Moses A Opuni Ewe Achaw

A LULÓ ekkewe ier tori ewe 39 ier! Ekkewe chón Israel ra chúen nónnóm lón ewe fénúpéén. Nge lón ekkeei ier meinisin, Jiowa a túmúnú néún kewe aramas. A amwéngéniir ewe mana. A emmweniir lerán ren eú úren kuchu me emmweniir lepwin ren eú úren ekkei. Lón unusen ekkena ier, úfer kewe rese kan memmesiló, me pecher kewe rese kan memmetek.

Iei ewe áeúin maramen ewe áfáiken ier seni ar ló seni Isip. Ekkewe chón Israel ra pwal féri leenier me Kates. Iei ewe leeni ra nónnóm ie atun ekkewe engol me rúúemén spai ra ló operi ewe fénú Kanaan arapakkan 40 ier lóóm. Fefinen Moses we, Miriam, a máló me Kates, ina ewe leeni a wor fitikoko ie me lóóm usun chék iei.

Ekkewe aramas rese tongeni kúnékún konik. Ina popun ra ngúnúngúnú Moses: ‘Epwe fen múrinné ika sia fen máló. Pwata ka emmwenikich seni Isip ngeni ei leeni mi fókkun ngaw, ei leeni esap tongeni mámmáár mettóch ie? Ese wor ekkewe féún wiich me féún irá. Ese pwal wor konik ach sipwe ún.’

Lupwen Moses me Aaron ra feiló ngeni ewe imwenfel mangaku pwe repwe iótek, Jiowa a ereni Moses: ‘Ou emwicha ekkewe aramas. Iwe mwen meser meinisin, kopwe kapas ngeni enan faú ikenan ie. Ewe konik epwe towu seni epwe naféch ngeni ekkewe aramas me meinisin néúr kewe man.’

Moses a emwicha ekkewe aramas, iwe a apasa: ‘Ou aúseling, ámi kana esor ámi lúkú Kot! Ifa usun, ám me Aaron aupwe okusawu konik seni ei achaw fán itemi?’ Iwe, Moses a opuni ewe achaw fán ruu ngeni efóch wok, iwe och konik mi kusummóng a kusuwu me lón ewe achaw. Ewe konik a naféch ngeni meinisin ekkewe aramas me man ar repwe ún seni.

Nge Jiowa a song ngeni Moses me Aaron. En mi silei pwata? Popun, pún Moses me Aaron ra erá pwe iir pwisin repwe okusawu konik seni ewe achaw. Nge pwúngún pwe Jiowa a okusawu. Pokiten Moses me Aaron rese affata ei mettóch, Jiowa a erá pwe epwe apwúngúúr. A apasa: ‘Ámi ousap emmwenaalong nei kewe aramas lón Kanaan.’

Ekiseló mwirin, ekkewe chón Israel ra ló seni Kates. Mwirin ekis fansoun, ra tori ewe chuuk Hor. Me wóón ei chuuk, Aaron a máló. A 123 ierin atun a máló. Ekkewe chón Israel ra fókkun letipechou, iwe ren úkúkún 30 rán, meinisin ekkewe aramas ra kechiweiti Aaron. Néún we mwán Eleasar a wiliti souasor mi lap lón ewe mwúún Israel.