákéch a féri chómmóng mettóch. Lón wokisin 13 ngeni 27 a eiteitetiw ekkewe kapasen éúréúr me emmwen fin pwúpwúlú ese lifilifil ierin a tongeni apwénúetá fán iten ar kewe famili repwe sópwéch. Áwewe chék, pokiten kekiitáán méén úf me pisekin lón imw, emén fin pwúpwúlú mi lipwákéch a káé pwe epwe sipeéch lón angangen paw me a túmúnú moni towu pwe epwe naféch me torotoréch úfen an famili. (Wokisin 13, 19, 21, 22) Ren an epwe kúkkún moni towu fán iten mwéngé, a atakeni met a tufich ngeni me túmúnúéchú met a mééni.​—Wokisin 14, 16.

Iwe, ei fefin esap mwéngé anan “mongö fän chipwang.” A angang weires me akkótaéchú angangen chón leimwan. (Wokisin 27) A fókkun achocho me likiitú le angang. (Wokisin 17) A pwáátá únúmweirán pwe epwe poputá an angang me a fókkun angang weires tori lepwin. Usun itá ewe lamp mi asarama an angang a chék tittin.​—Wokisin 15, 18.

w15 1/1 19 ¶8

Aútá Eú Ririin Pwúpwúlú mi Péchékkúl me Pwapwa

8 Ese pwal lamot án ekkewe mwán pwúpwúlú Chón Kraist repwe eriáni pwúlúwer le súfélitiir. Nge repwe ‘nonom ngeni pwülüer kana fän mirit, [“weweöchüiti usun ar memmef me osupwang,” Agapé] pun inisiir a apwangapwang.’ Me ekkewe mwán ‘repwe meniniti’ pwúlúwer kewe. (1Pe 3:7) Ekkewe mwán pwúpwúlú ra pwáraatá pwe ra aúcheani pwúlúwer ren ar kirekiréch me eáni kapas mi asúfél ngeniir ese lifilifil ika lein aramas are atun ar rúúeménúló chék. (SF. 31:28) Atun ewe mwán a pwári an tong ngeni pwúlúwan, ewe fefin epwe tongei me súféliti i, me Jiowa epwe efeiéchú ar pwúpwúlú.

w00-E 2/1 31 ¶5

Án Emén Inelap Kapasen Éúréúr mi Tipachem

Aúchea seni meinisin, emén fin pwúpwúlú mi lipwákéch i emén mi wor an ririéch ngeni Jiowa. A niwokkusiti Kot me a fel ngeni seni alóllóólun letipan mi súfél. (Wokisin 30) Ina usun a pwal álisi pwúlúwan we le ákkáiti néúr kewe pwe epwe pwal wor ar riri ngeni Kot. Me ren wokisin 26 a iei usun an a asukula néún kewe: ‘A eäni kapasen tipachem, mine a aiti ngeniir . . . a fis fän kirikiröch.’

w00-E 2/1 31 ¶8

Án Emén Inelap Kapasen Éúréúr mi Tipachem

Ese mwáál inen Lemuel a ereni néún we minne a fen pwisin kúna lón manawan usun ewe lamoten an epwe pwáraatá le áfánni neminnewe epwe pélúweni. Ese wor emén wóón fénúfan epwe fókkun tongei pwe pwúlúwan we chék. Iwe anchangei mwo ngingiin atun a apasa meefian nge mwen mesen aramas, a erá: “Chomong fefin ra föri mine a fokun mürina, nge en ka föri mine a mürina seniir meinisin.”​—SF 31:29.

Kúkkútta Pwóróus Aúchea

w15 7/1 8 ¶3

Aúrek Usun Feiengaw

Atun “eman aramas mi mirit” a silei pwe mettóch mi ngaw epwe fis, iwe “a küna ewe feiengau mi feito o opola.” (Än Salomon Fos 27:12) Sia achocho le túmúnú inisich, iwe sipwe pwal túmúnú ekiekich me meefiach. Ekkewe minen apwapwa mi akkachofesá me pwal ekkewe news mi eniweniw ra alapaaló ach me án néúch kewe aúrek. Ach túmúnúkich seni ekkena mettóch ese wewe ngeni pwe sise mochen silei met a fiffis. Kot ese féri tupwuach pwe sipwe ekieki mettóch mi ngaw. Nge sipwe fen aúra ren “mettoch mi let, . . . pwüng, . . . limöch, mettoch aramas ra efich.” Ika sia féri ena, ewe Koten kinamwe epwe ngenikich kinamween ekiek me letip.—Filipi 4:8, 9.

