A Pwúkútá Péén Irá Seni Wokun Aaron We

NENGENI ekkeei péén irá me féún irá mi maw ra pwúkúwú seni ei wok, are émwúch. Iei wokun Aaron we. Ekkeei péén irá me féún irá mi maw ra pwúkúwú seni wokun Aaron ei lón chék eú pwin! Sipwe ppii ika met popun.

A fen fansoun langattam án ekkewe chón Israel fetálfeil lón ewe fénúpéén. Ekkóch me lein ekkewe aramas ra ekieki pwe ese pwúng án Moses epwe sou emmwen, iwe ese pwal pwúng án Aaron epwe souasor mi lap. Kora, i emén me lein chókkana, iwe pwal Tatan, Apiram me 250 sou emmwenin ekkewe aramas. Chókkeei meinisin ra pwereto, iwe ra ereni Moses: ‘Pwata ka pwisin átekiaketá mwem, ám ekkeei lusun?’

Moses a ereni Kora me ekkewe 250 mi peni: ‘Lesossorun lesor oupwe angei ekkewe leenien ekkei me uwoulóng appach mi pwokkus lón. Iwe, oupwe pwereto ren án Jiowa we imwenfel mangaku. Sipwe ppii ié we Jiowa epwe filatá.’

Sorotáán ewe rán, Kora me ekkewe 250 mi peni ra feito ngeni ewe imwenfel mangaku. Nge chómmóng ra pwal feiló lón imwen Kora, Tatan me Apiram pwe repwe peniiretá. Jiowa a fókkun song. Moses a apasa: ‘Ou sú seni imwen ekkeei mwán mi ngaw. Ousap attapa och mettóch me lein pisekiir kewe.’ Ekkewe aramas ra álleasochis, iwe ra kineló seni ekkewe imw, imwen Kora, Tatan me Apiram.

Iwe Moses a apasa: ‘Ren ei mettóch ámi oupwe silei ién Jiowa a fen filatá. Ewe pwúl epwe suukfesen me oromaaló ekkeei mwán mi ngaw.’

Mwirin chék án Moses fós, ewe pwúl a suukfesen. Imwen Kora we, an kewe pisek tori pwal Tatan me Apiram me iir kewe mi etiir ra turulong lón, iwe ewe pwúl a liwinfengen. Lupwen ekkewe aramas ra rong púchérún iir kewe mi turulong lón ewe pwang, ra kétá: ‘Ssá! Eli ewe pwúl epwe pwal oromaakicheló!’

Kora me ekkewe 250 chón peni ra chúen nóm únúkkún ewe imwenfel mangaku. Iwe Jiowa a tiinatiw ekkei, iwe iir meinisin ra kareló. Mwirin, Jiowa a ereni néún Aaron we itan Eleasar pwe epwe angei ekkewe leenien ekkei seni ekkewe mwán mi máló, iwe epwe féri och chechchen ewe rong seniir, nge epwe chék cháchcháák. Ei chech epwe eú pisekin éúréúr ngeni ekkewe chón Israel pwe esap wor emén epwe wiseni ewe wis souasor ngeni Jiowa, lúkún Aaron me néún kewe mwán.

Nge Jiowa a mochen affataéchú pwe a filatá Aaron me néún kewe mwán pwe repwe wisen souasor. Ina popun a ereni Moses: ‘Kopwe ereni emén sou emmwen lón iteiten einangen Israel meinisin an epwe uwouto en me wokun. Nge ren ewe einangen Lefi, kopwe ereni Aaron pwe epwe wato wokun we. Mwirin, kopwe waalong ekkewe wok meinisin lón ewe imwenfel mangaku, nge repwe nóm mwen ewe pworofel. Epwe pwúk péén irá seni wokun ewe mwán ua fen filatá ngeni ewe wis souasor.’

Sorotáán ewe soran, lupwen Moses a nengeni ekkewe wok, a kúna pwe ekkeei péén irá me féún irá mi maw ra fen pwúkútá seni wokun Aaron we! Iwe iei, ka weweiti pwata Jiowa a ámááraatá péén irá seni wokun Aaron we?