Kot A Féraatá Láng me Fénúfan

Jiowa Kot i ewe Chón Féraatá. A féri mettóch meinisin, met sia tongeni kúna me met sise tongeni kúna. Me mwen an féraatá ekkewe mettóch sia tongeni kúna, a féri chómmóng chómmóng chónláng. En mi silei iká met chónláng? Iir chókkewe Jiowa a fériir pwe repwe ussun chék i. Sise tongeni kúner, ussun chék ach sise tongeni kúna Kot. Ewe áeménún chónláng Jiowa a féri a wisen álisi i. Ena chónláng a álillis atun Jiowa a féraatá ekkewe fúú, ekkewe planet, me pwal mettóch meinisin. Eú ekkena planet a féri, ina ewe fénúfan leeniach we mi ling.

Iwe mwirin, Jiowa a ammólnatá ewe fénúfan fán iten ekkewe man me aramas pwe repwe tongeni nóm wóón. A féri ewe akkar pwe epwe asarama ewe fénúfan. A féri ekkewe chuuk, mataw, me chénúpupu.

Met a fis mwirin? Iei met Jiowa a erá: ‘Úpwe féri fetil me irákis me irá.’ Iwe, a poputá le mámmááritá chómmóng sókkun féún irá, iásái, me péén irá. Mwirin, Jiowa a féri meinisin ekkewe sókkun man mi áás, nóm fán sáát, me téfetál. A féri ekkewe mi kúkkún, áwewe chék ren usangi, me ekkewe mi watte, áwewe chék ren áláfán. Menni man ka mmen sani?

Mwirin, Jiowa a ereni ewe áeménún chónláng: “Sipwe föri aramas mi wewe ngenikich.” Aramas ra sókkóló seni man. Ra tongeni féri mettóch, ra tongeni fós, takir, me iótek. Repwe túmúnú fénúfan me ekkewe man. Ka silei ié ewe áeménún mwán? Sipwe ppii.