w11-E 8/1 29 ¶2

Eú Ránin Watteen Ápilúkúlúk me Pwapwa

Mwirin, Pwiich Morris a álleani Än Salomon Fos 27:21: “Usun silifer me kolt a pwä öchün lon ewe lenien ketel, iei usun a pwä lapalapen eman aramas, lupwen eman a mwareiti.” A áweweei pwe ika kolt me silifer a lamot ewe angangen repwe liméchúló nge kich neman epwe múrinnéló napanapach ren kapasen mwareiti. Ifa usun? Kapasen mwareiti epwe pwári napanapen emén. Án aramas mwareitikich a tongeni efisi ach eáni ewe napanap lamalam tekia me efisi apwangapwangolóón ach lúkú. Are a tongeni amwékútúkich le meefi ach watteen kilisou ngeni Jiowa me tipeppós le unusen apwénúetá an kewe emmwen. Iwe, Pwiich Morris a pesei ekkewe chón sukul pwe repwe angei kapasen mwareiti lón napanap mi pwúng usun eú fansoun fich le ánneta pwe ra fókkun niwokkusiti Jiowa.

w06 9/1 31 ¶11

Menlapen Pworaus Seni ewe Puken Än Salomon Fos

27:21. A tongeni pwälo lapalapach lupwen aramas ra mwareitikich. A pwälo ach tipetekison lupwen sia chechchemeni pwe ach tufich a pop seni Jiowa, are lupwen ewe kapasen mwareiti a pesekich le likiitu lon ach angang ngeni i. Nge nafangaüen tipetekison a pwälo ika sia tipetekia lupwen aramas ra mwareitikich.

November 14-20

PWÓRÓUS AÚCHEA SENI KAPASEN KOT | ÄN SALOMON AFALAFAL 1-6

“Oupwe Pwapwa lón Ámi Angang Weires”

w15 2/1 4-6

Ifa Usun Sipwe Pwapwaiti Angang Weires

Än Salomon Afalafal 3:13 a apasa: “Aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot.” Ika Kot a mochen ach sipwe pwapwaiti ach angang, iwe itá esap pwal áiti ngenikich ifa usun sipwe kúna ena esin pwapwa? (Aisea 48:17) Sia kilisou pwe Jiowa a awora emmwen usun ena lón an we Kapas, ewe Paipel. Ekieki ekkeei kapasen emmwen seni Paipel ren ifa usun sipwe kúna pwapwa lón ach angang.

ÁMÁÁRAATÁ EKIEK PWÚNG USUN ANGANG

Ikaamwo ka eáni ewe sókkun angangen ofes are angangen paw, nge mi lamot kopwe mirititi pwe epwe chék wor ‘winnen’ emén ika a féri ese lifilifil sókkun angang weires. (Än Salomon Fös 14:23) Met sókkun win? Angang weires a álisikich le pwákini osupwangach lón pekin aion. Pwúngún pwe Kot a pwonei pwe i epwe ataweei osupwangen chókkewe mi enletin fel ngeni. (Mateus 6:31, 32) Nge a pwal mochen ach sipwe féri wisach ren ach sipwe achocho le angang pwe sipwe pwisin atufichikich.—2 Tesalonika 3:10.

Ina minne, sia tongeni ekieki pwe ach angang, ina alen ach sipwe tikeri met sia achocho ngeni. Angang a atufichikich ach sipwe apwénúetá wisach kewe. Joshua, 25 ierin, a erá: “A mmen éch ika sia tongeni atufichi pwisin kich. Ika ka tongeni pwisin mééni met ka osupwangan, iwe a pwénútá ewe popun ka eáni ewe angang.”

Pwal och, ach angang weires a pwal álisikich le meefi pwisin aúcheach. Pún angang weires ina chék pwisin weween pún mi weires. Ika sia likiitú le angang nge meit ika me rech usun itá mi áweires are echchipwang, iwe sipwe tongeni pwapwa pwe sia silei pwe sia fen fiti án Kot ekiek mi tekia usun angang. Sia pworacho ngeni chipwang, ach sipwe chék mochen féri minne mi mecheres. (Än Salomon Fös 26:14) Iwe ren ena mettóch, angang a atoto watteen pwapwa. Aaron, ewe a fen mak alon lón ewe lesen mwen ei, a erá: “Ua kan meefi pwapwa mwirin ai angang unusen rán. Inaamwo ika ua pekkus, are ese pwal wor emén a áfánni met ua fen féri nge ua silei pwe mi aúchea minne ua féri.”

