Eú Leeni Mi Lingéch

NENGENI ei fénúfan lón ei lios! A ifa me lingéchún mettóch meinisin! Nengeni ei fetil, ekkeei irá, ekkeei péén irá me pwal ekkeei man meinisin. En mi tongeni itini ekkewe elefán me laion?

Ié a fératá ei leeni mi lingéch? Kot. Iwe, sipwe káé ifa usun án Kot ammólnatá ei fénúfan fán itach.

Akkomw, Kot a féri ewe sipa pwe epwe pwélúoló ewe fénú. A pwal fératá chómmóng sókkun fetil, petewel me irá. Ekkeei sókkun mettóch mi kan mámmáár ra elinga fénúfan. Nge, mei pwal wor och popun ra fférútá. Chómmóng me leir sia tongeni mwéngé seniir me ra fókkun anné.

Mwirin, Kot a fératá ekkewe iik ar repwe nóm leset me pwal ekkewe machchang ar repwe ákkáás fán láng. A fératá kolak, káttu, oris me ekkewe man watte me pwal man kúkkún. Met sókkun man ra nónnóm lúkún imwom we? Esap pwe sia pwapwa pwe Kot a fératá ekkeei mettóch meinisin fán itach?

Iwe, a tori ewe atun Kot a ammólnatá eú kinikinin fénúfan pwe epwe eú leeni mi fókkun múrinné. A eita ngeni ena leeni, Eten. A wesewesen múrinné. Ekkewe man, irá me mettóch meinisin ra lingéch. Iwe, Kot a pwal mochen pwe unusen ei fénúfan epwe usun chék férian ei leeni mi lingéch.

Iwe, nengenisefáli liosun ei leeni. Ka silei met Kot a kúna pwe esaamwo wor lón ei leeni? Sipwe ppii.