Eú Imw Mangaku Fán Iten Fel

EN MI silei ika imwen met ei? Iei eú imw mi imuló fán iten án aramas fel ngeni Jiowa. A pwal iteni imwenfel mangaku. Ekkewe aramas ra áwesaaló ewe imw eú ier mwirin ar ló seni Isip. Ka silei ika ién a ekiekietá an epwe kaú?

Ena ekiek, án Jiowa. Lupwen Moses a nóm wóón ewe chuuk Sinai, Jiowa a áiti ngeni ika epwe ifa usun an epwe aúetá. A apasa pwe epwe anapanapa pwe repwe mecheresin atomwatiw. Ika epwe ina usun, ekkewe pisek repwe tongeni kekiiló tori pwal eú leeni, iwe repwe tongeni apachasefálli. Iwe, lupwen ekkewe chón Israel ra mwékút seni eú me eú leeni lón ewe fénúpéén, ra kan uwei ewe imwenfel mangaku.

Ika kopwe nelong lón ewe kúkkún ruumw lesópwun ewe imwenfel mangaku, kopwe tongeni kúna eú pwoor. A iteni pworofel. Wóón ewe pwoor, a wor rúúemén chónláng mi iteni kerop mi ffér seni kolt mi nóm wóón me rúúepek. Kot a pwal makkeei ewe Allúk Engol wóón rúúaché faú mi chépép, pún iwe Moses a fen amékkú ekkewe mi ffér akkomw. Iwe, ekkeei faú ra iseis lón ewe pworofel. Eú rumeen mana a pwal iseis lón. En mi chechchemeni met ewe mana?

Jiowa a filatá pwiin Moses we Aaron pwe epwe souasor mi lap are samolfel mi lap. A wisen emmweni ekkewe aramas le fel ngeni Jiowa. Iwe néún kewe, pwal iir souasor are samolfel.

Nengeni ewe watteen ruumw lón ewe imwenfel mangaku. A watte seni ewe kúkkún ruumw wóón fán ruu. Ka kúna ewe kúkkún pwoor, a wor och étúét mi étútá seni? Iei ewe rong, ikewe ekkewe souasor ra kan keni och mettóch mi pwoéch ie itan appach mi pwokkus. Iwe, mei wor ewe leenien lamp, nge mi wor fisu lamp wóón. Ewe aúlúngátin mettóch lón ewe ruumw, ina ewe cheepel. Ra kan isoni engol me ruuofóch fóchun pilawa wóón.

Lón kiánin lúkún ewe imwenfel mangaku, a wor eú watteen sepi mi ur ren konik. Ekkewe souasor ra ákkáeá ena konik fán iten ar repwe télú péúr me pecher. Mei pwal wor ewe rong watte. Ra kan keni ekkewe man wóón ewe rong pwe repwe eáni asor ngeni Jiowa. Ewe imwenfel mangaku a nóm lukanapen leenier we, iwe ekkewe chón Israel ra nónnóm lón imwer kewe imw mangaku, nge imwer kewe a kan rongeló ewe imwenfel mangaku.