FÉRFICHI WISOM LÓN ÓM ANGANG

Ewe Paipel a fós usun emén mwán “mi sipeöch lon an angang” me emén fefin mi “achocho le angang ren pöün.” (Än Salomon Fös 22:29; 31:13) Nge sap minne emén epwe chék tongeni mwittir sipeéchúló lón an angang. Pwal lap ngenikich sise kon lien pwapwa le féri och angang sia lipwákingaw lón. Eli ina ewe popun chómmóng rese pwapwaiti ar angang pokiten rese achocho pwe repwe lipwákéchúló lón.

Ren enletin, emén a tongeni káé le pwapwaiti sókkópaten angang ika a eáni ekiek pwúng ren an epwe achocho pwe epwe sipeéchúló le féri an angang. William, 24 ierin, a erá: “A mmen apwapwa lupwen ka kúna uwaan óm angang weires. Kese tongeni meefi ena sókkun pwapwa ika pwe ka chék féri óm angang lón alemecheres are féri chék ewe úkúkún angang emén a ewisa ngonuk.”

EKIEKI IFA USUN ÓM ANGANG A ÁLISI ARAMAS

Túmúnú pwe kete kon ekkekieki chék úkúkún peioffum. Nge kopwe fen pwisin eisinuk: ‘Pwata a lamot ei angang? Met epwe fis ika ese pwénútá ei angang are ese pwúng fférún? Ifa usun ai angang a álisi aramas?’

A ákkáeúin éch ach sipwe ekkekieki ena sáingoon kapas eis pún sia fókkun pwapwaiti ach angang ika sia silei ifa usun a álisi aramas. Jesus pwisin a erá: “Sia feiöch ren ach fang lap seni ach angei.” (Föför 20:35) Me lúkún ekkewe aramas ra wesewesen kúna feiéchún ach angang, áwewe chék ren ekkewe kastomer me néúch boss, mi pwal wor ekkóch ra kúna feiéch seni. Ikkena iir chón ach famili me ekkewe mi osupwang.

Chón ach famili. Lupwen ewe mékúren famili a angang weires le atufichi an famili, i a álisiir lón ruu mettóch. Áeúin, a túmúnúfichiir lón pekin aion, ren an awora mwéngé, úf me imw. Ina minne a apwénúetá wisan we me ren Kot an epwe túmúnú “an famili.” (1 Timoty 5:8, Testament Mi Fö) Oruuan, féfférún emén mi tinikken le atufichi an famili a áiti ngenikich lamoten angang weires. Shane, ewe a fen mak alon lón ewe lesen mwen ei, a erá: “Semei we, i eú leenien áppirú ren an emén chón angang mi múrinné. I mi wenechar mi angang weires lón unusen manawan, nge lap ngeni ekkena fansoun i a emén chón táikú. Ua káé seni i lamoten ewe sókkun angang wóón paw, féri pisek mi tongeni álilliséch ngeni aramas.”

Ekkewe mi osupwang. Aposel Paulus a fénéú ekkewe Chón Kraist ar repwe “achocho le angang pwe . . . [repwe] pwal tongeni alisi ekewe mi wöüngau.” (Efisos 4:28) Pwúngún pwe lupwen sia angang weires le atufichi pwisin kich me ach famili, a pwal tongeni suuk ngenikich ach sipwe álisi chón osupwang. (Än Salomon Fös 3:27) Ina minne, angang weires a tongeni atoto ngenikich pwapwa wachemwuk seni ach fangafangéch.

FÉRI LAP SENI MET EMÉN A KÚTTA SONUK

Lón án Jesus we afalafal mi iteféúló me wóón ewe chuuk a erá: “Are eman sounfiu epwe arianuk pwe kopwe uwei pisekin lon ükükün eu mail, kopwe fen etala ruu mail.” (Mateus 5:41) Ifa usun kopwe tongeni apwénúetá lón óm angang ena kapasen emmwen? Lap seni óm kopwe chék féri ewe úkúkún angang noum boss a erenuk kopwe féri, ppii ifa usun kopwe féri pwal ekkóch mettóch mi fen lap seni ena. Ekieki met ka mochen achocho ngeni, me achocho le aéchúeló are emwittiraaló napanapen óm féri óm angang. Unusen féréchú óm angang pwal mwo ekkewe ákkáekisin angang.

Lupwen ka féri lap seni met noum boss a kútta sonuk, ese mwáál epwe lapóló óm pwapwaiti óm angang. Pwata? Pún ka pwisin nemeni óm féffér. Ka féri lap seni met emén a kútta sonuk pokiten ina pwisin mochenum, nge esap pokiten emén a eriánuk. (Filimon 14) Iwe ren ena mettóch sia tongeni chemeni ewe kapasen emmwen lón Än Salomon Fös 12:24, a erá: “Eman mi achocho le angang epwe nemenem, nge eman mi chipwang epwe wisen föri angangen kinroosi.” Pwúngún, lap ngenikich esap kich slave fán emén masta. Iwe nge, emén mi féri met chék néún boss a ereni, epwe tongeni meefi pwe i emén slave chón ataweei mochenin ekkewe ekkóch. Nge ika emén a pwisin filatá le féri angang mi lap seni met néún boss a kútta seni, iwe epwe meefi pwe a pwisin nemeni manawan me met a mochen féri.

