Emén Chón Solá Lón Israel

NENGENI met ei mwán a ireei lón imwan ei imw mangaku! Eché úf mi ling, efóch fóchun kolt me ekkóch féún silifer. A angei iir seni ewe telinimw Jeriko. Nge met repwe itá féri ngeni ekkewe mettóch lón Jeriko? En mi chechchemeni?

Repwe itá kata, nge ekkewe kolt me silifer repwe ló ngeni ewe leenien iseis lón án Jiowa we imwenfel mangaku. Weween, ekkeei aramas ra álleasolapa Kot. Ra fen solááni minne án Kot. Iten ei mwán, Akan, iwe ekkeei aramas, chón an we famili. Sipwe ppii met epwe fis.

Mwirin án Akan soláái ekkeei mettóch, Josua a tiinaaló ekkóch mwán pwe repwe maunei ewe telinimw itan Ai. Nge ra kkuf. Ekkóch ra máló, nge ekkewe lusun ra sú. Josua a fókkun letipengaw. A chapetiw wóón ewe pwúl, iwe a iótek ngeni Jiowa: ‘Pwata ka mut ngeni ei mettóch an epwe fis ngenikem?’

Jiowa a pélúweni: ‘Kele pwáátá! Israel a tipis. Ra fen angei ekkóch ekkewe mettóch repwe itá kata are fangóló ngeni án Jiowa we imwenfel mangaku. Ra solááni ekkóch pisek fengen me eché úf mi ling, iwe ra túkúmi ar na féffér. Usap efeiéchúkemi ika ouse akkomw atai ewe mettóch me nieló ewe emén mi soláái ekkeei mettóch.’ Jiowa a apasa pwe epwe pwáraatá ngeni Josua ika ié ewe mwán mi ngaw.

Iwe, Josua a emwichafengenni meinisin ekkewe aramas, iwe Jiowa a pwári ngeni ewe mwán mi ngaw, Akan. Akan a apasa: ‘Ua fen tipis. Ua kúna eché úf mi ling, efóch fóchun kolt me ekkewe féún silifer. A kon watte ai mochen pisekiniir, pwe iwe ua angei iir. Kopwe kúner ar ra ireir fán pwúl lón imwei we imw mangaku.’

Lupwen ra kúna ekkeei mettóch me uweato ren Josua, a ereni Akan: ‘Pwata ka efisatá fitikoko ngenikich? Iei Jiowa epwe apwúnguk!’ Iwe, meinisin ekkewe aramas ra monei ngeni faú Akan me chón an we famili tori ra máló. Esap pwe ena pwóróus a pwáraatá pwe sisap fókkun angei ekkewe pisek esap pisekich?

Mwirin Israel a pwal maunsefál ngeni Ai. Nge lón ei fansoun, Jiowa a álisi néún kewe aramas, iwe ra win lón ewe maun.