EÁNI EKIEK MI ITEPÉK ME RÚÚEPEK USUN ANGANG

Inaamwo ika sia ingeló ren ewe mettóch angang weires, nge sipwe chechchemeni pwe mei pwal wor mettóch mi lamot lón manawach me lúkún angang. Pwúngún, ewe Paipel a pesekich ach sipwe tinikken lón ach angang. (Än Salomon Fös 13:4) Nge ese pesekich ach sipwe akkangangoló chék iteitan. Än Salomon Afalafal 4:6 a apasa: “A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.” Met weween ei wokisin? Emén mi akkangangoló chék iteitan ese tongeni pwapwaiti uwaan an angang pún an angang a fen angealó unusen an fansoun me péchékkúl, iwe a fen lamotmwáál an angang, usun “a turufi asepwäl chök.”

Ewe Paipel a tongeni álisikich le ámááraatá eú ekiek pwúng usun angang. Inaamwo ika a erá pwe mi lamot sipwe angang, nge a pwal pesekich ach sipwe túmúnú le “filätä mine a fokun mürina.” (Filipi 1:10) Ikkefa ekkena mettóch mi fókkun múrinné? A kapachelong ach awora fansoun fán iten ach famili me chiechiach kewe. Nge a ákkáeúin lamot ach fel ngeni Kot, áwewe chék ren ach álleani me ekilonei án Kot we Kapas.

Chókkewe mi eáni ewe sókkun manaw mi itepék me rúúepek epwe lapóló ar pwapwaiti ar angang. William, ewe a fen mak alon me mwan, a erá: “Emén mwán ua piin angang ngeni a fókkun eáni ekiek mi itepék me rúúepek usun angang. A angang weires, me néún kewe kastomer ra fókkun sani pún a angangéch. Nge sárin an angang, a silei pwe epwele mwo wes le angang me awora fansoun fán iten an famili me an fel ngeni Kot. Nge ka silei met? I emén me lein ekkewe aramas mi fókkun pwapwa ua sissileer!”

[Pwóór lón pekin taropwe 5]

Meefier Usun Angang Weires

“Ua pekkus sárin ai angang, nge ua pwapwa me meefi aúchean met ua fen féri. Ua silei pwe ua wesewesen angang lón ena rán.”​—Nick.

“Itá sipwe angang weires atun sia féri ach angang. Ika ka mochen féri och mettóch mi aúchea, iwe kopwe féréchú.”​—Christian.

“Inisich a tufichin féri chómmóng mettóch mi amwarar. Ua mochen pwáraatá ai kilisou ren ei liffang manaw ren ai áeá le angang weires me álisi aramas.”​—David.

w15 2/1 6 ¶3-5

Ifa Usun Sipwe Pwapwaiti Angang Weires

EÁNI EKIEK MI ITEPÉK ME RÚÚEPEK USUN ANGANG

Inaamwo ika sia ingeló ren ewe mettóch angang weires, nge sipwe chechchemeni pwe mei pwal wor mettóch mi lamot lón manawach me lúkún angang. Pwúngún, ewe Paipel a pesekich ach sipwe tinikken lón ach angang. (Än Salomon Fös 13:4) Nge ese pesekich ach sipwe akkangangoló chék iteitan. Än Salomon Afalafal 4:6 a apasa: “A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.” Met weween ei wokisin? Emén mi akkangangoló chék iteitan ese tongeni pwapwaiti uwaan an angang pún an angang a fen angealó unusen an fansoun me péchékkúl, iwe a fen lamotmwáál an angang, usun “a turufi asepwäl chök.”

Ewe Paipel a tongeni álisikich le ámááraatá eú ekiek pwúng usun angang. Inaamwo ika a erá pwe mi lamot sipwe angang, nge a pwal pesekich ach sipwe túmúnú le “filätä mine a fokun mürina.” (Filipi 1:10) Ikkefa ekkena mettóch mi fókkun múrinné? A kapachelong ach awora fansoun fán iten ach famili me chiechiach kewe. Nge a ákkáeúin lamot ach fel ngeni Kot, áwewe chék ren ach álleani me ekilonei án Kot we Kapas.

Chókkewe mi eáni ewe sókkun manaw mi itepék me rúúepek epwe lapóló ar pwapwaiti ar angang. William, ewe a fen mak alon me mwan, a erá: “Emén mwán ua piin angang ngeni a fókkun eáni ekiek mi itepék me rúúepek usun angang. A angang weires, me néún kewe kastomer ra fókkun sani pún a angangéch. Nge sárin an angang, a silei pwe epwele mwo wes le angang me awora fansoun fán iten an famili me an fel ngeni Kot. Nge ka silei met? I emén me lein ekkewe aramas mi fókkun pwapwa ua sissileer!”

Kúkkútta Pwóróus Aúchea

w08 4/1 26-27 ¶9-10

Met A Efisi Pwe Manauach Epwe Lamot?

Sipwe Itä Meefi Menemenöch Ren Pisek?

9 Salomon, i emön mi fokkun wöüöch me lein chon fönüfan lupwen a makkei Än Salomon Afalafal. (2 Kron. 9:22) A tufichin angei mettoch meinisin minne a mochen. A makkei: “Meinisin mine mesei a mocheniaiti üa chök angei.” (SalAf. 2:10) Iwe nge, a küna pwe pisek chök esap atoto menemenöch. A mirititi pwe “Eman mi efich moni esap menemenöch ren an moni tolong, nge eman mi efich wöü esap pwal menei mine a tori.”—SalAf. 5:10.

10 Inaamwo ika a mwittir morolo aücheaan pisek, nge aramas ra chüen akkachocho ngeni. Lon Merika, lon eü kütten ekiekin aramas, 75 persentin ekkewe chon fiti sukul tekia ükükün eü ier, ra apasa pwe ra äkkäeüin achocho ngeni ar repwe “wöüöch.” Iwe nge, inaamwo ika repwe angei minne ra achocho ngeni, nge repwe wesewesen pwapwa? Sap fansoun meinisin. Ekkoch sou käeö ei pworaus ra küna pwe än aramas alamota moni me pisek chök a aweiresi ar repwe wesewesen pwapwa me menemenöch. Loom loom, Salomon a fen weweiti ena mettoch. A makkei: “Üa achufengenni silifer me kolt fän itei, pwal chommong sokkun wöün king me fönü . . . Iwe, nennengeni! Meinisin a pöön, a ussun chök turufi äsepwäl.” (SalAf. 2:8, 11, NW) Iwe nge, ika sipwe äeä manauach le angang ngeni Jiowa ren unusen letipach me angei an feiöch, sipwe enletin wöüöch.—Älleäni SalF. 10:22.

w06 11/1 29 ¶9

Menlapen Pworaus Seni ewe Puken Än Salomon Afalafal

3:16, 17. Esap pwüng ach sipwe ekieki pwe epwe fis minne mi pwüng lon iteiten osukosuk meinisin. Sisap aüreki minne a fiffis woon fönüfan lon ei fansoun, nge sipwe witiwit woon Jiowa an epwe awenechara mettoch meinisin.

November 21-27

PWÓRÓUS AÚCHEA SENI KAPASEN KOT | ÄN SALOMON AFALAFAL 7-12

“Lesáráféom Kopwe Chechchemeni ewe mi Féruk”

w14 1/1 18 ¶3

Féri Kefil mi Múrinné Atun Sáráfé

ÓM KEFIL MI LAMOT SENI MEINISIN

3 Ewe fansoun sáráfé, ina ewe fansoun kopwe féri ekkewe kefil mi lamot. Nge ewe kefil mi lamot lap seni meinisin, ina óm kefil ika kopwe angang ngeni Jiowa. Ineet ewe atun mi fich kopwe féri ena kefil? Jiowa a erá: “Lealüalum kopwe chechemeni ewe mi föruk.” (SalAf. 12:1) Ka chék tongeni enletin “chechemeni” Jiowa ika ka unusen angang ngeni i. (Tut. 10:12) Óm kefil le angang ngeni Kot ren unusen letipom, ina ewe kefil mi lamot seni meinisin kopwe féri. Epwe kkúú unusen manawom.—Kölf. 71:5.

w14 1/1 22 ¶1

Angang Ngeni Jiowa me Mwen Ekkewe Rán mi Ngaw

FÁN emmwenien Kot, King Salomon a eáni ei kapasen pesepes ngeni ekkewe sáráfé: “Lealüalum kopwe chechemeni ewe mi föruk, mwen ekewe rän mi ngau repwe feito.” Menni “ekewe rän mi ngau” a fós usun? Salomon a áweweei usun án ekkewe chinnap weires, ren choweán chchechin péúr, apwangapwangen pecher, chókúkkúnulóón ngiir, toputopulóón meser, púngúlóón selinger, úwanen mékúrer me pworolóón inisiir. Itá esap wor emén epwe ekiekin witiwit tori an a chinnap pwe epwe poputá le angang ngeni Jiowa.​—Álleani Än Salomon Afalafal 12:1-5.

w08 11/1 23 ¶2

Ekiekich Ussun Pekin Säfei Epwe Longolong Woon Paipel

2 Än Salomon Afalafal sopwun 12 a awewefichi met a fis lon ‘ekkewe rän mi eriäfföü’ atun aramas rese unusöch ra chinnapelo. (Älleani Än Salomon Afalafal 12:1-7.) Mökürach epwe üwan. Pechech repwe pwor me chechchech. Mesach kewe repwe nennengaü me toputopulo. Ngiich repwe rosolo, pwe sisap chüen tongeni lülü woon.

w06 11/1 31 ¶7

Menlapen Pworaus Seni ewe Puken Än Salomon Afalafal

11:9; 12:1-7. Ekkewe säräfö repwe etittin mwen mesen Jiowa. Ina minne, repwe äeäfichi ar fansoun me pöchökkül lon ar angang ngeni Jiowa me mwen ar chinnapelo epwe arosolo ar pöchökkül.

w11-E 11/1 21 ¶1-6

Arap Ngeni Kot

Akkapwénúetá Wisach Ngeni Kot

KA FEN mwo ekieki ika, ‘Met popun sia manaw?’ Jiowa ese chék atufichikich pwe epwe wor ach tufichin eáni ena sókkun kapas eis nge a pwal atufichikich pwe sipwe fókkun mochen seni letipach le kútta pélúwan. Sia kilisou ngeni Kot ewe mi tong pún a awora pélúwen ena kapas eis. Pélúwan we sia fókkun kúkkútta a nóm lón an we Kapas, ewe Paipel. Ekieki mwo met King Salomon a apasa lón Än Salomon Afalafal 12:13.

Salomon a tekia seni aramas meinisin. A fókkun tongeni apasa an memmeef ren ifa usun sipwe kúna pwapwa me met popun sia manaw. Salomon a eáni eú tipachem mi luló, a fókkun pisekisek me pwal i emén king, ina popun a tongeni kúttafichi pwóróus ika pwata aramas ra angang weires kapachelong ar chei wéú me iteféúló. (SA 2:4-9; 4:4) Fán álillisin Kot, iei met a apwúngaló: “Oupwe rong ei kapasen lesopolan: Oupwe niueiti Kot o alesochisi an kewe allük, pun iei a fichiti aramas meinisin.” Ekkeei kapas ra menlapei ewe sókkun angang aramas repwe achocho ngeni pún mi kon échitiir me pwal fókkun pwúúng.

“Oupwe niueiti Kot.” Neman me akkomwan ekkóch rese kon weweiti ena ekiek pwe sipwe niweiti Kot. Nge ei napanap niweiti Kot eú napanapen ewe letip mi múrinné. Neman sisap ekieki usun emén slave mi fókkun niwokkusiti emén masta mi fókkun song me kirikiringaw nge sipwe ekieki emén semirit mi mwétéresiti le apwapwaai letipen seman we mi tong. Eú puk a apasa pwe niweiti Kot a wewe ngeni án “néún Kot kewe aramas pwáraatá súfél me mennin pokiten ra tongei me súféliti manamanan me tekian.” Ena ekiek ika féffér a amwékútúkich le álleasochis pokiten sia tongei me silei pwe Kot a tongekich. Ach niweiti Kot lón napanap mi pwúúng esap chék eú memmeef nge epwe pwáló lón féffér. Ifa usun?

“Alesochisi an kewe allük.” Niweiti Kot a amwékútúkich le álleasochisi i. A pwúng ach sipwe álleasochisi Jiowa. Pokiten i ewe Chón Férikichetá, a silei ewe sókkun manaw epwe échitikich usun chék emén chón ffér pisek a silei pwúngún áeáán ewe pisek a féri pwe epwe échiti chón áeá. Pwal eú, Jiowa a chúngúkich. A mochen sipwe pwapwa me an kewe allúk a kawor pwe sipwe manawéch. (Ais 48:17) A iei usun met ewe aposel Johannes a apasa: “Wewen ach echeni Kot pwe sia aleasochisi an kewe allük. Nge an kewe allük resap weires ngenikich.” (1Jo 5:3) Ach álleasochisi i a pwáraatá ach tongei Kot nge an kewe allúk a pwáraatá pwe i a tongekich.

“Pun iei a fichiti aramas meinisin.” Ekkeei kapas ra menlapei eú popun a lamot ach sipwe niweiti Kot me álleasochisi. Ina wisach ach sipwe féri ena. Jiowa Kot i ach Chón Fératá, pokiten i sia manaw. (Kf 36:9) A fichiitikich ach sipwe álleasochisi. Atun sia manaweni manawach me ren met Kot a mochen, iwe sia apwénúetá wisach.

Iwe nge, met popun sia manaw? A ffat pwe sia manaw pwe sipwe féri letipen Kot. Ese pwal wor och sókkun manaw epwe échiti manawom. Pwata kese kútta pwal ekkóch pwóróus usun letipen Jiowa me ifa usun kopwe etipeeú manawom ngeni letipan? Chón Pwáraatá Jiowa repwe pwapwa le álisuk.

Kúkkútta Pwóróus Aúchea

w06 11/1 31 ¶3

Menlapen Pworaus Seni ewe Puken Än Salomon Afalafal

10:1. A fokkun lamot ach sipwe tüttümünüfichi ach kewe kapas me föfför. Emön mi itöch epwe tongeni itengaüolo ren eü chök föfför mi mwääl, awewe chök, ren chök fän eu an püppüchör fän song, an ünüpuch, are an föri och föfförün sikepwach.

w06 11/1 31 ¶5

Menlapen Pworaus Seni ewe Puken Än Salomon Afalafal

11:1, 2. Sipwe fangafangöch ngeni aramas seni unusen letipach. Mwirin, aramas repwe pwal kisäseü me fangafangöch ngenikich.—Luk 6:38.

November 28–December 4

PWÓRÓUS AÚCHEA SENI KAPASEN KOT | ÄN SALOMON KÖL 1-8

“Fépwúlún Sulam, Sipwe Fókkun Áppirú”

w15 1/1 30 ¶11-13

Mi Tufich án Tong Epwe Likiitú?

OUSAP AOSUKOSUKAEI

11 Än Salomon Köl a awora ekkewe lesen fán iten ekkewe Chón Kraist mi lipich, ákkáeúin fán iten chókkewe ra ekiekin pwúpwúlú. Ewe fépwúl ese sani Salomon. Iei alon ngeni ekkewe fefin mi nóm lón imwen ewe king pwe repwe pwon: ‘Ousap aosukosukaei tori ai upwe pwisin meefi ai tong ngeni emén.’ (SalK. 2:7; 3:5, NW) Pwata? Pokiten ese pwúng án emén epwe poputá le chék sani emén ese lifilifil. Ina minne, emén Chón Kraist mi mochen pwúpwúlú epwe tipachem ika epwe mosonottam le witiwit fán iten ewe emén a tongeni enletin tongei.

12 Pwata ewe fépwúlún Sulam a tongei ewe chón masen siip? Pwúngún pwe ewe chón masen siip i mi átéch usun “eman chia,” péún a péchékkúl usun chék ekkewe “fochun kolt” me pechen kewe iir mi napéch me péchékkúl usun “chök ür seni ewe fau itan alapaster.” Nge i ese chék átéch me péchékkúl. Me ren ewe fépwúl, ‘ätena mi wor tongan me ren a nom lein ekkewe alüal usun chök efoch apel lein wöllap.’ Ika ena fépwúl mi tuppwél ngeni Jiowa a ina usun meefien ngeni ena alúwél, iwe ese mwáál, átena mi pwal tongei Jiowa.—SalK. 2:3, 9; 5:14, 15.

13 Nge ifa usun ewe fépwúlún Sulam? I a fókkun liéch, emén king a sani nge ena king lón ena atun a ‘wor wone kiwin me walik ülüpwülüan, pwal föpwül resap lea.’ Nge ena fépwúl a meefi pwe i a chék usun “epö pön rous seni Saron,” weween ewe esin péén irá mi chék pwúkúfetál. A fókkun tipetekison. Ina popun me ren ewe chón masen siip i mi kkóló aúchean “usun chök epö pön kiop lein iräfölüföl.” A tuppwél ngeni Jiowa.—SalK. 2:1, 2; 6:8.

w15 1/1 31 ¶14-16

Mi Tufich án Tong Epwe Likiitú?

14 Ewe Paipel a awora ei kapasen fén ngeni Chón Kraist pwe repwe pwúpwúlú “lon chok ewe Samol.” (1 Kor. 7:39, Testament Mi Fö) Emén mi lipich mi mochen pwúpwúlú itá esap poputááni och riri ngeni emén chón lúkún nge epwe chék kútta pwúlúwan lein ekkewe mi tuppwél ngeni Jiowa. Pwal och, mi lamot ekkewe pwúpwúlú repwe tuppwél me lúkúlúkú Kot ren an epwe wor kinamwe me tipeeú lón ar famili, inaamwo ika repwe nóm fán sókkópaten weires. Ikkena ekkena sókkun napanap emén epwe kútta seni emén a ekiekin pwúlúweni. Nge pwal ekkena napanap ra nóm ren ewe fépwúl me ewe chón masen siip.

KÓFÓTI, “KA USUN CHÖK EU TANIPI MI KÖPÜNG”

15 Álleani Än Salomon Köl 4:12. Pwata ewe chón masen siip a áweweei pwe néún we áchengicheng a usun “eu tanipi mi köpüng”? Ika mi ttit eú tánipi, weween pwe esap suuk ngeni aramas ese lifilifil. Eú chék leenien tolong, me lón ewe ttit mi kapwúng. Ewe fépwúlún Sulam a usun ena tánipi, pún an tong fán iten chék kófótun we, ewe chón masen siip. Ren an ese etiwa án ewe king tong, a ánnetatá pwe i a usun “eu tit” nge esap “eu asamalap” mi chék suuk ngeni ese lifilifil chón mochen tolong. (SalK. 8:8-10) Pwal ina chék usun ren ekkewe lipich Chón Kraist, ar tong epwe chék fán iten ekkewe repwe pwúlúweni.

16 Lupwen ewe chón masen siip a tingorei ewe fépwúlún Sulam ika repwe tongeni kunoufengen eú rán, mwongean kewe rese mut ngeni. Nge ra fen ewisa ngeni an epwe túmúnú ewe tánipiin wain. Pwata? Rese lúkúlúk ren? Ra ekieki pwe a limengaw án fefiner na ekiek? Ren enletin, ra chék túmúnú pwe fefiner we ete tolong lón sóssót. (SalK. 1:6; 2:10-15) Iwe, iei ewe lesen fán iten ekkewe lipich Chón Kraist: Atun ewe fansoun anginfengen, túmúnú pwe epwe fis lón limeliméch. Ousap ló ngeni ekkewe leeni oupwe chék rúúeménúló. Pwáraatá óm tong lón ewe napanap mi liméch nge túmúnú seni ekkewe mettóch epwe tongeni emmwenikemilóng lón sóssót.

Kúkkútta Pwóróus Aúchea

w15 1/1 30 ¶13

Mi Tufich án Tong Epwe Likiitú?

13 Nge ifa usun ewe fépwúlún Sulam? I a fókkun liéch, emén king a sani nge ena king lón ena atun a ‘wor wone kiwin me walik ülüpwülüan, pwal föpwül resap lea.’ Nge ena fépwúl a meefi pwe i a chék usun “epö pön rous seni Saron,” weween ewe esin péén irá mi chék pwúkúfetál. A fókkun tipetekison. Ina popun me ren ewe chón masen siip i mi kkóló aúchean “usun chök epö pön kiop lein iräfölüföl.” A tuppwél ngeni Jiowa.—SalK. 2:1, 2; 6:8.

w15 1/1 28 ¶3

Mi Tufich án Tong Epwe Likiitú?

A TUFICH AN EPWE WOR TONG MI LIKIITÚ!

3 Álleani Án Salomon Köl 8:6. Lón ekkóch afféwún Paipel ra áweweei tong usun “ngetengetan Jiowa.” Pwata? Pún I populapen ena sókkun tong. A féri aramas lón pwisin napanapan pwe repwe tongeni pwáraatá tong. (Ken. 1:26, 27) Lupwen Kot a ngeni Atam ewe áeménún fefin Efa, Atam a fókkun pwapwa me a apasawu meefian lón kúkúún kapas. Ese mwáál Efa a pwal meefi pwe i a pacheéch ngeni Atam, ewe mwán Efa a “pop seni.” (Ken. 2:21-23) Pokiten Jiowa a fen atufichi aramas le pwáraatá tong, iwe mi tufich an epwe wor ewe sókkun tong mi núkúchar me likiitú lefilen emén mwán me emén fefin.

w06 12/1 27 ¶7

Menlapen Pworaus Seni ewe Puken Än Salomon Köl

Tong enlet a ussun chök ‘ngetengeten’ Jiowa. Met popun? Pokiten ena esin tong a feito seni Jiowa. A efisatä ach tufichin meefi tong. Tong mi ussun chök ekkei mi ngetenget nge esap tongeni kululo. Än Salomon Köl a awewei pwe ewe tong lefilen emön mwän me emön fefin a “pöchökül [esap muchulo] usun mäla.”​—Än Salomon Köl 8:6.

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share